Aımaqtar • 13 Qyrkúıek, 2019

Bókeı ordasy – baqýatty aýdan

35 ret kórsetildi

Qazaqstannyń qıyr batysynda ornalasqan Bókeı ordasy aýdany – tórt túlik mal sany jóninen eń baı óńirdiń biri. Aýdan turǵyndarynyń sany 16072 adam bolsa, 2019 jyldyń 1 qyrkúıeginde iri qara – 69 857 bas, qoı-eshki – 92 198, jylqy – 25 308, túıe – 938 basqa jetken.

Eseptesek, bókeıliktiń ár turǵynyna orta eseppen 4 sıyr, 2 jylqy, 6 qoıdan tıedi eken.

- Bıylǵy 1 qyrkúıekte aýdandyq bıýdjet 3 mlrd. 60 mln. 890 myń teńgeni qurady. 8 aıdyń qorytyndysynda aýdandyq bıýdjetke 222 mln. 675 myń teńge salyq túsip, jospar 111%-ǵa oryndaldy. 2019 jyldyń 8 aıy boıynsha jalpy ınvestısııa kólemi 1 mlrd. 666 mln. 290 myń teńgeni qurap otyr. Osy ýaqytta aýyl sharýashylyǵy salasynda 4 mlrd. 152 mln. teńgeniń ónimin óndirdik. Aýdanda 513 sharýa qojalyq bar. Aýdan sharýashylyqtary 4360 tonna et, 10490 tonna sút óndirdi, - deıdi Batys Qazaqstan oblystyq О́ńirlik kommýnıkasııalar qyzmetinde jýrnalıstermen kezdesken Bókeı ordasy aýdanynyń ákimi Nurlan Rahymjanov.

Aýdan ákiminiń aıtýynsha, aýdanda sheteldik asyl tuqymdy mal satyp alýǵa baǵyttalǵan jumys qarqyndy júrýde. «Sybaǵa» baǵdarlamasy boıynsha 5 sharýa qojalyǵy Reseıden 166 bas, Belorýssııadan 143 bas gereford jáne angýs tuqymdy sıyr satyp alǵan. Jaqynda taǵy bir sharýa qojalyǵy Belorýssııadan 105 bas asyl tuqymdy qashar ákelýdi josparlapty. Aýdanda «asyl tuqymdy mal sharýashylyǵy» mártebesin alǵan 24 qojalyq bar eken, olar 6872 bas asyl tuqymdy mal ósirip otyr.

Bir aıta keterligi, alystaǵy mal qystaqtary jańa tehnologııany jappaı ıgerip jatyr. Sońǵy jyldarda 165 qystaq kún batareıasyn ornatyp alǵan. Bıyldyń ózinde 80 kún batareıasy jańadan qoldanyla bastapty. Memlekettiń mal ósirýshi sharýashylyqtardy sýmen qamtamasyz etý jobasy aıasynda bıyl 18 qudyq qazylǵan. «Kún batareıalaryn ornatqan jáne qudyqtaryn soqqan sharýa qojalyqtar memleketten tıisti sýbsıdııalaryn alyp otyr» deıdi aýdan basshysy.

 

Batys Qazaqstan

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar