Jıynda ýnıversıtet ǵalymdary men jastary Prezıdent Joldaýy boıynsha kópshilik aldynda baıandama jasap, óz oılaryn ortaǵa saldy.
– Prezıdent janynan arnaıy uıym qurylatyn boldy. Ol uıym negizinen halyqpen tikeleı baılanysyp otyrady. Demek bılik halyqqa jaqyndaı túsedi degen sóz. Bul memlekettik basqarýdaǵy jańasha baǵyt. «Aýylym altyn besigim» atty joba búginde óte jaqsy jumys bastap jatyr. Keleshegi de zor bolady. Sebebi joǵarǵy bılik aýylymyzǵa jaqyndaı túsýde. Aýyl kórkeıse aýylsharýashylyq salasy da kórkeıetini sózsiz. Sebebi halqymyzdyń 42 paıyzy áli de bolsa aýyldyq jerlerde turyp jatyr. Mine, biz osy bir qundylyqtarymyzdan aıyrylyp qalmaýymyz kerek. Aýyl kóterilmeı, ekonomıka damymaıdy! Bul – fakt. Aýyldy jerlerdi damytý men qosa aýyl sharýashylyǵy salasyna da erekshe mán berýimiz kerek. Oǵan bilim ordalary da tıisti deńgeıde atsalysamyz. Atap aıtar bolsaq Prezıdent jer máselesi tóńireginde naqty tapsyrmalar berdi. Bizdiń sala boıynsha basty qundylyǵymyz da osy jer. Jerdi tıimdi paıdalaný basty mindet. Ol úshin ǵylymdaǵy jańa múmkindikterdi de tıimdi paıdalanýymyz qajet. Mysaly, bizdiń bazamyzda ǴAJ ortalyǵynyń (Ǵaryshtyq aqparattyq júıeler) múmkindigi zor. Osy bir múmkindikti utymdy paıdalanýdyń qyr-syryn jer paıdalanýshylarǵa túsindire berýimiz qajet. Eń aldymen sapaly maman daıarlap shyǵarý mindetine jiti mán beriletin bolady. Tapsyrmaǵa saı qazir joǵary oqý oryndarynyń aldynda úlken mindet tur, - dedi ýnıversıtet rektory Aqylbek Kúrishbaev.
Joldaýdyń «Áleýmettik jańǵyrýdyń jańa kezeńi» dep atalatyn IV taraýynda bilim salasynyń búgingi ahýaly men qoıylatyn talaptarǵa basymdyq berilgen bolatyn. Atalmysh sala boıynsha QazATÝ-niń birinshi prorektory A.M.Ábdirov «JOO-ǵy bilim berý máselelerine toqtaldy. Ol bilim berýdegi praktıkalyq daıyndyqty synǵa aldy.
– Stýdentterdiń praktıkalyq daıarlyǵyn ýnıversıtet qabyrǵasynda joǵary deńgeıde uıymdastyrý qajet. Sebebi bolashaq maman óndiriste qaýqarly bolýy kerek,– dedi ol. A.M.Ábdirov Qasym-Jomart Toqaevtyń Qazaqstan halqyna arnaǵan Joldaýynda aıtylǵan «Dıplommen aýylǵa!» baǵdarlamasyn odan ári jetildirip, múmkindiginshe osy baǵytqa basymdyq berý kerektigin aıtty.
Atalǵan ýnıversıtet ýnıversıtet «Akademııalyq adaldyq lıgasynyń» aıqyn maqsattaryna sáıkes bilim sapasyn jaqsartýdy qolǵa alyp otyr. Endigi kezekte ýnıversıtet ákimshiligi oqytýshylar nemese stýdentterdiń bilim salasyna sáıkes erejelerdi buzǵan zańsyz is-áreketterin nazarda ustamaq.
Joldaýdy taldaý barysynda oqý ornynyń stýdentteri de nazardan tys qalǵan joq. Olardyń pikirinshe, olar úshin múmkindikterdiń jańa kókjıegi ashylyp otyr. Atap aıtqanda, «Agronomııa» fakýltetiniń 2-kýrs stýdenti Aqjan Baýyrjanqyzy aldymyzdaǵy jyldyń «Eriktiler jyly» bolyp atalǵanyna qýanyshty. Osy oraıda barlyq jastardy óz bilimderin shyńdap, elimizdiń damýyna úles qosýǵa shaqyrdy.
