Qazaqstan Prezıdenti Qasym-Jomart Toqaev ulyqtaý rásiminde on negizgi baǵytty belgilep, olardyń bárin júzege asyrýǵa dereý kirisý kerektigin aıtty. Atap aıtqanda, halyqtyń tabysyn arttyrý jáne ál-aýqatyn jaqsartý, sybaılas-jemqorlyqqa qarsy tıimdi is-qımyldar jasaý, sot-quqyqtyq reforma, ádiletti áleýmettik saıasat, turǵyn úı máselesin sheshý, óńirlerdi damytý, tepe-teńdik jáne kópvektorly syrtqy saıasat, sondaı-aq jastardy qoldaý. Bul mańyzdy baǵyttyń barlyǵy Memleket basshysynyń saılaýaldy baǵdarlamasymen sabaqtasady. Prezıdent ulyqtaý rásiminde «Elimizdiń ár azamatynyń múddesin qorǵaý – meniń basty maqsatym. Olardy saıası kózqarastary men ustanymdaryna qaraı bólýge jol bermeımin. Túrli saıası jáne qoǵam qaıratkerlerinen kelip túsken qundy usynystardy, bastamalardy men óz jumysymda mindetti túrde eskeremin. Ashyq jáne ádil jumys isteımiz. Biz úshin eń mańyzdy mindet – zańǵa saı adal qyzmet etý. Bizdiń bir ǵana Otanymyz bar! Taǵdyrymyz – bir! Biz halqymyzdyń jarqyn bolashaǵy úshin bárimiz birge eńbek etemiz!» dedi.
Táýelsizdiktiń tuǵyryn nyqtap, el irgesin bekemdep, búgingideı beıbit kúnde jasap jatqanymyz, eldik jetistikterimiz – halyq birliginiń, tatý-tátti tirliginiń arqasy. El tizginin ustaǵan Qasym-Jomart Toqaev dál osy dástúrden aınymaı, áýelden aýyzbirlikti odan ári nyǵaıta túsý úshin qoǵam men bılik arasyndaǵy dıalogty damytýǵa den qoıdy. Mundaı dıalogtyń pikir alýandyǵyn moıyndaý negizinde ornaıtynyn qaperge alyp, «Ártúrli pikir – birtutas ult» qaǵıdatyn berik ustanǵan Prezıdent saılaý aldynda Ulttyq qoǵamdyq senim keńesin quratynyn aıtqan edi. El ishinde kóp talqyǵa túsken bul keńestiń kósheli bolatynyna kúmánmen qaraıtyndar da az bolǵan joq. Biraq kópshiliktiń kókeıinde júrgen kúrdeli máseleler kóteriletin, halyqtyń ozyq ıdeıalary men usynystaryn bir arnaǵa toǵystyratyn Ulttyq keńes jumysyn bastap, oǵan Memleket basshysynyń ózi tóraǵalyq etýi, talap-tilekterdiń qarastyrylyp, tıisti sharalar qabyldanýyn tikeleı qadaǵalaýyna alýy ájeptáýir senim uıalatty.
Qoǵamnyń túrli salasynda halyqty tolǵandyryp júrgen máselelerdi udaıy kóterip júrgen, ózindik oı-pikirleri qalyptasqan, kópshiliktiń senimine ıe bolǵan azamattar quramyna kirgen Ulttyq qoǵamdyq senim keńesiniń alǵashqy otyrysy 6 qyrkúıekte ótti. Bul keleli keńeste talqyǵa túsken túıtkildi máseleler túgelge jýyq Qasym-Jomart Toqaevtyń 2 qyrkúıekte Qazaqstan halqyna arnaǵan Joldaýynda kórinis tapqan deýge bolady. Sondyqtan da Prezıdent ortaq mindetter men saılaýaldy baǵdarlamasyn iske asyrýdyń jospary keńinen qamtylǵan bul Joldaýyn «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» dep atady. Iаǵnı, Joldaýda nazarǵa alynǵan basym baǵyttar halyqtyń syn-eskertpelerine negizdeldi. Memleket basshysy eldiń aldaǵy damý baǵdaryn aıqyndaǵan basty qujatta kórsetilgen bastamalardy osy Keńes sheńberinde pysyqtaýǵa jáne damytýǵa bolatynyn aıtty.
Jańa kezeńde damýdyń demokratııalyq úlgisin basshylyqqa alǵan Prezıdent Ulttyq keńes músheleriniń jergilikti bıliktiń qoǵam úshin qoljetimdi bolýyna múmkindik beretin «Ashyq ákimdik» tájirıbesin jappaı taratý týraly usynysyn qup kórdi. Bul máselege Joldaýynda toqtalǵan Memleket basshysy qanatqaqty joba retinde turǵyndar tarapynan jergilikti bılik jumysynyń tıimdiligin baǵalaý júıesin engizý qajet ekenin aıtty. Mysaly, eger saýaldama nemese onlaın-daýys berý nátıjesinde turǵyndardyń 30%-dan kóbi qala nemese aýyl ákiminiń jumysyn tıimsiz dep eseptese, bul Prezıdent Ákimshiliginiń arnaıy komıssııa quryp, týyndaǵan máseleni zertteýine jáne tıisti usynym engizýine negiz bola alady.
Qasym-Jomart Toqaev saılaýaldy naýqan barysynda óńir-óńirdi aralap, halyqtyń jaı-kúıimen etene tanysqan kezde biraz máselege qanyqqanyn jetkizdi. Onyń aıtýynsha, kóp jaǵdaıda azamattarymyz ortalyq jáne jergilikti organdar basshylarynyń qulyqsyzdyǵy men beıqamdyǵyna baılanysty Prezıdentke júginýge májbúr bolady. Sondyqtan Memleket basshysy birneshe ret Aqordada Nur-Sultan, Almaty, Shymkent qalalarynyń jáne oblys ákimderimen keńes ótkizip, halyqtyń ál-aýqatyn kóterý, olardyń quqyqtary men bostandyqtaryn, tynyshtyǵy men qaýipsizdigin qamtamasyz etý baǵytynda ónimdi jumys isteýdi tapsyrdy. Prezıdenttiń saılaýaldy baǵdarlamasynda, keıinnen Joldaýynda kórsetilgen «Qýatty óńirler – qýatty el» baǵyty osy maqsat-múddemen tyǵyz baılanysty.
Halyq áleýmettik jaǵdaılaryn alǵa tartyp, narazylyq bildirgende arty úlken daýǵa aınalyp, mıtıngter týraly zańnamany jetildirý qajettigi týraly másele kóterildi. Buǵan da zer salyp qaraǵan Memleket basshysy «Konstıtýsııaǵa sáıkes azamattarymyzdyń óz oıyn erkin aıtýǵa quqyǵy bar. Eger beıbit aksııalar zańnyń sheńberinen shyqpaıtyn jáne azamattarymyzdyń tynyshtyǵyn buzbaıtyn bolsa, buǵan túsinistikpen qarap, jıyndardy ótkizý úshin arnaıy oryn bólý qajet. Mundaı oryndar qalanyń shetinde bolmaýy tıis» dedi.
Prezıdent azamattyq qoǵamnyń saltanat qurýy úshin bıliktiń jaýapkershiligin arttyrý qajettigin aıtyp, memleketti basqarý júıesine erekshe mán berdi. Osy saladaǵy mańyzdy baǵyt – sybaılas jemqorlyqty joıý. Memlekettik qyzmettiń jumysyn júıeli etý, ashyqtyq pen ádildiktiń rólin arttyrý úshin Qasym-Jomart Toqaevtyń Memlekettik qyzmet isteri jáne sybaılas jemqorlyqqa qarsy is-qımyl agenttigin eki jeke vedomstvoǵa – Memlekettik qyzmet isteri agenttigi jáne Sybaılas jemqorlyqqa qarsy is-qımyl agenttigi etip qaıta qurý týraly sheshim qabyldady.
Joldaýda 2020 jyldan bastap memlekettik qyzmetshilerdiń sanyn birtindep qysqartyla bastaıtyny, únemdelgen qarajatty neǵurlym paıdaly qyzmetkerlerdi yntalandyrýǵa jumsalatyny kórsetildi. Sonymen qatar memlekettik qyzmettiń tıimdiligin arttyrý maqsatynda arnaıy daıyndyǵy bar jas kadrlardy tartý nazarǵa alyndy. Bul úshin Qasym-Jomart Toqaev Qazaqstan Prezıdenti janyndaǵy Jastar kadr rezervi jónindegi ulttyq komıssııa qurý týraly Jarlyqqa qol qoıdy. Bul Prezıdenttik jastar kadr rezervin qalyptastyrý maqsatynda quryldy. Buǵan qosa Memleket basshysy bıylǵy Jastar jylynyń jalǵasy ispettes 2020 jyldy «Volonterler jyly» dep jarııalap, eriktiler qyzmetine azamattardyń, ásirese jastardyń kóptep qatysýyna mán berdi. Bul bastamany Prezıdent azamattyq qoǵamdy nyǵaıtý jónindegi jumystyń mańyzdy quramdas bóligi dep sıpattady.
Memleket basshysynyń bastamalaryna kópshilik te oń baǵasyn berip jatyr. Redaksııamyzǵa hat joldap, qoldaý bildirip jatqan qalyń jurtshylyqtyń pikirleri osynyń aıǵaǵy.
