Qaraǵandy oblysynyń ákimi Erlan Qoshanov pen «ArselorMıttal Temirtaý» AQ-nyń Bas dırektory Paramjıt Kalon ekeýi Saran, Abaı jáne Shahtınsk qalalarynda bolyp, kómir ónerkásibiniń ardagerleri men qyzmetkerlerin kásibı merekelerimen quttyqtady.
Oblys ákimi olarǵa qajyrly eńbekteri úshin Elbasy men el Prezıdentiniń atynan alǵys aıtty.
– Kenshiler kúni – bizdiń ólkemizdiń súıikti merekesi. Qaraǵandy oblysyn dástúrli túrde kenshiler óńiri dep ataıdy jáne biz ony maqtan tutamyz. Elbasy óziniń quttyqtaý jedelhatynda shahterlerdiń jumysyn joǵary baǵalady. Ol kenshilerge árdaıym úlken qurmetpen qaraıdy jáne kenshiler eńbeginiń qanshalyqty qıyn ekenin biledi. Bul kúnderi Qasym-Jomart Toqaev bizdiń oblysqa saparmen kelip qaıtqan bolatyn. Ol memleket tarapynan óńir turǵyndarynyń ómir súrý sapasyn arttyrý boıynsha sharalar jalǵastyrylatynyn atap ótti, – dedi óziniń quttyqtaý sózinde óńir basshysy Erlan Qoshanov.
Sondaı-aq, oblys ákimi bılik tarapynan shahterler meken etetin qalalardaǵy jaǵdaıdy jaqsartý jáne turmys sapasyn arttyrý boıynsha qoldan kelgen múmkindiktiń bári jasalatynyna ýáde berdi. Áleýmettik máseleler birtindep sheshilýde, turǵyn úı salynyp jatyr, joldar men aýlalar retke keltirilýde, dep atap ótti ol.
Oblys ortalyǵynda mereke kúni Qaraǵandy kómir basseıniniń tarıhy, kenshiler kásibiniń bedeli men erligin taqyryp etken teatrlandyrylǵan qoıylymdar kórsetildi. Kenshilerdi kásibı merekesimen quttyqtaýǵa elimizdiń estrada juldyzdary men ataqty óner ujymdary keldi. Shahterler úshin ózbektiń «Iаlla» vokaldy-aspaptar ansambli, «Golos.Detı» baıqaýynyń jeńimpazy Erjan Maksım jáne «Raım ı Artýr» tanymal dýeti óner kórsetti.
Sondaı-aq «Shahterskaıa slava» vokaldyq baıqaýynda kenshiler ózderiniń ánshilik talanttaryn kórsetip, óner jarystyrdy. Kenshiler astanasyna arnalǵan dástúrli retro-konserttiń de kóptiń kóńilinen shyqqanyn aıta ketken lázim.
Budan bólek, qala turǵyndary men qonaqtary úshin ortalyq saıabaqtyń jaǵalaýynda Vengrııa, Ispanııa, Serbııa jáne Italııadan kelgen óner ujymdary konsert qoıdy. Sheteldik ónerpazdar jaqynda ǵana Ulytaýda ótken Jezkiik etnıkalyq mýzyka festıvaline qatysqan bolatyn. Kenshilerdiń keremet ótken merekesin keshkilik otshashýlar túıindedi.
Qaraǵandy oblysy
