Rýhanııat • 16 Qyrkúıek, 2019

Sháken Aımanovtyń murajaıy ashyldy

115 retkórsetildi

Búgin – Qazaq kınosynyń kúni. «Qazaqfılm» kınostýdııasynda qazaq kınosy jáne Sháken Aımanov atyndaǵy murajaı ashyldy.

Osydan 105 jyl buryn dúnıege kelgen ulttyq kınonyń sańlaǵy Sháken Kenjetaıuly qazaq óneriniń baǵyna jaralǵan shoqtyǵy bıik qaıtalanbas dara tulǵasy retinde bul qurmetke ábden laıyq. Uly rejısser keshegi kóshpeli mádenıet pen HH ǵasyrdaǵy eń ozyq órkenıet qundylyqtaryn boıyna tereń darytqan, óz ultyn úlken júrekpen súıip ótken adal perzent retinde eliniń esinde qaldy. Sondyqtan qazaq kınosy men Sháken Aımanovtyń aty bir-birinen bólip-jarýǵa kelmeıtin bútin uǵymǵa aınalǵan. Ol óziniń jarqyn ómirinde qazaq kıno óneriniń tutas bir býynyn tárbıelep, Qazaqstan kınematografıster odaǵyn quryp, «Qazaqfılm» dep atalatyn zamanaýı jańa kınostýdııanyń irgetasyn kóterip ketti. Orta Azııadaǵy eń úlken túsirý alańdarynyń biri bolyp sanalatyn stýdııanyń áıgili kınosýretkerdiń esimin ıelengenine bıyl – 35 jyl.

Kınogerler qaýymy arasynda atalyp ótken mańyzy zor mereke aıasynda qurylyp otyrǵan murajaıdy Almaty qalasynyń ákimi Baqytjan Saǵyntaev, Mádenıet jáne sport vıse mınıstri Nurǵısa Dáýeshov kelip ashty.  Sh.Aımanov atyndaǵy Kıno murajaıynyń lentasyn «Qazaqfılm» AQ prezıdenti Arman Asenov pen KSRO halyq ártisi Asanáli Áshimov qıdy. «Kıno álemi – tereńine tartatyn sıqyrly álem. О́mirdegi qarapaıym jaǵdaıdy kórkem tásilmen jetkizetin erekshe óner. Kınonyń ár adamǵa unaıtyn, árbireýiniń júreginen oryn alatyn ámbebap óner ekenimen eshkimniń talasy joq. Keshe ǵana Qala kúni aıasynda halyqaralyq deńgeıde jumysyn bastaǵan Almaty kınofestıvali bizdiń kıno ónerimizdiń óristep kele jatqanynyń kórinisi dep bilemin. Kıno kúni qutty bolsyn! Sháken Aımanovtyń izin basqan jas kınogerlerge tabys tileımin» dedi qala ákimi.

Murajaıdyń ashylý saltanatynda sóz alǵan qoǵam jáne memleket qaıratkeri Oljas Súleımenov «Kıno úshin, kınony súıetinder úshin jaqsy zaman ornap tur. Búgingi dáýir myqtylardyń emes – aqyldylardyń dáýiri. Endeshe kıno men ádebıetke, jalpy mádenıetke jańa dáýirge saı qarym-qatynas ta basqasha bolýy kerek» dep Elbasy N.Nazarbaevtyń sózin óz oıymen sabaqtastyra, qoldaý bildirdi.

«Qazaqfılm» AQ jańa basshysy Arman Asenov kıno kúni aıasynda qazaq qýyrshaq anımasııasynyń  qurylǵanyna 50 jyl tolǵan qýanyshynyń da atalyp ótip otyrǵanyn aıtty.

Jıyn sońynda qala ákimi men kınogerler, zııaly qaýym ókilderi murajaıdy aralap, kıno jáne teatr maıtalmanynyń ómirinen syr shertetin mol málimetke qanyqty. Rejısserdiń temeki tutatatyn ottyq pen báki, pyshaq jınaǵan áýestiginiń belgisindeı, sórede samsap turǵan seksennen asa kezdik, elýge jýyq ottyq kelgenderdiń nazaryn birden aýdarady. Kózi tirisinde jumys istegen kabıneti de tutastaı murajaıǵa «kóship kelgen». Murajaıǵa Sh.Aımanovtyń sahnalyq kostıýmderi,  shyǵarmashylyǵynyń da, óziniń de jan serigi bolǵan qara dombyrasy, shahmat taqtasy, Stalındik syılyqtyń ıegeri ekenin kýálandyratyn buıryq pen papka, memlekettik nagradalary, basqa da ózi tutynǵan jeke zattary men buıymdar qoıylǵan. Jańadan esigin ashqan murajaı áli de tyń jádigerlermen tolyqtyryla túsedi.

ALMATY

 

Sońǵy jańalyqtar

Kitaphana kóbeıgen elde qylmys azaıady

Ádebıet • Búgin, 15:14

Zańsyz qarý-jaraq satqandar sottaldy

Qoǵam • Búgin, 12:50

Igerilgen ınvestısııanyń ıgiligi

Aımaqtar • Búgin, 12:37

Taraz: Bilim oshaǵyndaǵy zańsyzdyqtar

Aımaqtar • Búgin, 11:20

Abaıdyń dombyrasy qandaı bolǵan?

Abaı • Búgin, 11:09

Uqsas jańalyqtar