Bıyl Abaıdyń 1889 jyly jazǵan óleńderine 130 jyl tolady. Osy datanyń aıasynda ótkizilgen ádebı jıynnyń moderatory, abaıtanýshy Almahan Muhametqalıqyzynyń sózine súıensek, 130 jyl buryn Abaıdyń 10 óleńi kópshilikke óz atynan taraǵan. «Bıyl Abaıdyń 10 óleńine 130 jyl tolady. Atap aıtsaq, «Esińde bar ma jas kúniń», «Júregim meniń qyryq jamaý», «Adam bir boq kótergen boqtyń qaby», «Kúshik asyrap ıt ettim», «Súısine almadym, súımedim», «Dútbaıǵa», «Nurly aspanǵa tyrysyp óskensiń sen» óleńderi men M.Lermontovtan aýdarǵan «Jalaý», «Jartas», «Júrekte kóp qazyna bar, bári jaqsy» sııaqty týyndylary jaryq kórgen», deıdi ǵalym.
Aıtýly sharaǵa abaıtanýshy Mekemtas Myrzahmetov, QR Jazýshylar odaǵynyń tóraǵasy Ulyqbek Esdáýlet, qoǵam qaıratkeri Ǵarıfolla Esim, Jazýshylar odaǵynyń Nur-Sultan qalalyq fılıalynyń dırektory Dáýletkereı Kápuly, abaıtanýshy, professor Ábdijálel Bákir, fılologııa ǵylymdarynyń kandıdaty Erbol Tileshov, aqyn Saǵymbaı Jumaǵulov bastaǵan zııaly qaýym ókilderi qatysty.
Jıynda sóz alǵan ǵalym Mekemtas Myrzahmetov: «Abaıdy jattaý bar da, túsiný bar. Jattaýdan aldymyzǵa jan salmaı júrsek te, kóbinese túsinbeı qalamyz. Onyń sebebi kóp. Abaıdyń rýhanı álemi men pálsapalyq lırıkasyna Eýropa da, Shyǵys ta jete almaǵan. Qazir álemdik dúnıetanym ózgerdi. Abaıdan qalǵan «Tolyq adam ilimi» deıtin uly mura bar. Qazir osy ilim Qazaqstandaǵy 8 ýnıversıtette oqytylyp jatyr. Sonyń monografııasyn jazyp bitirdim. Túbi bul ilimdi búkil álem zerttep, oqıtyn bolady. Sebebi ondaı tereń ilim Eýropada da, myna irgedegi Qytaıda da joq», dedi abaıtanýshy.
#Abai175 chellendjine ún qosyp, QR Prezıdenti Qasym-Jomart Toqaevqa poezııa estafetasyn usynǵan Láılim-Shyraq Erlanqyzy da dóńgelek ústelge qatysyp, uly aqynnyń óleńin mánerlep oqydy.
