Atyraýlyq sýretshi Ádilqaıyr Jantasov bıylǵy jazǵy demalysyn Kıprdiń Nıkosııa qalasynda ótkizdi. Sol eldiń ataqty bıznesmeni Sýat Irfan Gıýnseldiń shaqyrýymen túrki tildes elderdiń sýretshileri osy shaharǵa jınalǵan. Qazaqstannan barǵan on qylqalam sheberiniń arasynda QR Sýretshiler Odaǵynyń múshesi, N.Tilendıev atyndaǵy kishi óner akademııasynyń oqytýshysy Ádilqaıyr Jantasov ta bar.
- Sýat Irfan ótken jyly qazirgi zamanǵy óner mýzeıiniń irgetasyn qalaǵan bolatyn. Qazir qurylys júrip jatyr. Alty qabatty úlken nysanda 14 zal bolady. Oǵan 20 mıllıondaı sýret jınalý kerek. Osy maqsatta birneshe memleketterdiń sýretshileri bas qosyp, eńbek ettik. Bizdiń barlyq jaǵdaıymyz jasaldy,-deıdi Á.Jantasov.
Mýzeıge atyraýlyq sýretshiniń úsh týyndysy tańdalyp alynǵan. Onyń biri – «Kókpar». «Tórtinshi kúni sheberhanamyzǵa Sýat bı keldi. Jumysyma uzaq qarap turdy, «Naǵyz mýzeıdiń tórinde turatyn týyndy eken», -dedi. «Bul kartınanyń taqyryby-kókpar»,-dep edim, «Túsindim» dep basyn ızedi. Odan bólek «Baqtalas» pen «Tolaǵaıdy» tańdap aldy. «Tolaǵaıdy» 2013 jyly salǵanmyn, aldyn ala sýretin jiberip edim. Mýzeıge alatynyn aıtty. Bir qyzyǵy, osy kartınadaǵy taý kórinisi Kıprdegi «Beshbarmaq» taýyn eske túsiredi. Ony atalǵan taýdy óz kózimmen kórgende ańǵaryp, tań qaldym», - deıdi sýretshi.
Shyǵarmashylyq ıelerinde bolashaqty týyndylary arqyly boljaý bolyp turady. Qııaly ushqyr sýretshi Ádilqaıyr da osyndaı oqıǵalar jıi kezdesetinin aıtady. Birneshe jyl buryn qaǵazǵa túsirgen týyndylaryndaǵy beınelermen Jerorta teńiziniń jaǵalaýynda «kezdesip» qaıtqan qylqalam sheberiniń qazir naǵyz shabytty shaǵy. «Aldaǵy jyly da Kıprge shaqyrtý aldym. Oǵan deıin daıyndalyp, oıymda júrgen dúnıelerdi retteýim kerek. Keler jazda Kıprde jeke shyǵarmashylyq kórmem ótedi», - dep qýanyshty jańalyǵymen bólisti.
Jerdiń bir buryshyndaǵy óner ordasynda qazaqtyń «Kókpary», qazaq sýretshisiniń qoltańbasy turǵany qandaı jaqsy!
ATYRAÝ
