Osy aptalyq joba barysynda óńirdegi Ádilet departamenti Nur Otan partııasynyń jergilikti qoǵamdyq qabyldaý bólmesinde turǵyndardy qabyldaý kúnin ótkizdi.
– Aptalyq joba, ıaǵnı «Negizgi Zań aptalyǵy» ótetini jaıly estidim. Bul aptalyq qarapaıym halyqtyń kúndelikti tirlik barysynda zań oryndaryna, quqyq salasynyń mamandaryna jetkize almaı júrgen saýaldarynyń jaýabyn alýǵa múmkindik berýde, – deıdi Habıba Móldekova.
– Tyıym salynǵan esepshotty sheshýge baılanysty suraǵym bar edi. Zańgerler bárin de naqty túsindirip berdi. Negizi, Zań aptalyǵy aıynda bir ret bolsa da turǵyndarǵa qajet, – deıdi Aqylbek Bekishov. Departament mamandarynyń aıtýynsha, aptalyq barysynda 20-dan astam turǵyn naqty, túsinikti, quqyqtyq kómek aldy. Bul quqyqtyq kómekter zııatkerlik menshik nysandaryn tirkeý, jyljymaıtyn múlikti tirkeý, zań boıynsha murany qabyldaý, neke qııý, týýdy jáne ólimdi tirkeý, nesıe alý arqyly alaıaqtyq áreketter jasaý, alıment tóleý jáne basqa da máseleler qabyldaý barysynda túsindirildi. Oblystyq Ádilet departamenti basshysynyń orynbasary Shynar Tabylovanyń aıtýynsha, aptalyq aldaǵy 28, 29 kúnderi de jalǵasady. Departamentte Ashyq esik kúni turǵyndardy qabyldaý júrgiziledi.
– Jalpy, alıment máselesi boıynsha suraqtar kóp túsedi. Alımentten jaltarǵandar ákimshilik jaýapkershilikke tartylady. Ony tóleıtin adamdarǵa moınyndaǵy qaryzyn óteýge mindetti ekenin túsindiremiz, – deıdi.
Sonymen qatar Ádilet departamenti qyzmetkerleri Advokattar alqasymen, oblystyń Notarıattyq palatasymen, jeke Sot oryndaýshylarynyń óńirlik palatasymen birlesip qoldanystaǵy zańnamalar boıynsha sottalǵandarǵa keńes berý maqsatynda AP 162/2 túzeý mekemesinde de boldy.
Kezdesý barysynda sottalǵandarǵa olardyń jazasyn óteý kezindegi quqyqtary, jaza merzimi aıaqtalǵannan keıin olardy jumysqa ornalastyrý tártibi túsindirildi.
Sottalǵandarmen jeke áńgime júrgizildi, olarǵa raqymshylyq jasaý týraly zańnama, qamaýdaǵylardyń eńbek quqyqtaryna qatysty quqyqtary men mindetteri túsindirildi.
Sottalǵandar Azamattyq hal aktilerin tirkeý, sot sheshimderin qaıta qaraý jáne shaǵym jasaý, sottalǵandardyń rejimin aýystyrý, alıment tóleý máseleleri boıynsha da bilikti zańgerler kómegin aldy.
– Bas bostandyǵynan aıyrý túrindegi jazasyn ótep jatqan adamdardyń quqyqtyq saýattylyǵy men mádenıetin arttyrý maqsatynda osyndaı is-sharalardy ótkizý, olardyń quqyqtary men mindetterin túsindirý tıimdi áleýmettik beıimdelýine yqpal etpek, – deıdi zańgerler.
Pavlodar oblysy
