Alty jylda konkýrsqa 15 197 otbasy qatysqan. Olardyń 62%-y aýyldyq jerlerdegi otbasylar bolsa, 36%-y kóp balaly otbasylar bolǵan. Al jas otaýlar 18%-yn, atadan balaǵa bir mamandyqty jalǵastyrǵan eńbekkerlerdiń shańyraǵy 17%-dy quraǵan. Aqparat jáne qoǵamdyq damý mınıstrliginiń qoldaýymen, Mádenıet jáne sport mınıstrligi, jergilikti atqarýshy organdardyń uıymdastyrýymen ótetin konkýrs birneshe kezeńnen turady. «Mereıli otbasy» ulttyq konkýrsynyń laýreatyn anyqtaý jyl saıyn qyrkúıektiń ekinshi jeksenbisi atap ótiletin Otbasy kúnine oraılastyrylady. Bıyl da óńirlik konkýrstardan qara úzip kelgen 17 jeńimpaz erteń Nur-Sultan qalasynda saltanatty marapattaý rásimine qatysady.
Baspasóz máslıhatynda sóz alǵan Parlament Senatynyń depýtaty, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasary Lázzat Súleımen otbasy qundylyǵyn arttyrýda Ulttyq komıssııa tarapynan atqarylyp jatqan jumystardyń bir parasyna toqtaldy. «Memleket basshysy Qasym-Jomart Toqaevtyń 2 qyrkúıekte halyqqa joldaǵan «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda memleket tarapynan otbasy ınstıtýtyn qoldaý, ana men balaǵa basa kóńil bólý týraly aıtyldy. El Prezıdenti kóp balaly jáne az qamtylǵan otbasylardy áleýmettik qoldaýdyń keshendi sharalaryn usyndy jáne otbasylyq bıznes ashý, ony qarjylandyrý máselesi boıynsha Úkimetke naqty tapsyrmalar berdi. Ulttyq komıssııa otbasy ınstıtýtyn nyǵaıtýǵa baǵyttalǵan jumystardyń óńirlerde de júıeli túrde júrgizýine yqpal etip otyrady. Sondaı-aq bala tárbıesindegi ata-ana jaýapkershiligin birdeı arttyrý, sonyń ishinde qoǵamda áke abyroıyn nyǵaıtý, úlgili ákelerdi nasıhattaý máselesin de qazir alǵa qoıyp otyr. Osy turǵyda bala tárbıesinde ákeniń bedelin, halqymyzdyń dástúrli tárbıesindegi ákeniń basty ornyn asa belsendi ákelerdiń kúshimen qurylǵan respýblıkalyq Ákeler odaǵy qoǵamdyq birlestigimen birlesip atqaryp otyr. Bul qoǵamnyń bólimsheleri óńirlerde de qurylyp jatyr. Qazaq halqy «Otan – qýat, otbasy – shýaq» dep eki uǵymdy shendestire sýretteıdi. Kóptegen qoǵamdyq uıymdarmen birlesip jumys istep otyrmyz. Olardyń qanatyn keńge jaıýyna yqpal etýimiz kerek. Sonda ǵana qoǵamda oryn alyp jatqan kóptegen keleńsizdikterdiń aldyn alýǵa múmkindikter bolady», dedi ol.
