Munaı-gaz salasy – ulttyq ekonomıkanyń negizgi qozǵaýshy kúshi. Bul baǵytta atqarylǵan sharýa az emes. Sarapshylar Qazaqstandy Eýrazııa keńistigindegi gaz tasymalynyń haby dep beker baǵalamasa kerek. Máselen, sońǵy bes jyl ishinde elimizdiń 3 mln-nan astam turǵyny kógildir otynǵa qosyldy. Jańa magıstraldy gaz qubyrlary salynyp, shıkizat eksportynan memleket bıýdjetine mıllıardtaǵan qarjy túsip jatyr deıdi kompanııa ókilderi. Aǵa býynmen ıyq tiresip, turǵyndardy kógildir otynmen qamtýda jastar da jemisti eńbek etip keledi. Qazirgi tańda «QazTransGaz» kompanııalar tobyndaǵy jas qyzmetkerlerdiń úlesi – 30%.
«Intergaz Ortalyq Azııa» kompanııasynyń bas dırektory Valentın Hvan bul salany tabandy minezge ıe, eńbeksúıgish jáne kásibine adal jandar ǵana tańdaıtynyn aıtyp, jastar aǵa býynnyń tabysty jolyn eseleıtinine senim bildirdi.
– Barshaǵa málim, bıylǵy jyl Jastar jyly dep jarııalandy. Búginde jas mamandar – gaz salasyndaǵy eńbek resýrsynyń ajyramas mańyzdy bóligi. Osyny eskerip, jas kadrlardy qoldaý boıynsha barlyq jaǵdaıdy qarastyryp kelemiz. Buǵan osy jastar sleti dálel. Atalǵan basqosý mazmundy pikirler, qyzyqty kezdesýler jáne perspektıvalyq ıdeıalardy damytýǵa qatysty bastamalarmen este qalady degen senimdemin. Qolǵa alynǵan sharamyz Qazaqstandaǵy munaı-gaz salasy mamandarynyń kásibı merekesi men otandyq munaı óndirisiniń 120 jyldyǵy aıasynda ótip jatyr. Barlyq áriptesimdi shyn júrekten quttyqtaımyn. Munaı-gaz salasynyń ardagerlerine bas ıip, qurmet bildiremin. Slet qatysýshylaryna jumystary tabysty bolsyn dep tileımin! Igi dástúrdi jalǵastyryp, ozyq tájirıbeni jáne búgingi energııany bolashaq úshin tıimdi paıdalanasyzdar degen úmitim basym, – dedi V.Hvan.
200-ge jýyq jas mamannyń basy qosylǵan quryltaıda munaı-gaz salasynyń kánigi sheberleri, sondaı-aq kompanııanyń top-menedjerleri kásibı biliktilikterimen bólisip, eńbek ónimdiligin arttyrýdyń utymdy joldaryn kórsetti.
Álimjan Balmuhanov osy salaǵa 25 jasynda kelipti. Jas maman tabandylyǵy men alǵyrlyǵy arqasynda az ýaqytta qatardaǵy qyzmetkerden basshylyq laýazymyna deıin kóterildi. Qazir ol aksıonerlik qoǵamnyń Oraldaǵy jelilik-óndiristik bólimshesiniń basshysy. Desek te ony qyzmettik mansaptan buryn budan da bıik murat jetelegen. Batys Qazaqstannyń týmasy kúlli elimizdi ortalyqtandyrylǵan gazǵa qosyp, halyq kógildir otynnan tarshylyq kórmese eken deıdi.
– Basshylyq tarapynan jastarǵa kásibı turǵyda ósý úshin jan-jaqty jaǵdaı qarastyrylǵan. О́zim jetekshilik etetin Oraldaǵy jelilik-óndiristik bólimshesinde 214 qyzmetker bolsa, sonyń 30%-y jastar. Tájirıbe almasý maqsatynda sheteldik kompanııalarmen de áriptestik baılanys jolǵa qoıylǵan. Olardyń qatarynda reseılik jáne qytaılyq munaı-gaz uıymdary bar. «QazTransGaz» kompanııalar tobyndaǵy 3 myńnan asa jas qyzmetkerdiń atynan jáne jeke óz atymnan jastarǵa qoldaý kórsetip, qyzmette ósip-ónýge múmkindik bergen basshylarymyzǵa alǵys aıtamyz, – dedi Á.Balmuhanov
Forýmnyń baǵdarlamasyna sáıkes paneldik otyrystar, sheberlik saǵattary, ınteraktıvti oıyndar, sol sekildi tımbıldıng uıymdastyryldy. Ásirese sheberlik saǵaty qatysýshylardyń kóńilinen shyqqany baıqaldy. Sebebi osy jıynǵa oraı áıgili bıznes-jattyqtyrýshy, adamı resýrsty tıimdi damytýdyń mamany Andreı Levchenko arnaıy shaqyryldy. Tanymal mentor human resources baǵytyndaǵy ózekti máselelerdi qaýzap, qyzmette ilgerileýdiń ońtaıly joldaryn usyndy.
Al «Galstýksyz kóshbasshy» paneldik sessııasynda jas mamandar jetekshi menedjerlermen emin-erkin pikir almasýǵa múmkindik aldy. Budan bólek «Innovasııalar men startaptar» sessııasy sheńberinde qatysýshylar ozyq úlgidegi 9 avtorlyq jobany usyndy. Olardyń úzdikterin arnaıy komıssııa anyqtaıdy. Jeńimpazdardyń jumysy «QazTransGaz» kompanııasynyń Ǵylymı-tehnıkalyq keńesine usynylyp, óndiriske engiziledi dep josparlanýda.
