Kezdesýdiń alǵashqy mınýty teń dárejede bastalǵanymen, oıynnyń altynshy mınýtynda alań ıeleri jyldam gol soǵýǵa múmkindik aldy. Gol avtory – Maksım Skavysh. Jankúıerlerdiń qyzý qoldaýyna ıe bolǵan BATE fýtbolshylary alǵa qaraı lap qoıdy. Degenmen «Astana» fýtbolshylar jyldam ózderine kelip, úsh mınýtta eki birdeı qaýipti shabýyl uıymdastyryp úlgerdi. Biraq eshqaısysy nátıje bergen joq. Sondaı-aq jerlesterimiz alǵashqy 15 mınýt ishinde BATE qaqpasyna eki birdeı buryshtama dobyn oryndaǵanymen, qarsylas komandanyń qorǵaýshylary qyraǵylyq tanytyp, dopty óz aıyp alańynan alyp shyǵa bildi. Ary qaraı oıyn eki komandanyń alma-kezek shabýylymen órbidi. Kezdesýdiń 21-mınýtynda Marın Tomasov BATE-niń eki birdeı qorǵaýshysyn ońaı aldap ótip, qaqpaǵa baǵyttaǵan soqqysy qıys ketse, 35-mınýtta alań ıeleri oıynshysynyń alystan shirene tepken doby Erıch qorǵaǵan qaqpanyń dál janynan ótti. Arada bir mınýt óter-ótpes «Astana» qorǵaýshysy Lýka Shımýnovıch óz aıyp alańynda qatelesip, qarsylas oıynshysynyń soqqy jasaýyna múmkindik berip qoıdy. Alaıda Erıch óz ornynan tabyla bildi. Birinshi taımnyń sońǵy mınýttarynda BATE fýtbolshylary bizdiń qaqpamyzdyń aldyn torýyldap, úziliske deıin ekinshi golyn soǵýǵa umtyldy. Abyroı bolǵanda qorǵaýshylarymyz sátti qorǵanyp, qaýiptiń betin qaıtardy.
Alǵashqy taım BATE-niń azdaǵan basymdyǵymen ótkenimen, «Astanany» nashar oınady dep aıta almaımyz. Dorın Rotarıý men Marın Tomasov qos qaptaldan qarsylastardy qyspaqqa alyp, qaýipti shabýyl uıymdastyrdy. Sondaı-aq Erıchtiń qyraǵylyǵyn da aıta ketken jón. Úsh birdeı gol soǵatyn 100 paıyzdyq shabýyldyń betin qaıtaryp, qaqpasyn goldan aman saqtap qaldy. Sonymen qatar qos komandanyń bas bapkerleri bir mınýt tynym tappaı, 45 mınýt tik turǵan kúıi shákirtterine óz aqyl-keńesterin berip turdy. Osylaısha, kezdesýdiń alǵashqy taımy 0:1 esebimen BATE-niń paıdasyna aıaqtaldy.
Kezdesýdiń ekinshi bóligin BATE fýtbolshylary belsendi bastap, á degennen-aq shabýylǵa kiristi. Degenmen «Astana» oıynshylary da qarap qalǵan joq. Qarsylastyń árbir shabýylyna shabýylmen, soqqysyna soqqymen jaýap berip otyrdy.
Kezdesýdegi qyzyq jaǵdaı oıynnyń 52-mınýtynda oryn aldy. Stadıonǵa jınalǵan 15 myńǵa jýyq jankúıer bir mezette ornynan turyp, 2-3 mınýt boıy shapalaq soqty. Munyń syryn Belarýs áriptesterimizden suraǵanda, BATE-niń 1996-2018 jylǵy basshysy Anatolıı Kapskıı byltyr 52 jasynda qaıtys bolǵan eken. Osylaısha, jankúıerler oıynnyń 52-mınýtynda Kapskııdi eske alyp, rýhyna taǵzym bildirdi.
Matchtyń 55-mınýttan bastap alań ıeleri oıyndy tolyq óz baqylaýlaryna aldy. Bizdiń oıynshylar qorǵanysqa mán berip, tek qarsy shabýylǵa ıek artýǵa májbúr boldy. Bálkim, úziliste Grıgorchýk fýtbolshylarǵa qorǵanysty myqtap ustaýǵa tapsyrma bergen bolar. О́ıtkeni, «Astanaǵa» gol soqqannan góri, qaqpaǵa gol ótkizip almaý mańyzdy edi.
Dúrkin-dúrkin shabýyldyń óz jemisin berer sáti bolady ǵoı. 65-mınýtta sondaı sátterdiń birinde BATE oıynshylary qaqpamyzǵa ekinshi golyn soqqan bolatyn. Abyroı bolǵanda qaptaldaǵy tóreshi jalaýshasyn kóterip, dop oıynnan tys jaǵdaıda soǵylǵanyn bildirdi. Esep ózgerýsiz qaldy. Kezdesýdiń 70-mınýtynda Roman Grıgorchýk oıyndaǵy alǵashqy ózgeristi jasady. Alańda shabýylshy qyzmetin atqarǵan Roman Murtazaevtyń ornyna Rangelo Iаngany shyǵardy. Keshegi baspasóz jıynynda gol soǵýǵa tyrysamyn degen shabýylshy alǵashqy múmkindiginde múlt ketti. Tipti, dop toqtatýda qatelesip, dopty qarsylas komanda oıynshysynyń aıaǵyna salyp berdi.
Qatelikti keshirmeıtin BATE oıynshylary matchtyń 85-mınýtynda «Astana» qaqpasyna ekinshi golyn soǵyp ketti. Bul joly mergendigimen Evgenıı Iаblonskıı kózge tústi. Jankúıerlerdiń qyzý qoldaýyna ıe bolyp, goldan rýhtanǵan fýtbolshylar «Astana» qaqpasyna shabýyldy bir sátke de toqtatqan joq. Ekinshi taımǵa qosylǵan qosymsha ýaqytta Grıgorchýk alańǵa besinshi qorǵaýshy Abzal Beısebekovty Marın Tomasovtyń ornyna shyǵaryp, qorǵanysty qymtap tastady. Osylaısha, qaqpamyzǵa gol ótkizbeı, tablodaǵy kórsetkishti saqtap qaldy.
Áne, tóreshiniń oıyn aıaqtalǵanyn bildiretin ysqyryǵy shalyndy. Sonymen «Astana» besinshi jyl qatarynan Eýropa lıgasynyń toptyq kezeńine shyǵyp otyr.
Búgingi oıynda BATE jankúıerlerine erekshe rıza boldyq. Komandasynyń árbir qımylyna shapalaqpen baǵa berip, alǵa qaraı umtylýǵa qoldaý bildirip otyrdy. Keı sátterde «Astana» oıynshylary ýaqyt sozdy dep, tóreshilerge óz narazylyǵyn bildirip jatty.
