Iá, Abaı aýdany týraly bekerge sóz qozǵap otyrǵan joqpyz. Byltyr aýdan ortalyǵy – Qaraýyl aýylynda Shákárim Qudaıberdıevtiń 160 jyldyq mereıtoıynda Abaı aýdanynyń tarıhyndaǵy tuńǵysh basseın saltanatty túrde ashylǵan-dy.
Jaqynda shejireli ólkege jasaǵan jumys sapary barysynda basseındi arnaıy baryp kórdik. «Bul basseın oblys ákimi Danıal Ahmetovtiń bastamasymen salynǵan. Ol kisi aýdanǵa bir kelgeninde: «Shalǵaıda jatqan aýyl balalary qalanyń balalarynan kem bolmaýy kerek. Sondyqtan zamanaýı basseın salamyz» dep el aldynda ýáde bergen bolatyn. Kóp jerlerde basseınderdiń uzyndyǵy 25 metr bolǵanymen jolaqtar sany az. Al Qaraýyldaǵy basseın bes jolaqty. Qala standartyna saı jasalynǵan. Basseındi salýǵa oblystyq bıýdjetten 262 mıllıon teńge qarjy bólindi», dedi bizdi basseınge bastap ákelgen Abaı aýdandyq ishki saıasat bóliminiń basshysy Ulan Saǵadıev.
Biz basseınge kelgende jattyqtyrýshylar jumysqa áli kelmegen eken. Alaıda bizdi basseınniń kireberisinde qarsy alǵan, osynda operator-laborant bolyp jumys isteıtin Dana Saılaýhanqyzy abaılyqtarǵa tańsyq ǵımarat jaıly áńgimelep, nysannyń ishin aralatyp kórsetti. Munda bes jolaqty basseınnen bólek monsha, jattyqtyrýshylar bólmesi, jattyǵý zaly, zerthana qarastyrylǵan. «Men zerthanada jumys isteımin. Sý quramyn kúnine birneshe márte tekserip otyramyz. О́skemendegi ortalyq basseınge arnaıy baryp, ondaǵy zerthananyń jumysymen tanysyp qaıttyq. Bul basseınge balalardy 6 jastan 15 jasqa deıin qabyldaımyz. Túske deıin, tústen keıin eki mezgil bir saǵat sýǵa túsedi. Bıyl mamyr aıynda aýdan tarıhyndaǵy sýǵa júzýden tuńǵysh jarys ótti. Mundaı saıysty buryn-sońdy kórmegendikten bárimiz qyzyǵa tamashaladyq. Meniń bilýimshe, osyndaı basseın oblysymyzda Zaısan men Abaı aýdanynda ǵana bar» degen Dana Saılaýhanqyzy basseınge eresek adamdar keshkilikte aqyly túrde túsetindigin jetkizdi.
Basseınge oblys ortalyǵy – О́skemennen arnaıy jattyqtyrýshylar shaqyrylypty. Erli-zaıypty Janat pen Merýertke «Dıplommen – aýylǵa!» baǵdarlamasy arqyly baspana berilip, kótermeaqy tólenipti. Qaraýyldyń balalaryn sýǵa júzýge baýlyp jatqan jattyqtyrýshy, Zaısan aýdanynyń týmasy Merýert Telemedıeva buǵan deıin О́skemendegi Olga Rypakova atyndaǵy jeńil atletıka saraıynda jumys istegen eken. Bıylǵy oqý jylynyń sońynda ótken jarysqa 30-ǵa tarta bala qatysyp, erkin jáne shalqalap júzý ádisterimen 25 metr qashyqtyqta baqtaryn synap kóripti. «Alǵashqy jarys bolǵannan keıin 25 metrdi jón dep sheshtik. Sýda emin-erkin júzip, tehnıka qalyptastyrý úshin kem degende bir-eki jyl ýaqyt kerek. Bolashaǵynan úmit kúttiretin talapty, yntaly balalar bar. Olardy jańa oqý jylynan bastap birtindep О́skemen men Semeıde ótetin jarystarǵa qatystyramyz», deıdi Merýert.
Shyǵys Qazaqstan oblysy,
Abaı aýdany,
Qaraýyl aýyly
