N. Nyǵmatýlın aldymen eki kún buryn Memleket Basshysy Qasym-Jomart Kemeluly Toqaevtyń kezekti sessııany ashyp, Parlament qabyrǵasynda óziniń tuńǵysh Joldaýyn jarııalaǵanyna nazar aýdardy. Palata Spıkeri:
- Memleket Basshysy Qasym-Jomart Kemeluly Toqaev óz Joldaýynda Elbasymyz Nursultan Ábishuly Nazarbaevtyń saıasatyn jalǵastyra otyryp, Qazaqstanymyzdy odan ári damytýdyń negizgi maqsattaryn belgilep berdi. Olardyń barlyǵyn zań jaǵynan qoldaý úshin depýtattyq korpýstyń aldynda da jaýapty mindetter tur. Sol úshin sessııa barysynda, biz, óz ýaqytynda, halyqqa qajetti, sapaly zańdar qabyldaıtyn bolamyz,-dedi.
Osy jaýapty mindetti abyroımen atqarý úshin búginnen bastap belsene iske kirisý qajettigin eske salǵan Májilis Tóraǵasy ásirese, ekonomıkany jańǵyrtýǵa áleýmettik ahýaldy kúsheıtýge, bıýdjet jáne salyq júıesin jetildirýge, azamattardyń quqyqtary men bostandyqtaryn qorǵaýǵa, shaǵyn jáne orta bıznesti qoldaýǵa, ekologııalyq máselelerge basqa da suraqtarǵa erekshe kóńil bólinetinin atap ótti.
Odan ári depýtattar nazaryna Armenııamen Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly úkimetaralyq kelisimdi ratıfıkasııalaý týraly zań jobasy usynyldy.
2018 jylǵy 12 qyrkúıekte Almatyda jasalǵan bul kelisim azamattyq qorǵanys, tótenshe jaǵdaılardyń aldyn alý jáne olardy joıý salasynda Qazaqstan men Armenııa úkimetteriniń quzyretti organdary yntymaqtastyǵynyń quqyqtyq negizderin belgileýge baǵyttalǵan.
Sonymen qatar, osy kúni birqatar mańyzdy qujattar jumysqa alyndy. Olardyń qatarynda «Astana» halyqaralyq qarjy ortalyǵy týraly» Konstıtýsııalyq zańǵa túzetýler engizýge qatysty konstıtýsııalyq zań jobasy, Ulttyq qordan 2020 – 2022 jyldarǵa arnalǵan kepildendirilgen transfert týraly, respýblıkalyq jáne oblystyq bıýdjetter, respýblıkalyq mańyzy bar qalalar, astana bıýdjetteri arasyndaǵy 2020 – 2022 jyldarǵa arnalǵan jalpy sıpattaǵy transfertterdiń kólemi týraly, 2020 – 2022 jyldarǵa arnalǵan respýblıkalyq bıýdjet týraly zań jobalary bar.
Sondaı-aq «Pedagog mártebesi týraly» jáne oǵan ilespe zań jobasy, eńbek, týrıstik qyzmet máselelerine qatysty túzetýlerge arnalǵan zań jobalary boıynsha jáne qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha túzetýlerge qatysty qorytyndy ázirleý merzimi belgilendi.
Osy kúni depýtattar birqatar ratıfıkasııalyq zań jobalaryn da jumysqa aldy. Atap aıtsaq, olar: Brazılııamen qylmystyq ister boıynsha ózara quqyqtyq kómek týraly, Mońǵolııamen sottalǵan adamdardy berý týraly sharttardy, О́zbekstanmen Zańsyz kóshi-qonǵa qarsy kúrestegi yntymaqtastyq týraly, Túrkııamen áskerı yntymaqtastyq týraly kelisimderdi ratıfıkasııalaý týraly, sondaı-aq Shanhaı yntymaqtastyq uıymynyń ekstremızmge qarsy is-qımyl jónindegi konvensııasyn, 2014 jylǵy 29 mamyrdaǵy EEO shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkasııalaý týraly, Reseımen «Baıqońyr» keshenin jalǵa berý shartyna ózgeris engizý týraly úkimetaralyq hattamany jáne «Baıqońyr» keshenin gazben jabdyqtaý týraly kelisimdi, Armenııamen Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkasııalaý týraly zań jobalary.
Jalpy otyrysta Májilis depýtattary Baqtııar Mákenniń, Gúlnar Iksanovanyń ókilettigin merziminen buryn toqtatý týraly Qaýly qabyldanyp, partııalyq tizimmen «Nur Otan» partııasynyń atynan jańadan saılanǵan depýtattar Gúlshara Ábdiqalyqovanyń, Nurjan Áshimbetovtiń jáne Juldyz Omarbekovanyń ant berý rásimi ótti.
Aıta keteıik, Gúlshara Ábdiqalyqova Májilis Tóraǵasynyń usynysymen Áleýmettik - mádenı damý komıtetiniń tóraıymy bolyp saılandy.
Al, Nurjan Áshimbetov Agrarlyq máseleler komıtetiniń, Juldyz Omarbekova Zańnama jáne sot - quqyqtyq reforma komıtetiniń quramyna saılandy.
