Rýhanııat • 16 Qyrkúıek, 2019

Ádildiktiń Ádili edi...

48 ret kórsetildi

Men úshin bul qaıǵy basqa qaıǵyǵa uqsamaıdy. Barlyq ólim qaıǵyly ǵoı, biraq eń jaqyn dosyńnyń, syrlasyńnyń, talaı-talaı oqıǵalardy bas­tan keshirip, bir-birimizdiń balalarymyzdyń atyna deıin kezek-kezek qoıysyp otbasymyzben aralasyp ketken joldasyńnyń baqılyq bolǵany qabyrǵańdy qaqyratyp ketedi eken.

Ádil ekeýmiz shyǵar­ma­shy­lyqty da birge bastap, jataq­ha­na­da qara nandy qatar bólip jep, ómirdiń qyzyǵyn da, shyjyǵyn da teń kórdik.

Aıyrylmas dosyma ajal taban astynda kelgen joq. Ásirese jalǵyz uly Aıdardyń qazasy onyń ishin jegideı jep tastady. Qaıran Ádil, sol qaıǵydan ońala almady. Talaı dárigerdiń em-domynan úmittenip edik, biraq sum ajal ańdı-ańdı alyp tyndy...

Ádil kim edi, Ádil ádildiktiń sımvolyndaı tulǵa edi. Ol eshqashan jazýshymyn dep keýde soqpady. Basqa qalamgerler sııaqty bir shyǵarmany bitirip alyp, men osyndaı eńbek ettim dep suǵynyp, aıqaılamaıtyn edi. Eshkimge eńbegin buldamady, qarapaıym ǵana tirshilik keshti.

Ásirese «Meniń Sheraǵam» degen kitaby bizdiń qazaq ádebıe­tin­degi esse janry úshin úlken oqıǵa boldy. Ony shyqqan bette túgel oqyp shyqtym. Ol eńbekti orys tiline aýdartý degen usynysty da alǵash aıtqan men edim. Sherhan Murtazanyń ózi kitapty oqyp shyǵyp, úlken baǵa berdi. Ádildiń jaqsylyǵy ǵoı, Sherhan ony Arharı dep erkelete sóıleıtin.

Abaıdyń «Men kórdim uzyn qaıyń qulaǵanyn» degenindeı, Ádil keshe arystaı bolyp tabyt­ta jatqanynda kózime jas kel­di. Ádil­diktiń uzyn qaıy­ńy, shyǵarmashylyqtyń uzyn qaıyńy, adamdyqtyń, týys­qan­dyqtyń, dostyqtyń uzyn qaıyńy sulap jatqandaı kórindi. Kóńilimizdi erekshe kúıretip ketti sol kórinis.

Ne aıtamyz, aınalaıyn, Ádil saǵan qaıǵyrsaq, biz qaıǵy­ra­myz, sen jer betindegi ózińniń adam­dyq adal paryzyńdy ótep kettiń, ol – seniń artyńda qalǵan ólmes shyǵarmalaryń, sol ólmes muralaryń urpaǵyńa shyraq, ultyńa ónege.

Jatqan jeriń jaıly bolsyn, Ádil dosym!

 

Dýlat ISABEKOV

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar