Úkimet • 19 Qyrkúıek, 2019

Úkimette «100 naqty qadam» Ult josparyn iske asyrýdyń aralyq qorytyndylary shyǵaryldy

101 ret kórsetildi

Premer-Mınıstr Asqar Mamınniń tóraǵalyǵymen jáne Parlament Májilisiniń Tóraǵasy N. Nyǵmatýlınniń qatysýymen ótken Jańǵyrtý jónindegi ulttyq komıssııanyń otyrysynda «Tuńǵysh Prezıdent – Elbasy N.Nazarbaevtyń bes ınstıtýsıonaldyq reformasyn iske asyrýdyń 100 naqty qadamy» Ult josparynyń oryndalý barysy qaraldy. Bul týraly primeminister.kz habarlady. 

«100 naqty qadam» Ult josparyn júzege asyrý Elbasynyń jeke baqylaýynda. Memleket basshysy Q. Toqaev Qazaqstan halqyna arnaǵan Joldaýynda Elbasy qurǵan Jańǵyrtý jónindegi ulttyq komıssııanyń jumysyn qaıta bastaýdy tapsyrdy. «100 naqty qadam» Ult josparynyń oryndalýyn baqylaý mindeti el Parlamentindegi Nur Otan partııasy fraksııasynyń aldyna da qoıylǵan. Qazirgi shynaıylyqtardy jáne ózgerip jatqan jaǵdaıdy eskere otyryp, biz barlyq kúsh-jigerimizdi úılestirip, Ult josparynyń qadamdaryn iske asyrý boıynsha qazirgi tásilderdi qaıta qarap, jumysty jandandyrýymyz kerek», - dedi A. Mamın.

Búgingi tańda Ult josparynyń 100 qadamynyń 58-i oryndalyp, baqylaýdan shyǵaryldy, 3 qadam «Rýhanı jańǵyrý» baǵdarlamasy aıasynda júzege asyrylyp jatyr jáne Qoǵamdyq sanany jańǵyrtý jónindegi ulttyq komıssııanyń baqylaýynda.

Qalǵan 39 qadamdy iske asyrý barysy týraly Ulttyq ekonomıka mınıstri R. Dálenov, Memlekettik qyzmet isteri agenttiginiń tóraǵasy A. Jaıylǵanova, Aýyl sharýashylyǵy mınıstri S. Omarov, Indýstrııa jáne ınfraqurylymdyq damý mınıstri B. Atamqulov, Syrtqy ister mınıstri M. Tileýberdi, Saýda jáne ıntegrasııa mınıstri B. Sultanov, Energetıka mınıstri Q. Bozymbaev, Premer-Mınıstrdiń birinshi orynbasary – Qarjy mınıstri Á. Smaıylov jáne Úkimettiń birqatar músheleri baıandady. 

Premer-Mınıstr keıinnen Memleket basshysy Q. Toqaevqa bekitýge jiberý úshin Ulttyq ekonomıka mınıstrligi usynǵan Jol kartasy men Jańǵyrtý jónindegi ulttyq komıssııanyń jumys josparynyń jobalaryn bir apta ishinde qaraýdy tapsyrdy.

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar