Qoǵam • 03 Qyrkúıek, 2019

Halyqpen únqatysýǵa ázir ekenin kórsetti

26 retkórsetildi

Memleket basshysy Qasym-Jomart Toqaevtyń Joldaýynda elimizdegi mańyzdy degen saıası, áleýmettik jáne ekonomıkalyq máseleler kóterildi. Bul turǵyda Prezıdent jańa reformalardyń tek reforma jasaý úshin ǵana emes, naqty nátıje úshin jasalýy kerektigin basa aıtty. Jáne jańa bastamalardyń kóshede emes, Parlament qabyrǵasynda qaralýy kerektigine toqtaldy.

Búgingi tańda azamattardyń saıası saýaty artqany, qoǵamda pikir alýandyǵy paıda bolǵany baıqalyp otyr. Memleket basshysy osy oraıda túrli pikirlerge ashyq, máseleni qoǵam bolyp talqylaýǵa daıyn ekendigin bildirdi. Qazir elimizde áleýmettik máseleler bar, problemany jasyrýdyń jóni joq. «Aýrýyn jasyrǵan óledi» degen bar. Sol sebepti, qordalanǵan máselelerdiń sheshimi Joldaýda aıtyldy. Mysaly, azamattardyń zeınetaqy jınaqtaryn páter alýǵa nemese bilim alýǵa paıdalanýyna ruqsat etýge qatysty Prezıdenttiń Úkimetke bergen tapsyrmasy halyqtyń qoldaýyna ıe bolatyny anyq. Bul birqatar áleýmettik máselelerdiń sheshimin tabýǵa múmkindik berer edi. Sonymen qatar atalǵan taqyrypty áli de talqyǵa salyp, qoǵammen aqyldasý kerek. Memleket basshysynyń tıisti zańnama boıynsha beıbit mıtıng ótkizýge ruqsat etý kerek degeni de bıliktiń halyqpen dıalog qurýǵa ázir ekenin kórsetti.

Jalpy, bul Joldaýdy tarıhı oqıǵa deýge negiz bar. Prezıdent Qazaqstannyń ekonomıkalyq-áleýmettik damýdyń jańa belesine shyqqanyn aıtty. Táýelsizdik jyldarynda elimiz aıtýly belesterdi baǵyndyrdy. Degenmen, áli de atqarylar jumystar az emes. Bul týraly ashyq jáne ádil aıtý kerek. О́zimizge ózimiz ótkir saýaldar qoıyp, aqylǵa qonymdy jaýap taba alǵanymyz jón.

Jańa kezeń Úkimetten jańasha joldy talap etedi. Búginge deıin Úkimet halyq úshin ne qajet ekenin jaqsy biledi degen pikir basym bolyp keldi. Mundaı jaǵdaı barlyq memlekettiń basynan ótken. Qazir ult bolyp uıysyp, birlese jumys isteıtin ýaqyt keldi.

Erlan Saırov,

áleýmettanýshy

Sońǵy jańalyqtar

Uqsas jańalyqtar