Osydan birshama buryn áriptesimniń qolynan bas basylymdy kózim shaldy. Osy jyldyń 24 naýryzyndaǵy nómirinde jarııalanǵan «Eleýli eńbekpen eleýsiz júrgender» atty maqalany oqyǵannan keıin sizderge habarlasyp otyrmyn. Sol maqaladaǵy kóp keıipkerdiń biri bolamyn. Men áleýmettik qyzmet kórsetý ortalyǵynda bala kútýshi bolyp jumys isteımin. Maqalanyń bir sóılemdik taqyrybyna bizdiń tutas qyzmettik ómirimiz syıyp ketipti. Shynynda dál solaı, eleýli eńbekpen eleýsiz júrmiz. Qaǵaz, sóz júzinde logoped, defektolog, psıhologtar erekshe balalarmen tyǵyz qarym-qatynasta eńbek etedi, alaıda erekshe balalarmen udaıy birge bolatyndar – biz sekildi bala kútýshiler. Olar aqyl-oı, dene bitiminde qandaı da bir kemistigi bar jandardyń janynda 24 saǵat boıy júredi, úlken-kishi dáretin, tógip-shashqanyn jýady, tamaqtandyrady. О́kinishke qaraı, maqalada kútýshiniń qyzmeti nazardan tys qalypty. Dese de, biz týraly arnaıy materıal daıyndaýdy ótineıin degen oıym joq, osyndaı ortalyq qyzmetkerleriniń adal eńbegi sóz etilgendikten, ishinde bar ekenimizdi bilemiz. Men bar bolǵany, sol maqalada kóterilgen paıymdy usynys joǵaryǵa jetken-jetpegenin bilý úshin habarlastym.
Atalǵan maqalanyń túıini: «Eleýli bolsyn desek... Júıkege salmaq túsiretin mundaı jumyspen 60-63 jasta zeınetke shyǵý, keshirińiz, oǵan jetýdiń ózi ekitalaı. Áleýmettik salada eńbek etetin, ásirese múmkindigi shekteýli jandarǵa qyzmet kórsetetin mamandardyń zeınetke shyǵý jasyn quqyq qorǵaý organdary qyzmetkerlerimen teńestirý qajet. О́ıtkeni olar «pogondylardan» kóp bolmasa, az jumys istemeıtinine eki barǵanda-aq kózimiz jetti», dep aıaqtalǵan. Osy bir qajettilik pen eńbekti eskerýden týyndaǵan usynys qoldaý taba ma? Naýryzdan beri tıisti vedomstvolardan jaýap boldy ma? Osyny bilgimiz keledi. Sebebi qazir ortamyzda densaýlyǵyn múgedek balalardy baǵyp-qaǵýǵa berip, zeınet jasyna moınyn sozyp, súıretilip júrgender jeterlik. Arzymaıtyn aılyqqa aldanyp júrmiz. Jalaqy mólsherin shildede kóterdi, sonyń ózinde 57 myń teńge alamyz. Atalǵan maqalada jaqsy zertteý júrgizilip, «AQSh klınıkalaryndaǵy áleýmettik qyzmetkerlerdiń jyldyq jalaqysy 42-54 myń dollar aralyǵynda. Sonda aıyna 1 mln 300 – 1 mln 700 myńnyń arasynda alady. Ony bizdegiler jylyna da ala almaıdy», degen qorytyndy shyǵarylǵan ǵoı. Ondaı túsimizge de kirmeıtin jalaqyny bermeıtinin bilemiz, sondyqtan suramaımyz da. Bar bolǵany zeınet jasyn qysqartý týraly joǵarydaǵy sóz – eldegi men sekildi barsha qyzmetkerlerdiń kúndiz-túni oıynan ketpeıtin úmit-tilegi ekenin eskerse deımiz.
Baǵıla BAIYMBETOVA,
Áleýmettik qyzmet kórsetý ortalyǵynyń bala kútýshisi
ShYMKENT
