Zań jobalaryn QR Premer-Mınıstriniń birinshi orynbasary – qarjy mınıstri Á. Smaıylov, QR ulttyq ekonomıka mınıstri R. Dálenov tanystyrdy. Sondaı-aq kún tártibindegi másele boıynsha QR Ulttyq Bankiniń Tóraǵasy E. Dosaev sóz sóıledi.
2020–2024 jyldarǵa arnalǵan Qazaqstannyń áleýmettik-ekonomıkalyq damý boljamyna sáıkes QR JIО́-niń naqty ósimi 2020 jyly 4,1%, keıinnen 2024 jyly 4,7%-ǵa deıin ósedi dep boljanǵan. JIО́-niń ortasha jyldyq ósý qarqyny aldaǵy boljanatyn kezeńde 4,4%-dy quraıdy.
Respýblıkalyq bıýdjet jobasynda 2020 jylǵa arnalǵan túsimder osy jyldyń josparyna 639 mlrd teńge ósimmen 11,2 trln teńgeni quraıdy. 2020–2022 jyldarǵa arnalǵan respýblıkalyq bıýdjet shyǵystarynyń basymdyqtary Memleket basshysynyń Qazaqstan halqyna jyl saıynǵy joldaýlary men QR Tuńǵysh Prezıdenti – Elbasynyń jarııalanǵan bastamalaryn odan ári iske asyrýǵa baǵyttalatyn bolady.
Turǵyndardyń turmys sapasy men ál-aýqatyn odan ári arttyrý birinshi kezektegi baǵyttary bolyp qalyp otyr. 2020 jylǵa arnalǵan áleýmettik sala shyǵystary bıylǵy shyǵys kóleminen 303 mlrd teńgege ósimmen 5,7 trln teńge kóleminde josparlanyp otyr.
Premer-Mınıstr Asqar Mamın 2020–2022 jyldarǵa arnalǵan jalpy sıpattaǵy transfertterdiń kólemin aıqyndaý kezinde árbir óńirdiń erekshelikteri jáne olardyń ekonomıkalyq damý deńgeıleri eskerilgenin atap ótti.
«Respýblıkalyq bıýdjette kózdelgen qarajat memlekettiń barlyq áleýmettik mindettemelerin tolyq kólemde oryndaýǵa múmkindik beredi», — dedi Asqar Mamın.
Sonymen qatar bıýdjet shyǵystary ekonomıkanyń naqty sektoryn qoldaýǵa, onyń ishinde ındýstrııalyq-ınnovasııalyq damýǵa, turǵyn úı jáne kólik ınfraqurylymyna, agroónerkásiptik keshenge, sıfrlandyrýǵa, ónimdi jumyspen qamtýǵa baǵyttalatyn bolady.
«О́ńirlerdiń ákimderi bıýdjet qarajattaryn jumsaý kezinde belgilengen baǵyttardy ustanýy qajet», — dep atap aıtty A. Mamın.
Atalǵan zań jobalary Memleket basshysymen kelisilgen jáne belgilengen tártippen Respýblıkalyq bıýdjet komıssııasymen maquldanǵan. Mınıstrler kabınetiniń qaraýynyń qorytyndysy boıynsha jobalar QR Parlamenti Májilisine jiberiletin bolady.
