Alqaly jıynǵa qatysýshylar aldynda Qaraǵandy oblysy ákiminiń orynbasary Abzal Núkenov quttyqtaý sóz sóıledi. «Ádebıet – bul halyqtyń tólqujaty», dep atap ótken ol jańa tehnologııalar ǵasyrynda kitap oqýdyń adam ómiriniń barlyq qyrlarynda mańyzdy ról atqaratynyna nazar aýdardy.
– Zamanaýı ádebıet jastarǵa tartymdy bolýy kerek. «Rýhanı jańǵyrý» baǵdarlamasynyń kózdegeni de osy, – dedi oblys ákiminiń orynbasary.
Odan keıin sóz alǵan Qazaqstan Jazýshylar odaǵy tóraǵasynyń orynbasary Baqyt Bedelhan uıym tóraǵasy Ulyqbek Esdáýlettiń quttyqtaý hatyn oqyp berdi. Sonymen qatar ol jergilikti aqyn Janat Jańqash, Oljas Qasym jáne basqa da jas ádebıetshilerge Qazaqstan Jazýshylar odaǵynyń múshelik bıletterin tabys etti.
– Taıaýda astanamyzda Azııa elderi jazýshylarynyń úlken forýmy ótti. Qaraǵandy forýmyn sonyń jalǵasy dep baǵalaýǵa bolady. Bul jıyndy ádebıetshilerdiń óte ýaqtyly uıymdastyrylǵan jáne asa qajetti kezdesýi dep senimmen aıtýǵa bolady. Biz bárimiz birge zamanaýı ádebıettiń bolashaǵyn anyqtaı alamyz dep oılaımyn, – deı kele Baqyt Bedelhan forýmdy uıymdastyrǵan oblys basshylyǵyna alǵys sezimin bildirdi.
Forýmda sóz sóılegen aqyn Israıl Saparbaı «Rýhanı jańǵyrý» baǵdarlamasynyń mán-mańyzyna basa nazar aýdardy.
– «Rýh» degenimiz ol – adamnyń jan dúnıesi. Biz ony durys túsinýimiz kerek. Bul búkil halyqtyń rýhanı jańǵyrýyn bildiredi, – dedi aqyn.
Sondaı-aq alqaly jıynda Sáken Seıfýllınniń 125 jyldyǵy men «Egemen Qazaqstan» gazetiniń 100 jyldyq mereıtoıyna baılanysty basylym basshysy Darhan Qydyráli baıandama jasady.
– Halqymyzdyń maqtanyshy Sáken Seıfýllınniń 125 jyldyǵy bıyl óziniń 100 jyldyq mereıtoıy ústindegi «Egemen Qazaqstan» úshin eleýli oqıǵa. Sebebi aqyn kezinde «Eńbekshi qazaq» – qazirgi «Egemen Qazaqstan» gazetinde eńbek etken. Basylym betinde ózekti máselelerdi kóterdi. Mysaly gazette «Qazaq» atyn qaıtarý, qazaq tiliniń mártebesin kóterý týraly ótkir materıaldar jazǵany belgili. Ahańnyń – Ahmet Baıtursynulynyń 50 jyldyǵyn keń kólemde atap ótýge bastamashy bolǵan. Iаǵnı, Sákendi naǵyz alashshyl tulǵa dep ataýǵa ábden bolady, – dedi Darhan Qydyráli.
Alqaly jıynnyń ashylýynda qonaqtar aldynda Jaqsykeldi Kemalov, Serjan Musaıyn sııaqty belgili ónerpazdar Sákenniń, Qasymnyń ánderin shyrqady.
Forýmnyń saltanatty ashylýynan keıin «Qazirgi zaman qazaq ádebıetiniń bet-beınesi jáne róli» atty taqyrypta dóńgelek ústel uıymdastyryldy. Munda sóz sóılegen aqyndar Serik Aqsuńqaruly, Gúlnár Salyqbaı, Baqyt Bedelhan, Maraltaı Raıymbekuly, Tanakóz Tolqynqyzy, «Egemen Qazaqstan» gazetiniń basshysy Darhan Qydyráli, jazýshy Aıagúl Mantaı, ádebıettanýshy Jansaıa Jarylǵapov qazirgi qazaq ádebıetindegi qadaý-qadaý máselelerge toqtalyp, ózderiniń qundy usynystaryn aıtty.
Mysaly Darhan Qydyráli ádebıette syn janryn damytý kerektigin qozǵasa, aqyn Serik Aqsuńqaruly qalamaqy máselesine nazar aýdaratyn kez jetkenin aıtty. Tanakóz Tolqynqyzy aýdarma janrynyń bizdiń ádebıet úshin asa mańyzdy janr ekendigine basa mán berdi. Al ǵalym Jansaıa Jarylǵapov osyndaı jıyndarǵa ádebıettanýshy mamandar da qatyssa degen tilegin bildirdi.
Jalpy aqyn-jazýshylar bas qosqan jıyn asa qyzyqty jáne paıdaly pikirtalas úrdisimen órbidi. Forým qonaqtary aıtqan kókeıge qonymdy ıdeıalar men utymdy usynystardyń jıynnyń mańyzyn arttyra túskenin de atap ótken lázim.
Búgin forým qonaqtary Qaraǵandynyń mańyndaǵy Dolınka kentinde ornalasqan saıası qýǵyn-súrgin qurbandaryn eske alý murajaıyna ekskýrsııa jasaıdy. Budan bólek aqyn-jazýshylar kenshiler astanasyndaǵy stýdent jastarmen kezdesýler ótkizedi. Sondaı-aq forým qonaqtary semınarlar men trenıngterge, sheberlik sabaqtary jáne kitap tusaýkeserlerine qatysady. Baǵdarlama jospary boıynsha alqaly jıynnyń jumysy jergilikti ónerpazdar kúshimen qoıylatyn gala-konsertpen túıindelmekshi.
QARAǴANDY
