«Aq altyn» terimine shyqqan jergilikti aýyl turǵyndaryna kelisine 30 teńge tólenýde. Jınalǵan ónim «Qaraqyr» maqta qabyldaý pýnktine ótkizilmek. Byltyr aýdanda maqta óndiretin 5 zaýyt jáne maqta qabyldaıtyn 69 beket sharýalarǵa qyzmet kórsetken bolatyn. Bıyl da bul óndiris oryndary jıyn-terim naýqanyna daıyn. Kúzgi dala jumystaryn júrgizýge memleket tarapynan jeńildetilgen baǵamen bólingen 4420 tonna janar - jaǵarmaı sharýalarǵa taratylýda.
Jalpy bıyl maqtaaraldyq sharýalar 38 myń gektardan asa jerge maqta shıtin sepken. Byltyr aýa-raıynyń qolaısyzdyǵy men maqta zııankesteriniń kóp bolýyna qaramastan, aq altynnan 96 myń tonna ónim jınalǵan-dy. Ortasha ónimdilik 25 sentnerge áreń jetken bolatyn. Al, bıyl bul mejeden asý josparlanyp otyr. «Qazirgi tańda maqta alqaptarynda japyraqtardy qýratý jumystary bastalyp ketti. Aýdan boıynsha 7842 gektar ǵana maqtalyq alqap defolıasııalanǵan. Bul - óte tómen kórsetkish. Sondyqtan sharýalarǵa túsindirý jumystaryn barynsha júrgizýdemiz. Kúni keshe ǵana aýdan ákimi Baqyt Asanovtyń bastamasymen dál osy másele boıynsha semınar-keńes ótkizdik», - deıdi aýdannyń aýyl sharýashylyǵy bóliminiń basshysy О́ser Myrzamdanov.
Naýqanǵa daıyndyq barysynda kombaındarǵa jóndeý jumystary júrgizilgen. Qosymsha aýdanǵa AQSh-tan 16 «Djon-Dır» maqta terim kombaıny satyp alynǵan. Jalpy jyl basynan beri maqtaaraldyq dıqandar lızıngke jáne óz qarjylaryna 414 mıllıon teńgege 40 jańa tehnıka alǵan.
Túrkistan oblysy
