2014 jylǵy Reseı men Ýkraına arasyndaǵy shıelenisken geosaıası ahýaldan keıin Reseı Ýkraınanyń taýarlaryn óz aýmaǵy arqyly Ortalyq Azııaǵa tasymaldaýǵa tyıym salǵany belgili. Nátıjesinde Qazaqstan men Ýkraına arasynda saýda aınalymy 2014 jylǵy 4,6 mlrd dollardan 4,5 ese qysqaryp, 2018 jyly 1 mlrd dollardy ǵana quraǵan. Máselege alańdaýshylyq bildirgen Ýkraınanyń Qazaqstandaǵy elshisi Ivan Kýleba bıznesti Qazaqstan men Ýkraına arasyndaǵy ekonomıkalyq yntymaqtastyq prosesine tartý qajettigin atap ótti. «Bul áreketter eki el arasyndaǵy ekonomıkalyq yntymaqtastyq prosesin kúsheıtedi. Ýkraınalyq bıznes Qazaqstan Úkimetiniń reformalaryn tolyq qoldaıdy. Búgingi tańda Qazaqstanda ınvestısııa tartý úshin eń qolaıly jaǵdaılar jasaldy. Elde qoljetimdi jeńildikter paketi ýkraınalyq bıznes úshin, onyń ishinde qazaqstandyq seriktestermen birlesken kásiporyndar qurý úshin tartymdy. Ýkraınalyq kompanııalar osy baǵyttaǵy qazaqstandyq bıznestiń seriktesi bola alady», degen elshi eki eldiń ekonomıkalyq yntymaqtastyǵyna bıznesmenderdi kóptep tartyp, aradaǵy alys-beristi qaıta jandandyrýǵa múddeli ekenin bildirdi. Sonymen qatar I.Kýleba ózara taýar tasymaldaýdaǵy qıyndyqty aınalyp ótýdiń bir joly birlesken kásiporyndar ashyp, óndiristi birge qolǵa alý ekenin jetkizdi.
«Kazakh invest» UK» AQ Basqarma tóraǵasynyń orynbasary Ǵalym О́zbekov shara barysynda ınvestısııalyq, saýda-ekonomıkalyq salalardaǵy ózara tıimdi yntymaqtastyqty odan ári tereńdetýge jáne damytýǵa úlken kóńil bólingenin málimdedi. «Qazaqstan úshin Ýkraına – mańyzdy strategııalyq seriktesterdiń biri. Biz ınvestısııa salasyndaǵy yntymaqtastyq áleýetin odan ári arttyrýǵa umtylamyz. Ol úshin barlyq qajetti tetik bar. Búgingi tańda Qazaqstannyń ınvestısııalyq áleýeti joǵary deńgeıde, Ortalyq Azııadaǵy tikeleı ınvestısııa tartý boıynsha kóshbasshy», dedi Ǵ.О́zbekov.
Aıta keteıik, Ýkraınadan Qazaqstanǵa tikeleı sheteldik ınvestısııa aǵyny 2005 jylǵy 0,8 mln dollardan 2018 jyly 53,4 mln dollarǵa deıin ósti. Al 2019 jyldyń birinshi toqsanyna bul kórsetkish 14,2 mln dollardy qurady. Jalpy, 2005-2019 jyldar aralyǵynda ýkraınalyq kásipkerler Qazaqstan ekonomıkasyna 156,6 mln dollar tikeleı ınvestısııa quıǵan. Al Qazaqstan kásipkerleriniń Ýkraınaǵa salǵan qarajaty tórt jylda 490,5 mln dollardy qurap otyr. Búgingi tańda Qazaqstanda Ýkraınanyń qatysýymen 1559 kompanııa tirkelgen olardyń 898-i belsendi jumys istep tur.
Sonymen qatar forým barysynda Qazaqstan men Ýkraına arasyndaǵy saýdany ulǵaıtý, Ýkraınadan Qazaqstanǵa jáne basqa da Azııa elderine jáne qarama-qarsy baǵytta taýar jetkizý úshin kólik-logıstıkalyq ınfraqurylymdy ońtaılandyrý, progressıvti tehnologııalardy, IT-jobalardy, ınnovasııa jáne ınvestısııa tartý, Qazaqstan men Ýkraınanyń bıznes ókilderi úshin ózara tıimdi kelisimder jasasý, sonymen qatar problemalyq máseleler sóz boldy.
