Onyń aıtýynsha, usynylǵan ınvestısııalyq jobalardan basymdyq qazaqstandyq qamtýy joǵary, Qazaqstan azamattary úshin barynsha kóp jumys oryndaryn qurýdy qamtamasyz etetin joǵary tehnologııalyq jobalarǵa beriledi. J. Qasymbek birlesken qazaqstandyq-qytaılyq jobalar jańa jobalar ekenin, aldaǵy 5-6 jylda barlyǵy iske asyrylatynyn jetkizdi.
«Osy zaýyttar, jańa jobalar Qazaqstan aýmaǵyna kóshiriletin «taza emes», eski jobalar degen sıpatta áńgimeler aıtylyp júr. Resmı túrde málimdeımin: eshqandaı eski zaýyt nemese Qazaqstan aýmaǵyna kóshiriletin zaýyt joq. Bul jobalardyń barlyǵy jańa jobalar», — dedi J. Qasymbek.
Onyń aıtýynsha, jýyrda ǵana Qapshaǵaı mańynda balamaly energetıka elektr stansııasy ashyldy (kún energetıkasy), onda 30 adam jumys isteıdi, olardyń barlyǵy — Qazaqstan azamattary.
«Bul balamaly energetıka – asa jańa joba. Biz birtindep oǵan kóshetin bolamyz. Qazaqstanda jyl sońyna deıin jel men kún esebinen 1000 megavatt qýat óndiriletin bolady. Bul álemdik betalystan biz bas tarta almaımyz. Barlyq aqparat ǵalamtorda, IIDM saıtynda bar. Bul jerde eshqandaı qupııa joq. Taǵy da aıta ketkim keledi, bul – jańa tehnologııalar, bir eldiń aýmaǵynan ekinshi eldiń aýmaǵyna kóshiriletin eshqandaı “taza emes” nemese eski kásiporyndar joq. Barlyq jobalar jańa. Jalpy, biz osy kásiporyndar jumysy aıasynda 20 myńǵa deıin jańa jumys oryndaryn qurýdy josparlap otyrmyz», — dep túsindirdi QR Premer-Mınıstriniń orynbasary.
J. Qasymbektiń málimdeýinshe, búginde 15 Qazaqstan – Qytaı jobasy iske asyrylǵan, jyl sońyna deıin taǵy 5 joba júzege asyrylmaq.
«Atalǵan jobalardyń elimizde qolǵa alynǵanyna birinshi jyl bolyp turǵan joq. Búginde 15 joba iske asyrylǵan. 20-ǵa jýyq joba belsendi iske asyrylý satysynda tur. Sońǵy jyldary qytaılyq ınvestısııalar úlesi bir deńgeıde saqtalyp tur – 5-6%. Esh ózgeris bolmady», — dep ol, jobalar mashına jasaý, ónerkásip, kólik, agroónerkásip kesheni, energetıka salalarynda iske asyrylyp jatqanyn atap ótti.
Budan ózge, J. Qasymbek ekologııalyq talaptarǵa saı kelmeıtin bir de bir zaýyt Qazaqstanda salynbaıtynyn aıtty.
