Qazaqstannyń Tuńǵysh Prezıdenti – Elbasy Nursultan Nazarbaev atalǵan syılyqty bul marapatqa qaıtys bolǵannan keıin laıyq dep tanylǵan MAGATE-niń burynǵy bas dırektory Iýkııa Amanonyń jaqyndaryna jáne Iаdrolyq synaqtarǵa jalpyǵa birdeı tyıym salý týraly shart uıymynyń atqarýshy hatshysy Lassına Zerboǵa tapsyrdy.
Qasym-Jomart Toqaev óz sózinde bul is-sharanyń Iаdrolyq synaqtarǵa qarsy halyqaralyq kún merekesimen tuspa-tus kelýiniń sımvoldyq máni bar ekenin atap ótti.
– Bıyl Qazaqstannyń ıadrolyq qarýdy taratpaý týraly shartqa jáne MAGATE-ge qosylǵanyna 25 jyl toldy. Sondaı-aq, Ortalyq Azııada ıadrolyq qarýdan azat aımaq qurý týraly sharttyń kúshine engenine 10 jyl boldy, – dedi Memleket basshysy.
Qasym-Jomart Toqaev Qazaqstannyń Tuńǵysh Prezıdentiniń jahandyq antııadrolyq qozǵalystyń kóshbasshysy retinde álemdik qoǵamdastyq tarapynan ádiletti túrde moıyndalǵanyn atap ótti.
– Elbasy Nursultan Nazarbaevtyń Semeı ıadrolyq synaq polıgonyn jabý týraly Jarlyǵynyń tarıhı máni bar. Keńestik áskerı elıta men keıbir saıasatkerlerdiń qarsylyǵyna qaramastan ıadrolyq polıgondy jabý týraly Tuńǵysh Prezıdenttiń qabyldaǵan sheshimi zor batyldyq pen temirdeı erik-jigerdi talap etti. Ol búkilálemdik antııadrolyq qozǵalysqa katalızator boldy, – dep málimdedi Memleket basshysy.
Qazaqstan Prezıdenti halyqaralyq qaýipsizdikti qamtamasyz etý isinde mańyzdy ról atqarǵan Elbasynyń bastamalaryna toqtaldy.
– Ortalyq Azııada ıadrolyq qarýdan azat aımaq qurý jónindegi usynystar, MAGATE-niń qoldaýymen elimizdiń aýmaǵynda Ýrannyń tómen baıytylǵan bankiniń ornalastyrylýy, Irannyń ıadrolyq máselesin retteý isindegi Qazaqstannyń deldaldyq kúsh-jigeri, sondaı-aq Iаdrolyq qarýdan azat álem qurý týraly BUU Bas Assambleıasynyń jalpyǵa ortaq deklarasııasy jahandyq turaqtylyq pen senim negizin nyǵaıtýǵa aıtarlyqtaı úles qosty, – dep atap ótti Qasym-Jomart Toqaev.
Sonymen qatar, Memleket basshysy álemniń keıbir óńirlerinde ıadrolyq qaýip-qaterdiń saqtalyp otyrǵanyna nazar aýdardy.
– BUU málimetinshe, búginde álemde 15 myń ıadrolyq qarý saqtalýda, onyń júzden astamy sanaýly mınýttardyń ishinde iske qosyla alady. Halyqaralyq qatynastardaǵy qaqtyǵys áleýetiniń artýyna jáne qarjy-ekonomıkalyq qaıshylyqtardyń kúsheıýine baılanysty ahýal shıelenisip ketti. Irannyń ıadrolyq baǵdarlamasy jónindegi is-qımyldardyń jalpyǵa birdeı birlesken josparynyń, sondaı-aq Orta jáne jaqyn qashyqtyqtaǵy zymyrandardy joıý týraly sharttyń taǵdyry aıqyndalmaı otyr, – dedi Prezıdent.
Qasym-Jomart Toqaev syılyqtyń laýreattary – MAGATE-niń burynǵy basshysy marqum Iýkııa Amano men Iаdrolyq synaqtarǵa jalpyǵa birdeı tyıym salý týraly shart uıymynyń atqarýshy hatshysy Lassına Zerbonyń sińirgen eńbegin atap ótip, olardyń ıadrolyq qarýdy taratpaý jáne halyqaralyq qaýipsizdik isine qosqan zor úlesterin joǵary baǵalady.
– Iýkııa Amano MAGATE-niń basshysy qyzmetin atqarǵan kezde Qazaqstanda Ýrannyń tómen baıytylǵan bankin qurý isinde mańyzdy ról atqardy jáne Irannyń ıadrolyq problemasyn sheshýge atsalysty. Lassına Zerbonyń qyzmeti men kúsh-jigeri Iаdrolyq synaqtarǵa jalpyǵa birdeı tyıym salý týraly shart Monıtorınginiń halyqaralyq jelisin qurý jónindegi jumystardyń is júzinde tolyq aıaqtalýyna múmkindik berdi. Sondaı-aq, ol Shart uıymynyń Kórnekti qaıratkerler toby men Jastar tobyn qurý jóninde bastama kóterdi.
Qazaqstan Prezıdenti sóziniń sońynda ıadrolyq qarýsyzdaný jáne ıadrolyq qarýdy taratpaý isindegi birlesken kúsh-jigerdi jalǵastyrýǵa shaqyrdy. Onyń aıtýynsha, Elbasynyń antııadrolyq bastamalary jahandyq qaýipsizdikti nyǵaıtý úderisiniń mańyzdy baǵdary bolyp qala berýi tıis.
