Sport • 10 Qyrkúıek, 2019

«Astana» qaı eldiń komandasy?!

1096 ret kórsetildi

Egemen elimizdiń bas qalasy – Nur-Sultannyń namysyn qorǵap júrgen «Astana» dep atalatyn kásibı fýtbol klýbyn jurttyń bári jaqsy biledi. 2009 jyly qurylǵan bul komanda bes ret el chempıony atanyp, úsh ret Kýbok pen tórt ret Sýperkýbokty jeńip alǵan. Kári qurlyqtaǵy baıraqty básekelerde tabysty óner kórsetip júr. Chempıondar lıgasynyń toptyq básekesinde óner kórsetýmen qosa-qabat Eýropa lıgasynyń 1/16 fınalynda oınaǵan. Bıyl da Eýropa lıgasynyń toptyq kezeńine joldama aldy. Til-kózimiz tasqa degenimizben, myna bir jaǵymsyz jaǵdaıat eriksiz jaǵamyzdy ustatady.

Klýbtyń jyldyq bıýdjeti 32-35 mıllıon AQSh dollaryn quraıdy. Sol qyrýar qar­jy-qarajattyń basym bóligi sheteldikterdiń esepshotyna túsip otyrǵany da belgili. О́ki­nishke qaraı, «Astananyń» aty ózimizdiki bolǵanymen, zaty basqa bolyp tur. Bulaı deıtinimiz, osy komandanyń prezıdenti Pol Eshýort (Ulybrıtanııa) pen bas bapkeri Roman Grıgorchýk (Ýkraına) myrzalardan bastap, oǵan múshe 18 oıynshynyń teń jartysy – legıonerler.

Sanamalap kóretin bolsaq, qorǵaýshylar Antonıo Rýka­vına (№2) – Serbııa, Jarko Tomashevıch (№6) – Bosnııa jáne Chernogorııa, jartylaı qor­ǵaýshylar Dorın Rota­rıý (№9) – Rýmynııa, Rýnar Mar Sıgýronsson (№10) – Islan­dııa, Marın Tomasov (№14) pen Lýka Shımýnovıch (№24) – Hor­vatııa, Ivan Maevskıı (№18) – Belarýs, shabýylshylar Fır­mın Mýbele (№19) – Kongo De­mokratııalyq Respýblıkasy, Ran­gelo Iаnga (№32) – Nıderland elderiniń azamaty. Taǵy ekeýine, dáliregi serbııalyq qaqpashy Nenad Erıch (№1) pen reseılik qorǵaýshy Evgenıı Postnıkovqa (№44) Qazaqstan azamattyǵy berilgen. Buǵan Túrkııanyń Konıa qalasyndaǵy «Konıaspor» klýbyna taıaýda ǵana aýysqan Bosnııa jáne Gersegovınanyń ókili Marın Anıchıchti qosyńyzdar.

Qalǵan jeteýi ǵana taza qa­zaqstandyq, sonyń ishinde ekeýi ǵana naǵyz qazaq. Olar – qaqpashy Aleksandr Mokın (№35), qorǵaýshylar – Abzal Beısebekov (№15), Iýrıı Logvınenko (№27), Dmı­trıı Shomko (№77), jartylaı qor­ǵaýshylar – Serikjan Mu­jyqov (№7), Iýrıı Persýk (№28), shabýylshy – Roman Mýrtazaev (№45). Keıde sol qos qandasymyzdy da jasyl alańǵa shyǵarmaı qoıady. Biraýyq bizge elordalyq klýbtyń oıyn­shylary: «Barlyq elderdiń legıo­nerleri, birigińder!» dep urandaıtyndaı syńaıly kórinedi. Aınalaıyn, aǵaıyn, ádildigin aıtyńyzdarshy, sonda «Astana» qaı eldiń komandasy bolǵany?!

Kezinde Qazaqstan fýtbol federasııasy Shymkenttiń «Or­dabasy» kásibı fýtbol klýbyna kórsetilgen lımıtten artyq legıonerler alyp qoıǵany úshin qomaqty kólemde qarjylaı aıyppul salýmen birge Eýrokýbok básekelerinen shet­tetkeni esterińizde shyǵar. Dál sondaı tártiptik jazalaý sharalary «Astanaǵa» kelgende nelikten júzege aspaı qalatyny túsiniksiz. Sizder buǵan ne deısizder, jankúıer qaýym?!

Ábdisattar ÁLIP,
sport jýrnalısteri arasyndaǵy Respýblıkalyq shyǵarmashylyq konkýrstyń laýreaty

ShYMKENT

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar