«Búgin men osy forýmǵa ózek bolatyn birqatar mańyzdy máselege toqtalǵym keledi. Jahandanýdyń shyǵystyq dástúri naqty sıpatqa ıe bolyp, keńeıe túsýde. Mysaly, qazir Uly Jibek jolynyń ekonomıkalyq mán-mańyzy ǵana kóbirek aıtylady. Shyn máninde onyń tutas órkenıetterdi toǵystyratyn kúshke ıe bolǵany eskerile bermeıdi. Búginde Azııanyń ozyq ekonomıkasymen birge ádebıeti, óneri, bilim júıesi de aldyńǵy qatarǵa shyqty», dedi Memleket basshysy.
Prezıdenttiń aıtýynsha, Azııa qalamgerleri forýmy shyǵarmashylyq qaýymnyń mańyzdy dıalog alańyna aınalýy kerek.
«Bul mańyzdy shara Azııa elderinde qýatty túrde ótýi qajet dep sanaımyn. Adamzatty tolǵandyrǵan kúrdeli máseleler dál osyndaı alańdarda ortaǵa salynýy tıis. Azııany búkil álemdik rýhanı damý ortalyǵy retinde damytý aıryqsha mańyzdy. Sondyqtan, ádebı úderisterdi jańǵyrtý úshin jaǵdaı jasaý basty mindetterdiń biri. Osy maqsatta «Azııa alyby» ádebı syılyǵyn taǵaıyndaǵan jón. Álemdegi áıgili syılyqtar sekildi bul marapattyń da bedelin arttyrýǵa kúsh salýymyz kerek», dedi Q. Toqaev.
Sondaı-aq Prezıdent Azııa qalamgerleri týyndylarynyń biryńǵaı platformasyn qurý jaıyna toqtaldy.
«Azııa qalamgerleri týyndylarynyń birtutas elektrondy kitaphanasyn quratyn ýaqyt jetti. Bul Azııanyń teńdessiz dúnıetanymy jınaqtalǵan baǵa jetpes asyl qazynanyń esigin jer júzine aıqara ashatyn qundy dúnıe bolary sózsiz. Osyndaı ıgi bastamalardy iske asyrý jumysy – qalamgerlerimizdi biriktirip, Azııa ádebıetin jańa beleske shyǵarady dep senemin. Búgingi forým jumysyn tabys tileımin», – dedi el Prezıdenti.
