Jıynǵa qatysqan Memlekettik qyzmet isteri agenttiginiń tóraǵasy Anar Jaıylǵanova, Prezıdent janyndaǵy Memlekettik basqarý akademııasynyń rektory Erlan Ábil, Prezıdenttik jastar kadrlyq rezervin irikteýdiń aqparattyq júıesin jasaýshy Dana Djakýpova ózderiniń kadrlyq rezerv komıssııasynyń músheleri ekenin de habarlady. Anar Jaıylǵanovanyń aıtýynsha, keminde 5 jyl jumys ótili bar, 35 jasqa tolmaǵan Qazaqstan Respýblıkasynyń joǵary bilimdi azamaty úmitker bola alady. О́tinish bildirýshiniń elde bolýy shart emes. Iаǵnı, sheteldegi jastarymyzdyń da baǵyn synaýǵa múmkindigi bar.
Tirkeý onlaın platformada júrgizilmek. Birneshe kezeńnen turatyn irikteýde úmitkerler aldymen testen ótip, esse jazady. Bul qatysýshylardyń oı-órisin, jazý qabiletin, aqparatty saraptaı alýy men jeke qasıetterin baǵalaýǵa múmkindik beredi. Alǵashqy kezeńnen súrinbeı ótkender beınejazbalar arqyly óz jobalaryn qorǵaıdy. Jobalardyń áleýmettik mańyzy bolýy shart. Ár kezeńniń baǵasy esepke alynyp, úmitkerge ortasha upaı qoıylady. Ozyp shyqqandarmen eksperttik komıssııa jeke kezdesý ótkizedi. Eń kóp ball jınaǵan qatysýshylardyń kandıdatýrasy Prezıdenttiń jastar kadrlyq rezerviniń Ulttyq komıssııasynyń otyrysynda belgili bolady.
Úmitkerlerdi irikteý júıesinde halyqaralyq standarttar paıdalanylady. Iаǵnı, komıssııa qatysýshynyń aty-jónin bilmeıdi, tek arnaıy kod arqyly tańdaıdy. Ol sandar ár kezeńde aýysyp otyrady. Anar Jaıylǵanova úmitkerlerge qazirden senimniń mol ekenin atap ótti. «Prezıdenttik jastar kadrlyq rezervin qurýdaǵy basty maqsat – jastar úshin tıimdi ári ashyq áleýmettik lıft qurý ekenin atap ótkim keledi. Bul azamattarǵa zor úmit artylyp otyr. Olar aldaǵy reformalardyń qozǵaýshy kúshi bolýy kerek. Prezıdenttik jastar kadrlyq rezervine irikteý erejesi men tártibi Prezıdent Jarlyǵymen retteldi», dedi ol.
Konkýrstyń negizgi kezeńderi bıylǵy qazanda ótedi. Alǵashqy testileý 12 qazanǵa belgilengen. Aqparatqa súıensek, ár kezeń tapsyrmasynyń oryndalý ýaqyty shekteýli. Jeke suhbattar qarashanyń sońyna josparlanǵan. Al Ulttyq komıssııanyń otyrysy 25 jeltoqsanda ótedi. Iаǵnı, úzdik jastar 2020 jyldan bastap jańa qyzmetterine kirise almaq.
Prezıdenttik jastar kadrlyq rezervin irikteýdiń aqparattyq júıesin jasaýshy Dana Djakýpova úmitkerlerdiń tizimi men olar týraly aqparat barlyǵyna ashyq bolatynyn aıtty. Tipti azamattarymyzdyń qatysýshy týraly pikir qaldyrýǵa da múmkindigi bolady.
Komıssııa músheleri konkýrstyń ádil ótýin baqylaý úshin qoǵam belsendileriniń shaqyrylatynyn habarlady.
