Jıynda álemdik jáne jergilikti ekonomıkalyq kórsetkishterdegi áıelderdiń róli týraly Prezıdent janyndaǵy Áıelder isteri jáne otbasylyq-demografııalyq saıasat jónindegi komıssııa tóraıymy Gúlshara Ábdiqalyqova baıandama jasady. G.Ábdiqalyqova Dúnıejúzilik banktiń málimeti boıynsha, áıelderdiń áleýetin tolyq paıdalanbaý saldarynan álem jylyna 30 trln AQSh dollary shamasynda qarjydan qaǵylyp otyrǵanyn nazarǵa alyp, progressıvti qoǵam áıelderdiń saıasatta, ekonomıkada jáne áleýmettik salada mańyzdy ról atqarýyna múddeli ekenin aıtty.
– Áıelderdiń múmkindik aıasyn keńeıtý úshin Prezıdent Jarlyǵymen Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy bekitildi, – dedi G.Ábdiqalyqova.
UKP Tóralqa tóraǵasy Tımýr Qulybaevtyń Kongress delegattaryna jetkizilgen úndeýinde bes jyl ishinde Keńes barlyq óńirler boıynsha isker áıelderdiń áleýetin shoǵyrlandyrýǵa qol jetkizgeni aıtyldy.
– Qazaqstan halyq banki jáne onyń jetekshisi Úmit Shaıahmetova áıelder kásipkerligin jyldyq 5-7%-ben jeńildikpen nesıeleý boıynsha birinshi bolyp bastama kóterdi. Osy sharaǵa 3 mlrd teńge bólinip, 340-tan astam bıznes-joba júzege asty. Ekinshi deńgeıli bankter men mıkroqarjy uıymdary qyzmetterinde arnaıy mehanızm ázirleý mańyzdy. Bul shara bıznes-ıdeıany júzege asyrýǵa qarjy bólý úshin kerek, – dedi T.Qulybaev.
«Atameken» UKP Isker áıelder keńesiniń tóraıymy Lázzat Ramazanovanyń aıtýynsha, sońǵy 5 jylda keńes músheleri 1500 is-shara ótkizip, oǵan 10 000-nan astam áıel qatysty. Byltyr Isker áıelder keńesiniń IV Kongresi sheńberinde О́ńirlik keńesterdiń jetekshileri Áıelder kásipkerligin qoldaý qoryn qurdy. Qor qurý barlyq kásipkerlerge ortaq – mıkroqarjy mehanızmi arqyly qarjylandyrý máselesin sheshedi. «Qazaqstan halyq banki» AQ-pen tıisti memorandýmǵa qol qoıyldy jáne kásipker áıelderdi jeńildikpen nesıeleýdiń alǵashqy baǵdarlamasy iske qosyldy. Qazaqstanda alǵashqy «ALTYN OIMAQ» kıim dızaınerleriniń ulttyq baıqaýy jáne elordada jýyrda ótetin Jeńil ónerkásibiniń alǵashqy forýmyn uıymdastyrý – kópshilik tarapynan qoldaý taýyp otyr.
Aýyldyq jerlerde áıelderdi oqytýy máselesi de óte mańyzdy. «Atameken» bıyl Azııa damý bankimen birlesip, Qazaqstannyń 8 óńirinde trenıngter ótkizgenin aıta ketý kerek.
Kongreske shet memleketterden de qadirli meımandar shaqyrylypty. Túrkııanyń Kaıserı qalasynan kelgen kásipkerlik odaqtyń tóraıymy Iljý Týgbahan baýyrlas elde áıelderge jańa tehnologııalardy ıgerýge, sonymen qatar ekonomıkalyq saýatyn jetildirýge qandaı kómek jasalatyny týraly aıtty. Qazirgi tańda odaq quramynda 7 myń túrik áıeli – óz salasynyń úzdikteri, kásipkerlik salasyndaǵy ǵalymdar, azamattyq qoǵam músheleri bar.
– Bizdiń odaq kásipker áıelderdiń elimizde sapa ári san jaǵynan ósýin qamtamasyz etý jáne olarǵa jan-jaqty qoldaý kórsetý saıasatyn ázirleý mıssııasyn qolǵa aldy. Biz ekonomıkalyq saıası jáne áleýmettik máselelermen jumys isteımiz. Seriktesterimiz birlesip ázirlep jatqan «Meniń ápkem» jobasy sheńberinde 9 300 áıeldi sıfrly saýattylyq, aqparattyq qaýipsizdik, qarjylyq saýat jáne qoldanbaly qarjy boıynsha oqyttyq. 2018 jyly «Atameken» UKP jáne Túrkııanyń isker áıelder keńesi kezdesý uıymdastyryp, birlesken ekonomıkalyq múddelerdi ilgeriletý jóninde kelisimge qol qoıdy, – dedi Iljý Týgbahan.
Jıynda Birikken Arab Ámirlikteri Isker áıelder keńesiniń prezıdenti Farıda al-Aýadı arab áıelderi damý jolynda kóptegen qıyndyqtarǵa tap bolatynyn aıtty.
– Biz arab áıelimen árdaıym maqtanamyz. Olar barlyq qıyndyqqa qaramastan, túrli kedergilerden ótip, ózine jol taba bildi. Arab áıeli – sheshim qabyldaýǵa múmkindigi bolǵan kezde tabysqa jete alady. Bizdegi isker áıelder qaýymynyń 200-den astamy álemde aıtýly jetistikke jetti – dedi Farıda al-Aýadı.
Kongress barysynda kásipkerlik salada ózindik orny qalyptasqan názik jandylar ózara tájirıbe almasyp, aldaǵy ýaqytta birlesip jumystar atqarýǵa nıetti ekenderin bildirdi.
