Mádenıet jáne sport mınıstrligi uıymdastyrǵan «Rýhanı qazyna-2019» festıvalinde Aqkıiztoǵaı aýyldyq kitaphanasynyń jumysy «Úzdik aýyldyq kitaphana» atalymy boıynsha jeńimpaz bolyp tanylǵanda, tańyrqaı qoıǵanymyz joq. Solaı bolýy tıis te edi.
Ulttyq mádenıetti nasıhattap, aımaqtyq mádenıet uıymdarynyń ımıdjin nyǵaıtýǵa baǵyttalǵan úzdik tájirıbelerdi kórsetý maqsatynda ótken festıvalge atalǵan kitaphananyń meńgerýshisi Sandýǵash Qalıeva qatysty. Sońǵy eki jylda atqarǵan jumystaryn jipke tizgendeı qylyp baıandap bergen kitaphanashynyń sózi kópshilikti tánti etti. Osy baıqaýda ol 1 mln teńge kólemindegi báıgeni alyp qana qoımaı, Nur-Sultan qalasyndaǵy Ulttyq akademııalyq kitaphanada bir aıǵa tájirıbe almasý baǵytynda jumys isteý múmkindigine ıe boldy. Qarapaıym ǵana aýyl kitaphanashysy úshin budan zor baqyt bolar ma? Elordadan oljaly oralǵan áriptesterin Qulsary temirjol vokzalynan shashý shashyp qarsy alǵan kitaphanashylar da osy mereıli sátti bólisýge asyqqan.
– О́tken jyly Aqkıiztoǵaı aýyldyq kitaphanasynyń materıaldyq-tehnıkalyq bazasy jańartylyp, kovorkıng ortalyǵy ashyldy. Jergilikti ákimshiliktiń jańa ǵımaratynda ornalasqan kitaphana jaıly orynǵa aınaldy. Qashan barsańyz da aýyldyń úlken-kishisi Sandýǵashtyń janynda júrgenin kóresiz. Balabaqshamen, mekteppen birlesip, kovorkıng ortalyǵynda da túrli sharalar uıymdastyryp jatady, – deıdi Jylyoı aýdandyq ortalyq kitaphanasynyń basshysy Balzııa Kenjebekova. Kitaphanaǵa kelip, merzimdi basylymdarmen, jańa ádebıettermen únemi tanysyp otyratyn aýyl turǵyndary kovorkıng ortalyǵynda ýaqyttaryn tıimdi ótkizýge múmkindik aldy. Jergilikti halyq bir anyqtama úshin burynǵydaı aýdan ortalyǵyna baryp sharshamaıdy, osy ortalyqqa kelip, sharýalaryn retteı alady. Qashan da qaınaǵan tirliktiń ortasynda, birine anyqtama alýǵa járdemdesip, birine qajet ádebıetterin taýyp berip, birine jańa kitap týraly baıandap kitaphanashy Sandýǵashtyń júrgenin kóresiz. Biz kóbine úlken ister týraly ǵana aıtyp, osyndaı qarapaıym eńbek adamdaryn qaperimizden tys qaldyryp jatamyz. Eńbektiń úlken-kishisi joq. Bastysy, janyń qalaǵan, óziń jetik meńgergen mamandyqtyń naǵyz sheberi bolý. Aqkıiztoǵaı aýylynda osyndaı kitaphanashy turady.
ATYRAÝ
