Beıbit kúnniń batyrlary marapattaldy

Qasym-Jomart Toqaev óz sózinde tur­ǵyndardy qutqarýǵa jáne Arys qalasyn qaı­ta qalpyna keltirýge at­salysqan bar­lyq azamatqa rıza­shy­lyq bildirdi. Pre­zıdent 24 maýsym hal­qymyzdyń taǵy bir synaqtan súrinbeı ótken kúni retinde tarıhta qalǵanyn aıtyp, Arys turǵyndarynyń tynyshtyǵy buzyl­ǵa­nymen, eldiń rýhy túspegenin aıtty.

– Qaıǵyly jaǵdaı eshkimdi beıjaı qaldyrmady. Arys qalasyn búkil el bolyp qalpyna keltirdik. Buǵan Qa­zaq­stannyń ár turǵyny úles qosty. Pat­rıotızm men shynaıy kómektiń osyndaı jarqyn úlgisiniń negizinde jastarymyzdy tárbıeleýimiz kerek, – dedi Memleket basshysy.

Qasym-Jomart Toqaev qazirgi ýa­qyt­ta nysandardyń 97 paıyzyn qaı­ta qalpyna keltirý jumystary aıaq­tal­ǵanyn, eń aldymen, kóp balaly ot­ba­­sylardyń baspanalary qalpyna kel­ti­rilgenin habarlady. Bilim kúni qar­sańynda Arystaǵy 16 mektepke 12 myń oqýshy qabyldandy, onyń 2 jarym myńy alǵash ret mektep tabaldyryǵyn attaǵan búldirshinder.

Qazaqstan Prezıdenti Arys oqıǵasy halqymyzdyń qıyn-qystaý kezdegi bekem birligi men yntymaǵyn kórsetkenin aıtty.

– Shyn máninde, búgingi jıynǵa qaty­syp otyrǵan azamattar – naǵyz batyrlar. Al osy zalǵa kele almaǵandardyń bári or­dendermen jáne medaldarmen marapattalatyn bolady, – dedi Memleket basshysy.

Syn saǵatta sabyrlyq tanytyp, eren erliktiń úlgisin kórsete bilgen azamattardy Prezıdent erekshe atap ótti.

– Kólik júrgizýshisi Asqar Ábdiha­ly­qov «Lıder» balabaqshasyndaǵy 70 balany qaterden qutqardy. Al medbıke Kúmisaı Tumanova aýrýhanada emdelip jatqan balalardy qaýipsiz aımaqqa jet­­kizdi. Olar sol sátte ózderiniń ómiri­ne de qaýip kelerin oılamastan táýe­kelge bas tikti. Men turǵyndardy qaýip­siz jerge kóshirgen azamattarǵa zor rıza­shy­lyǵymdy bildiremin. Zardap shekkenderdi emdep, olardyń ómiri úshin kúresken dárigerlerge alǵys aıtamyn, – dedi Mem­leket basshysy.

Budan bólek, Prezıdent aǵa serjant Nur­jan Baqtybaıdyń erligin erekshe atap ótti. Ol órttiń saldaryn joıý kezinde batyl áreket etti. Sonyń arqasynda biraz adam aman qaldy. Bapker ári oqytýshy Evgenıı Hısmetov Qaraǵandy oblysynan óz erkimen Arysqa attanǵan. Ol birneshe ýchaskede jumys istedi. Gýmanıtarlyq kómek taratyp, qurylys jumystaryn atqardy. Sóıtip júzdegen eriktimen birge qalany qalpyna keltirýge óz úlesin qosty.

Jarylysta eńbek etken áskerı qyzmetkerler, eriktiler, balabaqsha qyzmetkerleri II jáne III dárejeli «Aı­byn» ordenimen, «Qurmet» ordenimen, «Erligi úshin» jáne «Jaýyngerlik er­ligi úshin» medaldarymen, medısına qyz­metkerleri «Shapaǵat» medalimen marapat­taldy.