Aımaqtar • 06 Qyrkúıek, 2019

Qostanaıda «Áke – asqar taý» atty P ákeler festıvali ótti

45 retkórsetildi

Qostanaıdaǵy bul sharany ótken jyly Qazaqstan halqy oblystyq assambleıasynyń janyndaǵy Analar keńesi oılap tapqan bolatyn. Analar bastamasy kópshilikke unaǵandyqtan jyl saıyn dástúrli ótetin bolyp kelisildi.

«Bul sharany ótkizý erikkenniń ermegi emes. О́kinishke qaraı sońǵy jyldary otbasyndaǵy ákeler róli tómendep ketti, bala tárbıesi tek áıeldiń ǵana sharýasy sııaqty kórinedi, ákeler bul isten syrt qalyp jatady. Al bul jastardyń áke bolýǵa daıyndyǵyn nasharlatady, ata-analyq boryshyn, ákelik baqytyn sezinbeýge ákeledi. Qazir analar otbasyndaǵy barlyq isti óz moınyna alady. Onyń ishinde bala tárbıesine, ony kıindirýge, bilim berýge ózin jaýapty sanaıdy. Biraq qandaı altyn ana bolsa da ol ákeniń ornyn toltyra almaıdy. Festıvaldiń ótýine qýanyshtymyn, bul otbasy berekesi men ákeniń rolin nyǵaıta túsedi dep senemin» dedi pedagog Marıonella Slesar.

Sharaǵa qatysýǵa oblystyń barlyq aýdandarynan 18 áke ótinish bergen eken. Olar úıde balalarmen, jubaıymen qalaı qarym-qatynas jasaıtynyn, jalpy óziniń otbasyndaǵy kúndelikti tirshilikti beıne taspaǵa jazyp, shaǵyn sıýjet jasap ótkizgen. Qazylar alqasy sonyń ishinen iriktep 7 ákeni tańdap aldy. Oza shyqqan jeti áke Dostyq úıinde ótken festıvalde marapattaldy.

– Men balalarymdy ózim kórsetken úlgimen tárbıeleımin.Úıde meniń «asqar taýym» ákem boldy. Bizdi ol úlkendi, anamyzdy, ákeni syılaýǵa úıretti. Ata-anamyz bizge eńbekqorlyǵymen, jaýapkershiligimen jáne tatýlyǵymen úlgi kórsetti. Meniń balalarym ónerli, ashyq minezdi, aqyldy, otbasynyń ar-uıatyn oılaıtyn azamattar bolsa dep armandaımyn» dedi baıqaýǵa qatysqan áke Marat Ysqaqov.

Festıvalde júldeger bolǵan joq, olardyń qatysqanynyń ózi jeńispen birdeı edi. Olar ár túrli atalymdar boıynsha marapattaldy. Sot oryndaýshy bolyp isteıtin Marat Ysqaqov «Eń úzdik papa» nomınasııasy boıynsha, Lısakov qalasynan kelgen Jasulan Shaıhıtdenov «Eń ónegeli papa», zańger ári sportshy Ildar Muhamedzıanov «Eń sportshy papa», Uzynkól aýdanyna kelgen shekarashy Erbol Mamyrqanov «Qoly altyn papa», Áýlıekól aýdanynan kelgen óner mektebiniń muǵalimi Azamat Saqaýov «Eń shyǵarmashyl papa», qoǵamdyq jumystarǵa belsene qatysatyn qostanaılyq avtoslesar Aleksandr Petrov «Qoǵamdyq belsendi papa», Maılın aýdanynyń turǵyny, deneshynyqtyrý pániniń muǵalimi Renat Karımov «Eń úlgili áke» atandy. Olar marapattaryn qosaǵymen qosa aǵaryp otyrǵan qarııalar Myrzabaı men Sharızat Jamanbalınderdiń qolynan aldy, baqytty qarııalar olarǵa batasyn berdi.

 

Qostanaı

Sońǵy jańalyqtar

Basylym basshylary - Erkin QYDYR (1962)

Basylym basshylary • Keshe

Almatyda sel júrý qaýpi joq

Aımaqtar • Keshe

Uqsas jańalyqtar