Qoǵam • 11 Qyrkúıek, 2019

«Klıentter» men keńesshiler

58 retkórsetildi

Áleýmettanýshylar zertteýi halyqtyń basym bóliginiń erikti-eriksiz túrdegi ermegi mýzykamen baılanysty ekenin anyqtapty. Teledıdardy qosqannan tut­­qynyna alatyn konsertter men án­shiler­diń júrgizetin baǵdarlamasyn aıt­pa­ǵanda, úıdegi stýdent pen bala bitken arnaıylap kóretin ártúrli sapadaǵy 5-6 mýzy­kalyq arnanyń nasıhaty tolassyz tógilip tur.

Jeke kóligine mingen adam eń birinshi radıonyń mýzykasyn qosýǵa qol sozady, qoǵamdyq kólikten de qulaqqapsyz otyrǵan adamdy óte sırek kóresiń. Ol jaı otyrǵan joq, mýzyka tyńdasa da, ýaǵyzǵa eltise de, kıno kórse de, bos ýaqytyn ǵana emes, ishin jalap bara jatqan bos vakýýmdy toltyrýǵa ózinshe qareket jasap otyr. Týǵan-týyspen ǵana ómiriniń máni bar qazaq senbi, jeksenbiniń keshinde mindetti túrde kezekte daıyn turǵan áldebiriniń kópten kútken toı qýanyshyna ortaqtasýǵa barady. Onda da dańǵaza shýdy jaqtyrmaıtynyna qaramastan julqynyp, silkinip jatqandarmen birge el qatarly kóńil kóterip, bul da yrǵalady, bıleıdi. Qysqasy, ánsiz ómir – mánsiz.

 Sosıýmnyń tutynýshylyq mádenıetiniń suranysyna osyndaı óte qolaıly jaǵdaı qalyptasyp otyrǵanda, sol mýzykadan maıtalman bolyp ósip shyqqan Qydyráli men Meırambek keńesshilik qyzmetke tartylyp edi, qoǵamnyń sol mardymsyzdaý mansapty ekeýine qımaǵany dál bizge kereǵarlyq bolyp qabyldandy. Qazaq estradasynyń brendine aınalǵan bir Bespaev pen bir Bolmanov emes, myń Bespaevtardy ákep keńesshi etse de, bul mamont-mashınany endi eshkim toqtata almaıdy. Endeshe sheneý­nikterdiń shoý bıznes ókilinen aqyl suraǵany qoǵamdy nege sonsha shoshyndyrady? Olar ózderi essiz elitip tyńdaıtyn, esirip bıleıtin, jeke ómirin paıǵambardyń ómirindeı kórip elikteıtin shoý bıznes degen salanyń eń jarqyn ókilderi emes pe, qabyldamaǵanyn qalaı túsinýge bolady? Kóptiń minezine tańǵalmasqa sharań joq. Estradada júrgen ánshilerdiń 70-80 paıyzynyń boıynda talantynyń kem ekenin, kem emes-aý, múlde joq ekenin, bilimi tómen, tanymy taıaz ekenin, ózine tek «klıent» dep qana qaraıtynyn biledi, bile turyp solarǵa tabynyp, qolpashtap júrip óz qolymen qoǵamnyń qaımaǵy  etip qalyptastyrady da, solardyń ishinde daýysy da, bilimi de bar dep esepteletin eki myqtysy daralanyp, ákim men mınıstrdiń qasynan tabylyp jatsa, jatyp kep renjıdi.

Dál osy qoǵamdyq sıpaty basym keńes­shi­lik qyzmeti olardyń ataǵyn odan ári as­pandata túsý úshin kerek dep oılamaımyz. О́ıtkeni Meırambektiń óz aty da kez kelgen ataqtyń ornyna júrýge jaraıtyn salmaqqa ıe, halyq aldyndaǵy súıkiminiń ózi – bir mamandyq, bir mindet. Basty qaýip – bul tanymal azamattardyń talanty, óne­­ri naryqtyń taýaryna qalaı aınalsa, bular­dyń tanymaldylyǵy, halyq aldyn­daǵy bedeli dál solaı bıliktiń taýaryna aınala ma degen oı kóbirek mazalaı ma deımiz. Bul qısynǵa salsaq, barlyq mamandyq ıeleri sııaqty ánshi de tek óz isimen aınalysýy kerek. Al qalypqa syımaı, kópke qyzmet etýge jarap, budan da bıik dárejege laıyqty dep tanylǵan eken, onda myń muqtajy bar halyqtyń mańyzdy bir sharýasyn sheshetindeı iriligin, azamattyǵyn tanytýy kerek. Kúshti – batyrdan, bilimdi – oqymystydan, oıdy – kemeńgerden kútemiz, sol sekildi halyq ta ózine  tireý, súıeý bolatyn sózdi eń aldymen qaıratkerden, tanymal tulǵalardan, ózi qurmeti men qoshametine bólegen belgili azamattardan kútedi. Kúni keshe Qalı Sársenbaı aǵamyz osy «Egemenniń» betinde Meırambekti es kórip, qara tutyp (Meırambek – shartty, onyń ornynda kez kelgen ánshi, óner adamy bolýy múmkin desek te) hat jazdy. Sol hatqa Meırambek qatyryp turyp jaýap bergende, mynaý búgin tus-tus­tan tap bergen «kóp shýyldaq» bala­ǵyna jarmasýǵa batyly barar ma edi? Qaıdam.

El aldynda júrgen, bılikke bir taban jaqyn júrgen jigitter kókeıindegi sózdi aı­typ otyrsa, kópshilik basqasyn odan sura­maıdy da. Al mynaý jatyp kep renjip, bir aýyzdan senim bildirmeýdiń astaryndaǵy úlken sebep, azamattyq kózqarastyń kemshin­digi men qoǵamdyq belsendiliktiń tómendigi dep dıagnoz qoıyp, sonymen baılanystyra qaraý­dan basqa amalymyz joq.

Úlken bıliktiń bel ortasyna taý tulǵa­ly Ábish Kekilbaev pen Dúısen Qaseıi­novter barǵanda da, shýlaǵanbyz «onda ne joǵaltty?» dep. Búgingi bıikten kóz sal­ǵanda buralqy sózimiz úshin uıalyp, «sol kisi­lerdiń barǵany qandaı abyroı bolǵan» dep shúkirmen eske alamyz. Kishkentaı ǵana keńesshilikke Bolmanov pen Bespaev ta barǵaly otyr, «jobalarmen jumys isteıdi» deıdi, jaqsy-aq. Biraq bul olarǵa berilgen bonýs, múmkindik ekenin olar da, biz de umytpasaq,  «klıentter» men keńesshiler erteńgi kúni dál solaı erkin tynystap otyramyz. Bul endi anyq.

Banner
Sońǵy jańalyqtar

Hat qorjyn (23.09.2019)

Qoǵam • Keshe

Qostanaı qysta tońbaıdy

Aımaqtar • Keshe

«Mal da joq, qaıyr da joq»

Qazaqstan • Keshe

Halhyn-gol shaıqasynyń qaharmany

Rýhanııat • Keshe

Aqyn toıyna daıyndyq qalaı?

Rýhanııat • Keshe

Uqsas jańalyqtar