Qazaqstan • 15 Qyrkúıek, 2019

«ALMAFEST» – bereke men izgiliktiń merekesi

51 retkórsetildi

Qyrkúıek aıynyń dál ortasynda alma festıvalin ótkizý Almaty jurty men qala qonaqtary úshin dástúrge aınalǵan. Bul kúni Qazaqstannyń Tuńǵysh Prezıdentiniń saıabaǵyna júz myńdaǵan adam aǵylyp kelip, kópten kútken eń jyly, aýqymdy merekeni aqysh aspan astynda birge toılaıdy.

Alataýdyń baýraıynda qulpyryp jatqan ásem Almatynyń týǵan kúnine oraı ótkiziletin Almafest festıvali – bereke men izgiliktiń, óner men qurmettiń merekesi. Elimizdiń tanymal tulǵalary ómirge kelgen, árbir qazaqstandyq taǵdyryn baılanystyrǵan altyn zerli arý Almaty janǵa jaıly qala ǵana emes, bir kórgen jannyń júreginiń tórinen oryn alatyn qasıetti meken. Álemge áıgili, dámi til úıirer tátti almasyna arnaıy qurmet kórsetip, atyn ıelenip, aportymen álemge tanylǵan shuǵylaly shahar jyl saıyn menshikti merekesiniń sheńberine birneshe mańyzdy sharalardy laıyqty toptastyra alady.

Kórkine kórik qosyp, gúldene túsken Almatynyń tabysty qalaǵa aınalýy jolynda atsalysyp kele jatqany úshin Almaty qalasynyń ákimi Baqytjan Saǵyntaev alǵys aıtyp, shahar jurtyn qala kúnimen quttyqtady.

«Jyl ótken saıyn damyp kele jatqan megapolıs bıznes bastamalar úshin keleshegi mol ınvestısııalyq alań bolyp qala beredi. Boljamǵa sensek,  aldaǵy jıyrma jylda Almaty halqynyń sany 3 000 000-ǵa jetetini joramaldanyp otyr.

Almaty budan da ádemi, qaýipsiz, ekologııalyq taza, ómir súrýge qolaıly qala bolǵanyn bárimiz de qalaımyz. Álemdegi ómir súrý sapasy joǵary qalalardyń birine aınalýy úshin Elbasy tapsyrmasyna sáıkes, biz bıyl megapolıstiń tarıhyndaǵy eń iri joba – qalalyq ortany jańartý ózgerisin qolǵa aldyq. Almaty – jastyqtyń, talanttardyń, sulýlyqtyń, meıirimniń qalasy. Armannyń oryndalatyn jeri de – Almaty. Sondyqtan Almatynyń bolashaǵy zor. Munyń barlyǵy turǵyndardyń bereke-birligi men tabysty tirliginiń, senim men qoldaýdyń arqasynda dep bilemin» dedi qala ákimi óz sózinde.

Almafest-tiń kóńil tolqytar sátteriniń biri – Almaty qalasynyń damýy úshin erekshe eńbegi sińip, san túrli salada jetistikke jetken  biregeı tulǵalardyń «Almaty qalasynyń qurmetti azamaty» ataǵymen marapattalýy. Bul mártebeli ataq buryn tek úsh adamǵa ǵana berilip kelse, qala ákimi men máslıhat sheshimine sáıkes shyǵarylǵan bıylǵy jyldyń jańalyǵy, birinshi ret jeti birdeı azamatqa tabystaldy.

Sonymen, «Almaty qalasynyń qurmetti azamaty» ataǵy Qazaqstannyń halyq ártisi, Memlekettik «Almatynyń jas baleti» klassıkalyq bı ansabliniń negizin qalaǵan áıgili balet bıshisi, horeograf  Bolat Aıýhanovqa, Almaty qalasynyń damýyna aıyryqsha eńbek sińirgen Nur Otan partııasy Tóraǵasynyń birinshi orynbasary Baýyrjan Baıbekke, Qazaqstannyń eńbek sińirgen qaıratkeri, dáriger Músilim Daıyrbekovke, Ulttyq ǵylym akademııasynyń akademıgi Amanjol Qoshanovqa, belgili jazýshy, Memlekettik syılyqtyń laýreaty Ábdijámil Nurpeıisovke, belgili aqyn, Memlekettik syılyqtyń laýreaty Oljas Súleımenovke jáne 75 jyl ómirin teatr men kınoǵa arnap, 300-den asa ról oınaǵan Qazaqstannyń halyq ártisi Iýrıı Pomeransevke berildi.

«Bul mártebeli ataqty buryn da alýyma bolatyn edi. Biraq «Eshten kesh jaqsy» degen, birde Máskeýden issapardan oralsam, meniń atyma hat kelipti. Hatty sol kezdegi Pavlodar oblysynyń ákimi Baqytjan Saǵyntaev joldaǵan eken. Hatta ákim meniń jas kúnimde jazǵan shyǵarmalarymnan bastap, baspadan shyqqan árbir jańa kitabymdy qadaǵalap júrip oqıtyn oqyrmanym ekenin baıandapty. Sondyqtan bul qurmetti ataqty kesh bolsa da, meniń shyǵarmashylyǵymdy joǵary baǵalap, arnaıylap hat jazyp, kóńilimdi ósirgen baıyrǵy oqyrmanym Baqytjan Saǵyntaevtyń qolynan alǵanyma qýanyshtymyn» dedi qart qalamger Ábdijámil Nurpeıisov.

Sondaı-aq bıyl alǵash ret Almaty qalasynyń ákimi B.Saǵyntaevtyń sheshimimen taǵaıyndalyp otyrǵan «Eńbegi úshin» tósbelgisin qalanyń órkendeýi jolynda eńbek sińirip kele jatqan birqatar azamattar ıelendi. Olardyń arasynda «Turan» memlekettik ýnıversıtetiniń rektory Rahman Alshanov, Fılosofııa, saıasattaný jáne dintaný ınstıtýtynyń dırektory Aqan Bıjanov, Almaty qalasy Ardagerler uıymynyń tóraǵasy, akademık Erenǵaıyp Shaıhýtdınov, medısına ǵylymdarynyń doktory, professor Myrzakárim Alshynbaev, Almaty qalasy Tilderdi damytý jáne latyn grafıkasyna kóshý ortalyǵynyń basshysy mindetin atqarýshy Mamaı Ahetov, Almaty qalasy Menedjment jáne servıs kolledjiniń dırektory Roza Badaeva jáne taǵy basqa el ómiri úshin ıgilikti salalarda ozyq isimen kóringen daralar marapattaldy.

Qala kúni merekesi aıasynda ashyq aspan astynda ártúrli sharalar qatar uıymdastyrylyp, «Alma Art», «Alma Bazar», «Alma Master», «Alma Auen», Alma Drive» alańdary jumys istedi. Merekede almanyń jıyrmadan astam túri tómendetilgen baǵamen satylymǵa shyǵaryldy. Qalalyqtar men qala qonaqtary Prezıdent saıabaǵynyń ortalyq alańynda «MýzArt», «Jigitter» toby, Nurlan Abdýllın, Kental, basqa da belgili estrada ánshileriniń, bı ujymdarynyń aýqymdy konserttik baǵdarlamasyn tamashalady. 

 

ALMATY

 

Banner
Sońǵy jańalyqtar

Izgilik elshisi

Aımaqtar • Búgin, 17:38

Soltústik oblystarda boran bolýy múmkin

Qazaqstan • Búgin, 16:18

Kún energııasy Oralǵa jetti

Aımaqtar • Búgin, 15:46

«Aqyny aq Ertistiń – Qımadıden...»

Rýhanııat • Búgin, 12:46

Fýtbol: Makedonııamen teń oınadyq

Fýtbol • Búgin, 12:24

Kúlki kerýeni № 3

Rýhanııat • Búgin, 11:38

Eń qysqa áńgime. Jandos Júsipbek

Eń qysqa áńgime • Búgin, 11:32

Eń qysqa áńgime. О́mirjan Ábdihalyquly

Eń qysqa áńgime • Búgin, 11:29

Eń qysqa áńgime. Baýyrjan Babajanuly

Eń qysqa áńgime • Búgin, 11:24

Dala úni Almatyda bastalady

Rýhanııat • Búgin, 10:19

Tekti sózdiń tóresi Almatydan bastalady

Aımaqtar • Búgin, 10:11

Taǵylymdy tulǵa

Rýhanııat • Búgin, 09:36

Ǵylym qanatyndaǵy ǵumyr

Rýhanııat • Búgin, 09:34

Moıynqumǵa ushaq qatynaıdy

Aımaqtar • Búgin, 09:29

«Para berme» chellendji bastaý aldy

Aımaqtar • Búgin, 09:27

Kásipodaq úzdikteri marapattaldy

Aımaqtar • Búgin, 09:26

Bı-aǵa salǵan án eken...

Rýhanııat • Búgin, 09:17

Qaıta oralǵan «Don Karlos»

Rýhanııat • Búgin, 09:15

Jeti óner qonǵan jampozym

Rýhanııat • Búgin, 09:12

Taǵdyry tańdalǵan patshaıym

Rýhanııat • Búgin, 09:09

Naǵyz qazaq

Rýhanııat • Búgin, 09:05

«Brakoner» biraz basbuzardy quryqtady

Aımaqtar • Búgin, 09:00

Reseıden de úırenýge bolady

Saıasat • Búgin, 08:52

Zań jobasyn talqylady

Qoǵam • Búgin, 08:46

IýNESKO-nyń syılyǵyn jeńip aldy

Qazaqstan • Búgin, 08:45

Uqsas jańalyqtar