«KitapFest 2019» merekesine almatylyqtar altynshy jyl qatarynan kýá bolyp keledi. Kitap festıvali oqyrmandar arasynda kitap almasý sátimen erekshe. Arbatty jaǵalaı tizilgen kitaptardyń jańasy da, muqabasy kónergen kitaptar da oqyrmandardy óz mazmunymen qyzyqtyrdy. Osy bir sátti syrttan baqylaǵan kezde ádebıettiń bar jaýharyn ón boıyna búkken kitap syndy rýhanııat quralynyń oqyrman úshin baǵasy zor ekenin ańǵarǵandaı bolasyz.
Áleýmettik jelide qala ákimi Baqytjan Saǵyntaevtyń rýhanı sharaǵa qoldaý bildirip, alǵan áseri jaıynda jazba qaldyrǵanyna qarap, shahar basshysynyń kitap merekesine oqyrman retinde qatysqanyn ańǵardyq. Al kitap merekesiniń saltanatty rásiminde ǵalym, qoǵam qaıratkeri Rahman Alshanov, jazýshy, qoǵam qaıratkeri Beknur Qısyqov sanaly qoǵamdy qalyptastyrýdaǵy kitaptyń róli men mańyzy týraly baıandap, kópshilikti kitap oqýǵa shaqyrsa, festıvaldyń úılestirýshisi Maıra Áljanova jyl saıyn kitap merekesiniń aıasy keńeıip keledi deıdi. Sondaı-aq festıvalda jas ta, kári de erekshe sátterimen bólisip, kitap áleminiń jaýharlarymen tanysýǵa múmkindik aldy. Bıyl festıval Nur-Sultan qalasynda ótkizilse, aldaǵy ýaqytta elimizdiń basqa da qalalarynda jalǵastyrý josparlanyp otyr.
Búginde qoǵamda kitap oqýǵa degen ynta-jigerdiń tómendep ketkendigine baılanysty mamandar jıi másele kóterip júr. Osy oraıdaǵy suraqtarymyzǵa jaýap bergen «Inteli kids» balalardyń aqyl-oıyn damytý ortalyǵynyń dırektory Saltanat Múlkibaeva otbasynda kitap oqýdy ádetke aınaldyrý úshin birinshi kezekte ata-ana ózi úlgi kórsetý qajet ekendigin aıtady. Ata-anasynyń únemi kitap oqyp júrgenin kórgen bala osy bir jaqsy dástúrdi boıyna sińire bastaıdy. Búginde gadjet, telefondarǵa yntasy aýyp turatyn balalar aqparatty jeńil qabyldaǵandy jón kóredi. Sondaı-aq mektep, balabaqsha baǵdarlamasy júktegen oqýlyqtardy ǵana meńgerýmen shekteledi. Sondyqtan da unaıtyn kitaptardy tańdatyp, oqytýdy qaperde ustaǵan abzal ári árbir úıde óziniń kitaphanasy jasaqtalǵany da balanyń kitap oqýǵa degen yntasyn arttyra túsedi deıdi maman. Al osy ortalyqqa sońǵy úsh jyl ishinde kelgen eki jarym myńnan astam oqyrman búginde óz kitaphanasyn qalyptastyryp úlgergen.
Jazýshylar shatyrynda «Alash Media Group «Bir oqıyq» jobasy aıasynda Ábdijámil Nurpeıisovtiń «Qan men ter» kitabynan úzindi oqyǵan aktrısa Aısulý Ázimbaeva oqyrmandar aýdıtorııasyna erekshe bir áser qaldyrsa, Saýle Janǵazy jáne Gúldana Muhtarbektiń «Super men nemese ómirdegi basty maqsat», jýrnalıst Shyńǵys Muqannyń «Kóshbasshy», aqyn Aınur Tóleýdiń shyǵarmashylyǵynyń, Merýert Alonsonyń «Korotkoe leto Shanteklery», Meıirjan Jylqybaıdyń «Taýǵa saıahat», Baqtygúl Mahanbetovanyń «Ádebı agent kim? Qazaqstandyq avtorlardy nasıhattaý qanshalyqty mańyzdy?», Torǵyn Joldasbekqyzynyń «Arasha», Ǵanı Abadannyń «Bıznes po-lıýbvı ılı kak sozdat startap v Kazahstane», Amanı Jannyń «Sheteldegi qazaq ertegileri», avtorlar ujymynyń «Otbasy hrestomatııasy», t.b. kitaptardyń tanystyrylymy oqyrmandarǵa erekshe bir sátti syılaǵandaı áserde ótti.
Al Qazaqstannyń halyq ártisi Jánııa Áýbákirovanyń, belgili qazaqstandyq saıasattanýshy Dosym Satpaevtyń jýrnalıst Vadım Boreıkonyń, jýrnalıst, kásipker Dana Ormanbaevanyń kitaptarynyń tanystyrylymy da suraq-jaýapqa ulassa, «Offline kitaptary týraly» kókeıkesti máselelerge oraı Nora Rozmýt, Baqytjan Buqarbaı, Dına Tólepbergen, «100 jańa esim» jobasynyń jeńimpazy Aıdıe Aıdarbekov, t.b. jýrnalıster, blogerler, kásipkerler, sondaı-aq Eýrazııalyq shyǵarmashylyq gıldııasynyń ókili (London) Vıktorııa Chýgaı, «451 gradýs» ádebı klýbynyń negizin qalaýshy Amanjol Abıev, aýdarmashy, jazýshy Ilıa Odegov jaýap berip, óz oılarymen bólisti.
Almatylyq turǵyndar men qala qonaqtary tańnan keshke deıin «Folıant», «Erýdıt», «Camǵa», «Qazaq ulttyq ýnıversıteti» baspalary men «Meloman», «Flip.kz», t.b. otyzdan astam baspa men kitap dúkenderi, sondaı-aq jeke kitap qory usynǵan kitaptarmen tanysyp,
«I BOOK YOU» jobasy aıasynda
3 myńnan astam kitappen almasyp, kelesi jyly da osy alańda kezdesýge ýádelesti.
ALMATY
