Nur-Sultan jumys kúshi artyq óńirlerdiń qatarynda qaralyp, ondaǵy halyqty óz erkimen kenshiler qalasyna kóshirýde barlyq qajetti jaǵdaı qarastyrylǵan. Baspasóz qyzmetiniń habarlaýynsha, qonys aýdarýshylardy turǵyn úımen, jumyspen qamtamasyz etedi, al qajet bolǵan jaǵdaıda oqýǵa jiberedi.
Ekibastuzǵa alǵashqylardyń biri bolyp bet túzegen kópbalaly Shapaǵat pen Saltanat Malıkovtar turmysy edáýir túzele bastaǵanyn aıtyp qýanýda. ««Nurly Ertis» jobasynyń qatysýshylary retinde biz mamyr aıynda elordadan Ekibastuzǵa kóshtik. Kelgennen keıin bizge jaldamaly 3 bólmeli páter berildi. Joldasymdy «Optıma Trans» JShS-ǵa avtomehanık retinde jumysqa ornalastyrdy. Tórt balamyz bar. Eki kishkentaıymyz egizder, 2 jasta. Úlkenderi ekinshi jáne altynshy synypta oqıdy. Balabaqsha, mektepte tamaqtaný jáne balalarǵa arnalǵan qoǵamdyq kólikter barlyǵy tegin. Otbasymyzdyń ómiri jaqsardy dep senimmen aıta alamyn», dedi Saltanat Malıkova.
Elordadan Ekibastuzǵa kóshken 203 otbasynyń 122-si 3 bólmeli páterge, 69 otbasy 2 bólmeli páterge jáne 12 otbasy 1 bólmeli páterge ornalastyrylǵan. «Nurly Ertis» jobasy nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyrylýda. Azamattardy jumys kúshi artyq óńirlerden jumys kúshi tapshy óńirlerge kóshirý – osy memlekettik baǵdarlamanyń mańyzdy baǵyttarynyń biri» delingen habarlamada.
Bul baǵdarlama aıasynda kóshkenderge 35 aılyq eseptik kórsetkish, ıaǵnı otbasynyń árbir múshesine 88 myń teńge mólsherinde aı saıynǵy sýbsıdııa tólenedi. Qalalyq aýdandarda turǵyn úıdi jalǵa alýǵa aı saıynǵy shyǵystardy 75 myń teńgege deıin (30 AEK) jáne aýyldyq jerlerde otbasy músheleriniń sanyna baılanysty 53 myń teńgege deıin (21 AEK) óteıdi. Jumys berýshilerge keminde 5 adamnyń jumysqa ornalasýyna yqpal jasaǵan jaǵdaıda, 450 AEK nemese 1 mln 136 myń teńge kóleminde sýbsıdııa beriledi. Qajetti jumys quraldaryn, tehnologııalyq jabdyqtardy, úı janýarlary men qustaryn satyp alý, jańa bıznes-ıdeıalardy iske asyrý úshin memlekettik baǵdarlamanyń qatysýshylaryna 200 AEK-ke deıin qarajat bólinedi. Qonys aýdarýshylardyń tehnıkalyq jáne kásiptik bilim alýǵa, qysqa merzimdi kýrstarǵa qatysýǵa múmkindikteri bar. Sondaı-aq jumysqa ornalasýǵa járdem kórsetedi.
«Erikti qonys aýdarýdyń maqsaty – eńbek kúshi tapshy óńirlerdi jumys kúshimen qamtamasyz etý jáne óńirlik sáıkessizdikter men demografııalyq teńgerimsizdikterdi joıý. Erikti túrde qonys aýdarýǵa Almaty, Túrkistan, Jambyl, Qyzylorda, Mańǵystaý oblystarynyń jáne Shymkent jáne Nur-Sultan qalalarynyń turǵyndary qatysa alady. Búgingi kúni qonys aýdarýshylardy qabyldaý úshin Soltústik Qazaqstan, Shyǵys Qazaqstan oblystary jáne Pavlodar men Qostanaı oblystary bekitilgen», deıdi Eńbek jáne áleýmettik qorǵa mınıstrligi Halyqty jumyspen qamtý departamentiniń basqarma basshysy Aıjan Japalbaeva.
Bıyl segiz aıda «Eńbek» memlekettik baǵdarlamasymen eńbek kúshi tapshy óńirlerden 1650 otbasy, ıaǵnı 5 918 adam belgilengen óńirlerge kóshken.
