«Elimizdiń qoǵamdyq-saıası ómirin jańǵyrtpaı, tabysty ekonomıkalyq reformalardy iske asyrý múmkin emes. Bul – bizdiń ustanatyn basty qaǵıdatymyz», – degen Memleket basshysy «Kúshti Prezıdent – yqpaldy Parlament – esep beretin Úkimet» formýlasyn usyna otyryp, «Halyq únine qulaq asatyn memleket» tujyrymdamasyn iske asyrý – bárimizge ortaq mindet ekenin túıindedi.
Jaqynda qurylyp, jumys isteı bastaǵan Ulttyq qoǵamdyq senim keńesi halyqpen tyǵyz baılanys ornatý, qoǵamdyq dıalog, ashyqtyq, adamdardyń muń-muqtajyna jedel nazar aýdarýdy basty baǵytyna aınaldyra bilse, osy tujyrymdamany iske asyrýǵa muryndyq bolýǵa tıisti birden-bir tetikke aınalar edi.
Joldaýda kódedeı kóp sheneýnikter men ulttyq kompanııalar sanyn birtindep azaıtyp, bes jylda 25 paıyzǵa qysqartý, qazaq tiliniń memlekettik til retindegi rólin kúsheıtip, ultaralyq qatynas tiline aınaldyrý, ǵulamamyz ál-Farabıdiń 1150 jyldyq, uly oıshyl aqynymyz Abaı Qunanbaıulynyń 175 jyldyq mereıtoılaryn laıyqty, ysyrapsyz atap ótý, Altyn Ordanyń 750 jyldyǵyn tól tarıhymyzǵa, mádenıetimiz ben tabıǵatymyzǵa álem nazaryn aýdartarlyqtaı deńgeıde ótkizý týraly baılamdary kóńilge qondy.
Bizdiń bárimizdi tolǵandyryp júrgen jer máselesine arnaıy toqtalyp: «Memleket basshysy retinde taǵy da málimdeımin: jerimiz sheteldikterge satylmaıdy. Oǵan jol berilmeıdi!» dep kesip aıtqany kókeıdegi úlken túıtkilge núkte qoıǵandaı boldy.
Alty Alashtyń tamyry – aýylda. Aýyl bizdiń ádet-ǵuryp, salt-sanamyzdyń, ulttyq órkenıetimizdiń qaınar kózi, ýyzdy uıasy. Aýyldyń ýyǵy qulap, keregesi qısaısa – bizdiń qabyrǵamyz qaıysady. Sondyqtan da, Prezıdenttiń óz Joldaýynda: «Úkimetke «Aýyl – el besigi» jobasyn júzege asyrý úshin bıyl bólingen 30 mıllıard teńgege qosymsha aldaǵy úsh jyl ishinde 90 mıllıard teńge bólýdi tapsyramyn» degeni, sonymen qatar, aýyldy jaqsy joldar salyp, aýyz sý jáne gazben, qoǵamdyq kóliktermen qamtamasyz etý sııaqty kókeıkesti máselelerdi sheshýmen birge mektep, aýrýhana, sport alańdaryn salýǵa jáne jóndeýge qarjy bóletini kóńilden shyqty.
Joldaýda qazirgi mektep oqýlyqtarynyń sapasynyń tómendigine nazar aýdaryp, oqýshylardy sapaly oqýlyqtarmen qamtamasyz etýge Bilim jáne ǵylym mınıstrligin tikeleı mindetteýi de kóptiń kútken sheshimi der edim. Sondaı-aq buǵan deıin bıliktiń kózinen qaǵa beriste, tysqary qalyp kelgen mádenıet qyzmetkerlerin qoldaý máselesine bul Joldaýda basa nazar aýdaryldy. Eń aldymen, kitaphana, mýzeı, teatr qyzmetkerleriniń jalaqysyn kóbeıtý jáne sol arqyly jas mamandardyń jeńildigi bar turǵyn úı baǵdarlamalaryna qatysýyn qamtamasyz etýdi qolǵa alýy óte oryndy boldy.
Memleket basshysy aldaǵy jyldan bastap, kóp balaly jáne múgedek balalar tárbıelep otyrǵan otbasylardy baspanamen qamtý, shyn mánindegi járdem men qoldaýǵa zárý, kómekke muqtaj jandarǵa ǵana jedel qoldaý kórsetý maqsatynda: «kezekte turǵan az qamtylǵan kóp balaly otbasylarǵa baspana berý máselesin úsh jyl ishinde sheshý kerek!» dep, Úkimetke tikeleı tapsyrma berýi kóp jaıdy ańǵartady.
Joldaýdaǵy áleýmettik salaǵa qosymsha qarjy bólgizý, shaǵyn bıznesti salyqtan bosatý, úsh jylǵa deıin tekserýden qutqarý, beıbit jıyn ótkizýge ruqsat berý, ulttyq qordy tıimdi paıdalaný, qarapaıym adamdardyń zeınetaqy qoryndaǵy qarjysyn ózderi paıdalanýyna múmkindik berý týraly aıtqandary kóńilge qonymdy boldy.
Qysqasy, Prezıdent Toqaevtyń Joldaýdaǵy tujyrymdary elimizdiń búgini men bolashaǵy úshin izgilikti de ıgilikti baǵyttar usynýymen qundy ekeni anyq. Endi bul tapsyrmalardy iske asyrý jáne oryndalýyn qadaǵalaý atqarýshy oryndarǵa syn.
Ulyqbek ESDÁÝLET,
Memlekettik syılyqtyń laýreaty
