Prezıdenttiń Joldaýynda birqatar memlekettik baǵdarlamalardyń operatory retindegi «Báıterek» holdınginiń qyzmetine yqpal etetin birqatar tarmaq bar.
Birinshiden, búginde memleket shaǵyn jáne orta bızneske úlken qoldaý kórsetýde. Mysaly, bizdiń enshiles uıymymyz «Damý» kásipkerlikti damytý qory paıyzdyq mólsherlemeni sýbsıdııalaý jáne kredıtke kepildik berý quraldaryn usynady. «Bıznestiń jol kartasy - 2020» memlekettik baǵdarlamasyn iske asyrý barysynda shamamen 14,5 myńǵa jýyq jobaǵa jalpy somasy 2,5 trln teńge sýbsıdııalandy.
Memleket basshysy jańa jobalarǵa basymdyq bere otyryp, shaǵyn jáne orta bıznesti memlekettik qarjylyq qoldaý júıesin «qaıta qalpyna keltirý» qajet dep atap ótti. Úkimetke jańa «Bıznestiń jol kartasy» sheńberinde aldaǵy úsh jylda osy maqsatqa 250 mıllıard teńge bólýdi tapsyrdy. Bizdiń damý ınstıtýttarymyz bul jumysqa belsendi qatysatyn bolady.
Ekinshiden, Prezıdent eksporttyq kompanııalardy memlekettik qoldaýdyń tıimdiligin arttyrý qajettigin atap ótti. Bul oraıda, «KazakhExport» eksporttyq saqtandyrý kompanııasy men Qazaqstannyń damý banki tabysty jumys atqaryp jatqanyn atap ótkim keledi. Máselen, 2014-2018 jyldary KazakhExport 152 eksporttaýshyǵa qoldaý kórsetti. Qabyldanǵan mindettemeler kólemi 173 mlrd teńge bolyp, eksporttyq kelisimsharttardyń somasy 841 mlrd. teńgeni qurady. QDB 2015 jyldan 2018 jylǵa deıingi kezeńde eksporttaýshylarǵa qoldaý kórsetý úshin qaıta ıgerýdi eskere otyryp, eksportqa deıingi qarjylandyrý arqyly 425,5 mlrd. teńge usyndy.
Sonymen birge, Holdıng Memleket basshysynyń kásipkerlerdiń osy segmentin memlekettik qoldaýdyń tıimdi sharalarynyń joqtyǵy jónindegi eskertýlerimen jumys jasaýda. Eń aldymen, ónimder alý salasynda. Yqtımal ımporttaýshylardy izdeýde eksporttaýshylarǵa kómek kórsetý jáne sheteldik naryqtarǵa baǵdar alý máselesi boıynsha KazakhExport óziniń sheteldik ókildikterin ashýda. Qazirgi ýaqytta kompanııanyń Qazan (Reseı), Tashkent (О́zbekstan), Sıan (Qytaı) jáne Dýshanbe (Tájikstan) qalalarynda ókilderi bar. 2019 jyldyń sońynda Máskeý, Novosıbırsk, Mınsk jáne Bishkek qalalarynda ókildikter ashý josparlanýda.
Úshinshiden, Prezıdent Úkimetke eldegi turǵyn úı qurylysynyń biryńǵaı modelin jasaýdy, ózara sáıkes emes baǵdarlamalardy qabyldaý tájirıbesinen alshaq bolýdy tapsyrdy. Bul qajetti shara dep esepteımin. Buǵan deıin «Báıterek» holdıngi qajetti ınjenerlik, áleýmettik jáne kommersııalyq ınfraqurylymy bar turǵyn úıdi salý máselelerin jan-jaqty qarastyratyn Biryńǵaı operator qurý ıdeıasyn usynǵan bolatyn.
Tórtinshiden, Memleket basshysy QR Tuńǵysh Prezıdenti - Elbasy Nursultan Nazarbaevtyń bastamasymen qolǵa alynǵan jańa «Baqytty Otbasy» baǵdarlamasyna erekshe toqtaldy. Jyl sońyna deıin keminde 6 myń otbasy osy baǵdarlama boıynsha jeńildikti sharttarmen baspana satyp alady. Birinshi kezekte, kóp balaly jáne múmkindigi shekteýli balalardy tárbıelep otyrǵan otbasylar. 2020 jyldan bastap osyndaı 10 myń otbasy jyl saıyn baspanamen qamtamasyz etiletin bolady. Bul mindet bizdiń enshiles uıym - Qazaqstannyń turǵyn úı qurylys jınaq bankiniń moınynda. Biz sonymen qatar baǵdarlamaǵa qatysý úshin naqty krıterıılerdi anyqtaýǵa jáne ony qatań basqarýdy qamtamasyz etýge qatysatyn bolamyz.
Qorytyndylaı kele, Memleket basshysynyń Úkimetke júktegen mindetterin iske asyrý «Báıterek» holdıngi men onyń enshiles uıymdarynyń tikeleı qatysýy men jumys isteýin talap etetinin atap ótkim keledi. Biz alǵa qoıylǵan mindetterdi tıimdi oryndaý úshin bar kúshimizdi salatyn bolamyz.
Aıdar ÁRIPHANOV,
«Báıterek» UBH» AQ Basqarma tóraǵasy
