Rýhanııat • 20 Qyrkúıek, 2019

Gobelen – tekti ónerdiń týyndysy

52 retkórsetildi

Bátıma Záýirbekova, sýretshi-gobelenshi, Qazaqstannyń eńbek sińirgen qaıratkeri, Memlekettik syılyqtyń laýreaty

– Bátıma Esmuratqyzy, 1970 jyldardan bastalǵan Qazaq­stan gobelen óneri tarı­hynyń tutas bir kezeńi sizdiń esimińizben baılanysty. Sizdi «gobe­lenniń anasy» dep ardaq tutamyz. Qolóner keshe de ózek­ti edi, qundylyǵyn búgin de joǵaltqan joq, tańsyq óner­diń búgingi tynysyn ba­qy­lap otyrasyz ba, qalaı da­myp keledi?

– Áý basta ónerge kelýime anam Búbihan sebepker bolǵanyn erterektegi suhbattarymnan bas­tap aıtyp kelemin. Anam on saýsaǵynan óner tamǵan óte is­mer adam boldy. Janaryńnyń aldynda jaınap jatatyn kózdiń jaýyn alar quraq kórpelerin aıtpaǵanda, oıý oıyp, syrmaq syrý, kıim tigý sııaqty shydam men sheberlikti qajet etetin qıyn sharýany tańdap-talǵap jatpastan, aýyl áıeline tán beınetqorlyqpen bel jazbaı júrip atqara beretin. Bala kúnimde Jambyl oblysy Mo­ıynqum aýdanyndaǵy biz turǵan Fýrmanovka aýylynyń qaı úıine barsań da, jún tútilip, urshyq ıirilip, kıiz basylyp, áıelder qaýymy qaýyrt tir­lik­tiń qamynda qarbalasyp júretin. Kishkentaı kúnimnen osynyń bárin kórip, apalaryma qolqabys jasap óstim. Birde jýrnal paraqtap otyrǵan anam muqabadaǵy Gúl­faırýs Ismaılovanyń sýre­tin alaqanymen aıalaı sıpap ótti de: «sen de Gúlfaırýs sııaq­ty sýretshi bolsań ǵoı, ádemi qyz­darǵa sýretshi bolý jarasady eken», dedi. Ishki oıym Jam­byldaǵy mádenı aǵartý ýchı­lıshesiniń mýzyka fakýlteti bolsa da, mektep bitirgen soń amalsyz anamnyń aıtqan sózin jerge tastaı almaı, týysymyzdyń úıiniń mekenjaıy jazylǵan bir japyraq qaǵaz ben eki sómkemdi kótergen kúıi Almatyǵa keldim. N.Gogol atyndaǵy kórkemsýret ýchılıshesine qujat tapsyrýǵa kelgende, dırektory Aqyrap Jubanovtyń qýanyshynda shek bolmady. Balasha qalbalaqtap: «bizdiń ýchılıshege kelgeniń jaqsy boldy, munda qyzdar az oqıdy, qazaq qyzdary múlde at izin salmaıdy» dep quraq ushyp qarsy alyp, ornalasýyma ózi kómektesti. Syrly sezimge toly sulýlyq áleminiń esigi alǵash osylaı ashylyp edi. Sodan beri elý jylǵa jýyq ýaqyt ótti. Bul óner damýdyń barlyq kezeńin bastan keship keledi. О́rkendegen de, quldyraǵan da kezi boldy, biraq qolóner qandaı máńgilik bolsa, gobelen de ómirsheńdigin joǵaltqan emes.

– Lvov joǵary oqý ornyn bitirgen qazaq gobeleniniń irgetasyn qalaǵan ustazyńyz Qu­rasbek Tynybekovpen jo­lyq­­paǵanda, sizdiń gobelen­shi bolmaýyńyz da múmkin be edi?

– Men – sýretshimin, al gobelenmen aınalysý úsh uıyqtasam túsime kirme­gen. Gobelenshi Qu­rasbek Tyny­bekov týraly alǵash Aqyrap Qudaı­bergenulynyń  aýzynan estigen edim. Qazaq mýltfılminiń atasy Ámen Qaıdarov birde bizdiń ýchılıshege arnaıy kelip, jumysymyzben tanysyp, birneshe sýret­shini «Qazaqfılmge» mýltı­plık­a­torlyqqa tańdap aldy. Solardyń quramynda men de kınostýdııaǵa jumysqa ornalasyp kettim.  Árbir shyǵarmashylyq adamy ishteı erkindikti, oı, sana erkindigimen birge ýaqyt erkindigin de qalaı­tyny belgili ǵoı, tártipke baǵy­nyp júrip-turatynyna tósele almaı solqyldap júrgen maǵan bolashaǵymnan úmit kútken janashyr áriptesterimniń «mýl­tıplıkasııalyq taqyryptar aıasynda ǵana shektelip qalasyń ba?» degen sózi qamshy bolyp tıip, kásibimniń baǵytyn basqa arnaǵa burýǵa ózim de oqtalyp júrgenmin. Aqyry Moldahmet Kenbaev aǵamyzdyń aqylymen «Qazaqfılmnen» ketip, «О́ner» kombınatyna jumysqa ornalastym. Al «О́ner» ol ýaqytta naǵyz shyǵarmashylyqtyń qyz-qyz qaınap jatatyn qara qazany bolatyn. Taǵy da sol kisilerdiń keńesimen Q.Tynybekovpen ta­nysyp, bir apta janynda tapjylmaı otyryp, gobelen toqý­dyń tehnıka-tásilderin úırendim.

– Siz memlekettik syılyq­ty 34 jasyńyzda ıelengen ekensiz. Bıik dárejedegi syı­lyq­ty kezek kútip ıelenetin keshegi aqsaqaldyq ólshemmen alsaq ta, eshkim eshnársege tańyrqamaıtyn búgingi ózgeris turǵysynan qarasaq ta, tym tosyn jaǵdaı. Memleketten munshama bıik dárejedegi ataq alýyńyzdyń syry búgingi oqyrmanǵa da qyzyq, óz aýzy­ńyzdan estip, qulaǵdar bol­ǵanymyz jón shyǵar?

– Qazaqqa tańsyq ónerdiń qyr-syryna ózimshe boılap, jekelegen kishigirim tapsyrys­tardy qyzyǵa oryndap, kombınatta jumys istep júrgenimde, taǵdyryma beder salatyn tarıhı máni bar tartý kútip turǵanyn ol kezde oılaǵam joq, árıne. Baq ta, basqasy da adamǵa kútpegen jerden, tospaǵan tustan keledi eken, aıaqasty túsken tapsyrys, tapsyrys bolǵanda da, Or­talyq Komıtettiń ózinen tús­ken adam aıtsa nanǵysyz asa aýqymdy tapsyrysqa alǵashynda ózim de tosyrqap qaradym. Alaıda bul jańadan úırengen ónerime birinshi kúnnen bas­tap jaýapkershilikpen qaraýǵa mindettedi. Tórt sýretshige: Q.Ty­­nybekov, I.Iаrema, E.Nı­kolaeva jáne maǵan sol ýaqyt­taǵy eń bıik  ǵımarat – «Qazaq­stan» qonaqúıiniń tómengi qabatyn aınaldyra 100 sharshy metr gobelen toqý tapsyryldy. Biz jumysqa tyńǵylyqty daıyndaldyq, aldymen eskızin jasadyq, ony Úkimet qarap, bekitti. Janymyzǵa bes-alty kómekshi alyp, on adam toqýdy bastap kettik. Basqa jaqqa moıyn buratyn ýaqyt bolmady, kúndiz-túni tek toqýmen aınalystyq. 1977 jyly bastalǵan jumysty bel jazbaı otyryp eki jyl toqyp, 1979 jyly aıaqtadyq. Qazaqstan Sýretshiler odaǵy tórteýimizdi de Memlekettik syı­lyqqa usyndy. Syılyq gobelen men sýretten arnaýly bilim alǵan Qurasbek ekeýmizge berildi.

– О́zgelerdiń tarapynan ókpe bolmady ma? Qalaı de­gen­men, bul jobada qolóner­shil­erdiń úlken toby jumys iste­di ǵoı...

– Joq, keýdede syzy qala­tyndaı kóńilsiz jaǵdaıdyń bolǵany esimde joq. Ortaq jumysty abyroımen atqaryp shyqqan onymyzǵa da Ortalyq Komıtet alǵysyn bildirdi. Bul jyldary júzge jýyq sýretshiniń páterge qoly jetip, pátermen birge sheberhanasyn qosa ıele­nip, kóńili toq júrgen kez. «Ves­novka» atalǵan ózenniń bo­ıyndaǵy sýretshilerdiń bıik úıinde kileń qylqalam ıeleri men músinshiler bir-birimizben kórshi turdyq. Biraq myna bir jaǵdaı eshqashan esimnen ketken emes. Qalaǵa kelgenine qansha jyl bolsa da, sambyrlap sóılep, sańqyldap kúletin aýyl balasyna tán qarapaıym minezinen ajyraı almaǵan Qurasbek kórshim bir kúni keldi de: «Eı, Bátıma, biz usynylyp jatqan myna Memlekettik syılyqty alsaq bar ǵoı, óle bersek te bolady», dedi jelpinip turyp. Jas adamnyń ólim týraly aıtqany maǵan sondaı qorqynyshty kórindi, tap qazir ajal kelip janymyzdy alatyndaı eki kózim alaqandaı bolyp: «Qyzyqsyń ǵoı, Qurasbek, ataq alǵannan keıin adam qyzyǵyn kórmeýshi me edi? Ala salyp, ajal qushatyn bolsaq, ondaı syılyqtyń maǵan keregi joq» dep ursa jóneldim. Adamǵa ajal týraly aıtqyzǵan kezde, Alla sezdiredi deıtin sóz ras bolýy kerek, elimizdiń eń joǵarǵy ataǵyn tym jas ıelen­gen Qurasbek kelesi jyly oqys jaǵdaıda kóz jumdy. Osy jaǵdaıǵa áli kúnge tańyrqaımyn. О́zi de tynymsyz, óte eńbekqor jan edi, ǵumyry qysqa bolsa da, gobelen deıtin ónerdi kópke tanytyp, ólsheýsiz is tyndyryp ketti.

– Siz gobelenmen aınalysa bastaǵan kezde bul ónerdiń tóńiregine úıirsektegender kóp emes edi, sodan beri elý jyl ótse de, úırengisi kelip jaly­na qol artqan jasty kóp dep aı­­ta almaımyz. Jas býyn qıy­n bolǵan soń aınalysqysy kelmeı me?

– Ras, jipke jan bitirý ońaı emes, gobelen – óte qıyn óner. Qylqalammen sýret salý bir basqa, qyzyldy-jasyldy jipterdi jıi-jıi almastyra, bir tústi ekinshi túspen  úndestire otyryp túrlendirip órmek toqý ol múlde bólek óner. Tapsyrystyń aýqymy mol, qolónershi eńbegine degen suranys joǵary boldy. Alaıda belgili sýretshi Aısha Ǵalymbaevanyń aıtqan aqyly qulaǵymnan eshqashan ketpedi. «Aqsha úshin jasala beretin usaq-túıek sharýany qaıtesiń, Bátıma, sen mańyzy bar kórmelerge qatys, seni kásibı maman retinde damytatyn, shyǵarmashylyǵyńdy ósiretin ispen aınalys. Úlken kórmelerge qoıylatyn salmaqty týyndylardy kóbirek jasa, sonda sen mynandaı bolasyń» deıtin marqum bas barmaǵyn aýaǵa bilep. Sodan beri respýblıkalyq, halyqaralyq deńgeıde ótkiziletin kórmelerden syrt qalyp kórgen emespin. Alǵash ret Máskeýde ótken úlken kórmege 1976 jyly kýrstasym Kamıl Molashev ekeýmiz qatysyp, dıplomant atandyq. Sol kórme jetistigi men jeńisi mol keleshekke jol ashqandaı boldy. Ol ýaqytta ta­qyryptyq kórmeler kóp jáne jıi ótetin. Aıy-kúniń jetip turǵan aıaǵyńnyń aýyrlyǵyna qaramastan úıden shyqpaı, tańdy tańǵa uryp, gobelen toqyp,  kórmege daıyndalý kúndelikti tirshilik yrǵaǵyna aınalady. Búgingi jastardyń ilýde bireýi bolmasa kópshiligi mun­shama júktemege shydamdylyq tanyta almaıdy.

– Jańa zaman úlgisimen jasalsa, alasha, syrmaq, teke­met­teri­miz de tórimizdi jaınatyp jiberetin kún týar edi, átteń, búgingi tal­ǵamǵa beıimdele al­maı, onyń ústine baǵasy da qym­­bat bolyp, qaltarysta qa­lyp keledi. Al gobelen óneri eskir­mek túgili ýaqytpen birge túrlenip, zamanaýı dızaın men ınterermen ádemi úılesim ta­ýy­p, sándik qoldanbaly buıym retinde mańyzyn artty­ryp keledi. Suranysqa qan­shalyq­ty ıe?

– Negizi, orta ǵasyrda aǵaıyn­dy Gobelender negizin salyp, osy ónerdiń sońynda júrip sý qarańǵy soqyr bolyp qalǵanymen, fransýz halqy olardyń ónerin bıik­ke kóterip, ulttyq óner etip qalyptastyrdy. Gobelen – tekti ónerdiń týyndysy. Ol erte zamanda  aqsúıekterdiń súıikti óneri bolyp sanalatyn, qunyn qymbat ustady, sol dáýirde ómir súrgender jarasymdy-ja­ǵymdy aýra beretindigi úshin erekshe áspetteı bildi. Ony­men patshanyń saraıyn, baı-baǵlandardyń úıin bezendiretin. Tastan salynǵan záýlim saraılar salqyn bolatyndyqtan qabyrǵasyna jylý berý úshin kerege tusyna gobelen ilinetin. Gobelen eshqashan aıaqtyń astynda jatpaıdy, ol tek tórge ilinedi. Alaıda dál fransýzdar sekildi «gobelen» dep atamaǵanymen, qazaqtar bul ónerdi atam zamannan meńgerip, turmysynda keńinen paıdalanǵany shyndyq. Biraq kásibı túrde aınalysqan Qurasbekke deıin oǵan  óner retinde asa mán berilmedi. Aıt­paqshy, biz, gobelenshiler osy ónerdiń arqasynda biraz eldi sharladyq. Mysaly, gobelenniń otany Fransııaǵa barǵanda fran­sýzdardyń meniń ashyq tústi, boıaýy qanyq týyndylaryma qy­zyqqany sonsha, adamnyń basyn aınaldyratyn ýádesin úıip-tógip, sol topyraqta qalýymdy ótindi. Iran, Baltyq boıy el­deri, Ázerbaıjanda, Reseıde bul óner aıryqsha damyǵan, basqa da keńestik eldiń bárinde ortalyqtan qamtamasyz etilip, erekshe kóńil bólindi.

– Sizdiń ózge áripteste­ri­ńiz­­den ereksheligińiz, úsh túrli ómir saltynyń: keńestik, shet­eldik jáne táýelsizdik zama­nyn­daǵy ómirdiń kýási bolyp, sol ty­nys­pen jumys istege­ni­ńiz bolar. Túrkııada bir­neshe jyl ómir súrip, túrik aǵaıyn­dar­ǵa gobelen óne­rin úıre­tip qaıt­qannan keıin shy­ǵarma­shy­­lyǵyńyzda ózgeris boldy ma?

– Táýelsizdik alǵannan keıingi jyldardyń bastapqy qıyndyǵy ásirese ómirge ıkemsizdeý jaral­ǵan óner adamdaryna aýyrlaý tıgeni belgili. Biraq jasymnan eńbekpen shıratylyp óskendigimnen bolar, týyndy jasamaq túgili tamaq tabý qıynǵa soqqan kezeńde jip shıratqan jumysymdy bir kún qańtaryp qoıǵan emespin. Shaǵyn bolsa da, tapsyrystar túsip jatty, shamam kelgenshe shyǵarmashylyǵymdy toqyratpaýǵa tyrystym. 1995 jyly Túrkııada Qazaqstannyń mádenı kúnderi ótetin bolyp, Mádenıet mınıstrligi sol kúnderdiń aıasynda uıym­das­tyrylatyn kórmege qaty­sýymdy surady. Ult pen qol­óner – egiz uǵym, áýelden shyǵarma­shy­lyǵymnyń temirqazyǵy qazaqy tanymǵa negizdelgen. Sol sebepti bolar, ártúrli ıdeıadaǵy týyndylarymnan jasalǵan toptamany túrik baýyrlar jyly qabyldap, ónerimniń aldaǵy jańa belesin belgilegendeı boldy. Ol ýaqytta iri óner ortalyǵy sanalatyn Almatynyń ózinde sýret galereıa­lary joqtyń qasy edi, al Ankara qalasynda 120 galereıanyń bolýy meni qatty tańyrqatty. Eki jyl ótken soń 1997 jyly taǵy da Ankara mýzeıinde je­ke kórmemniń ashylǵany sol edi, birneshe galereıanyń qojaıy­ny bir mezette júgirip keldi. О́tinishi bireý ǵana: «Kórmeńizdi bizde ótkizińiz!» Ne kerek, Túr­kııada ótkizgen úsh jylym shy­ǵar­mashylyq tabysqa toly, bir kórmemdi ótkize salyp, ekinshi kórmege qaýyrt kirisken bel­sendi jumys yrǵaǵyna qu­rylǵan jemisti jyldar boldy. Natıýrmort, tabıǵat, taý,  kórinisteri, gúl, arý qyz, ádemi áıel, ulttyq tól tanymnan týǵan gobelenderim pyshaq ústinen úlesip alatyn dúkenniń buıymy sekildi jedel satylyp jatty. Túr­kııaǵa kelisimen birden kes­kin­deme ónerine qaıta oralyp, jumys, negizinen, osy baǵytta órbidi.

Birde elshiliktiń uıymdas­tyrýymen endi ashylǵaly jatqan kórmeme búkil jumysymdy ornalastyryp bolyp, el kelgenshe ázirlenbekke úıge ketip, qaıtyp oralsam, gobelenderimniń jartysyna jýyǵynyń etek tusyna bireý dóńgelektep qyzyl tańba salyp tastapty. Qorqyp kettim. Dereý uıymdastyrýshyny taýyp alyp, túsindirýin suradym. Ol jaı ǵana jymıyp: «sizdiń tańba salynǵan sýretterińizdiń bári de satylyp ketti» deıdi. «Qalaısha? Kórme áli ashylǵan joq qoı». «Bizdiń klıentterimizdiń bári de iri bankırler men bıznesmender. Tártip boıynsha olar kórme ashylmaı turyp eki saǵat buryn shaqyrylady. Mártebeli meımandarymyz kórmeni birinshi bolyp aralap, birinshi bolyp tańdap, unaǵan týyndysyn birinshi bolyp satyp almasa, bizge ókpelep qalady, galereıamyzǵa kelmeı qoıýy da múmkin», dedi. Bul men úshin jańalyq edi. Sapaly oryn­dalǵan tyń týyndy ónerdegi shynaıy básekelestikke jol ashyp qana qoımaı, marketıng qalyptastyratynyna birinshi ret kóz jetkizdim. Táýlikti táýlikke jalǵap jumys istep, kórmedegi týyndylarymdy ústi-ústine tolyq­tyryp, birinen keıin biri shaqyrǵan galereıalarda besinshi, toǵyzynshy kórmemdi ashýǵa áreń úlgerip júrdim. Túrik kásip­kerleri kórmemdi uıymdas­ty­ryp qana qoımaı, 1000 danamen katalog shyǵaryp berdi. Ár kórmeme BAQ ókilderiniń mol shoǵyryn shaqyryp, keń kólemde nasıhattalýyna mán bere­tin. Kelgen meımandarǵa arnap mol dastarqan jaıady. Mine, sýret­shige degen qurmet! Olar sýretshige erekshe iltıpatty. Bir­de Qazaqstan elshiligi birqa­tar sýretshilerdiń arasynda «Túrkııa Prezıdenti Súleımen Demırel – Túrkistanda» degen taqyrypta shaǵyn baıqaý jarııa­lady. Salynǵan kartınalardyń ishinde elshilik qyzmetkerlerine meniń jumysym unaǵan eken, «S.Demırel – Túrkistanda» degen týyndym búginde Túrkııa elindegi iri mýzeılerdiń birinde ilinip tur.

– Aıtalyq, sýretshiniń týyn­­dysy qaıtalanbaýymen, bir-aq ret jazylýymen qundy. Al go­­belen she? Bilýimizde, siz­diń «Baqyt qusy» degen gobe­leni­ńizdiń birneshe kóshirme nus­qasy bar...

– Bárin de tutynýshynyń suranysy sheshedi. Gobelenniń beıneleý ónerinen aıyrmashy­lyǵy, bir týyndy birneshe kó­shir­mege deıin jasala beredi. Biraq týyndynyń kóshirmesi jasalǵanymen, aına-qatesiz dál sol kúıinde qaıtalanbaıdy. Kompozısııa  ózgeriske túsedi. Gobelenderimniń ereksheligi, óte kóp boıaý túrin jáne sapaly jipterdi ǵana qoldanamyn. Bir jumystyń ózinde 100-150-ge deıin boıaý túsi paıdalanylady. Boıaýdyń ár túsiniń óz «tili» bar, ornymen qoldanǵan boıaý sóılep turady. Keıde on santımetr sýrettiń ishinde bes-alty tústi boıaý bir-birimen jalǵasyp jatady. Gobelendi gobelen etetin mańyzynyń ózi sonda, boıaýdyń túri kóp bolǵan saıyn kartına ajarlanyp, tartymdylyǵy arta túsedi. Jumystarymdy serııaǵa bólip jasaıtyn maǵan bir taqyrypty birneshe nusqada salǵan unaıdy. Mysaly, adam­nyń baqytqa yntyqtyǵyn bildi­retin «Baqyt qusyn» ǵana emes, san ǵasyr boıy sáýlet óne­riniń jáne tutas mádenıettiń gúl­denýine únsiz kýá bolyp kele jat­qan Ahmet Iаsaýı kesenesi men Túrkistan qalasyn da ártúrli nusqada, alýan túrli boıaýlar gammasyn  paıdalana otyryp, salyp kórdim. Sol sekildi óte kóne dáýirlerdiń kúmbiri ispetti petroglıfter «Tastaǵy tańbalar» bolyp birneshe ret qaıtalap salyndy.

– Tutynýshylar tarapynan qandaı jumystaryńyz kóbirek suranysqa ıe?

– Basyna sáýkelesi jarasqan arý, kımeshegimen kóz tartqan kelinshek, jalpy qynama bel kamzol, jelbir etek kóılek kıip, ulttyq saltanatymyzdy asyrǵan áıelderdiń tutas gal­e­reıasyn túzgenimdi meniń shyǵar­­mashylyǵymmen tanys adamdar jaqsy biledi. Mine, osy toptamadaǵy týyndylar birinshi kezekte suralady. Al sheteldikterdiń qyzyǵatyn ta­qy­ryptary bólek. Mysaly, «Quraqtar» degen jumysymdy sheteldikter jaqsy kóredi. «Jibek joly», «Baqyt qusy», «Ahmet Iаsaýı» atty polotnolaryma, qazaqtyń dastarqanymen baılanysty natıýrmorttarǵa kóbirek qyzyǵyp jatady. Ár gobelenshiniń stıli, toqý tehnıkasy ártúrli. Men klassıkalyq taqyr úlgide toqımyn, ártúrli materıaldy aralastyryp toqýǵa eshqashan áýestengen emespin. Kompozısııa qurǵan kezde qara­paıym beıneni sol kúıinde kó­shire salmaımyn, men úshin ne nárseniń de kórkem bolýy basty orynda, mindetti túrde stılge beıimdep, ásem etip usynýǵa tyrysamyn. 2008 jyly Astanada ótken avtorlyq kórmemniń ashylý saltanatynda aqyn Farıza Ońǵarsynova quttyqtap turyp: «Bátıma, men saǵan rızamyn. Osy ýaqytqa deıin kórmelerden, sýretshilerdiń shyǵarmalarynan kórip júrgen qyzdardyń báriniń kózderi syǵyraıyp, solǵyn tartyp turýshy edi, bir túrli su­ryqsyz kórinetin. Al sen salǵan qyzdardyń kózderi botanyń kózindeı móldir, ashyq, tuńǵıyq, naǵyz qazaq qyzdaryn kóremin. Rahmet saǵan» degen edi. Bul – men úshin úlken baǵa.

– Aqyn qurbyńyz Kúlásh Ahmetova «Bátımanyń qolóneri – gobelen, Bátımanyń gobeleni – aq óleń» dep jyrlaǵan eken. Dáýitáli Stambekovshe aıtsaq, «Ámirimen jipterdiń kún shy­ǵaryp, Túskilemniń betinde tań atyrdyńyz». Jiptiń sıqy­ryna jumsaǵan qýattyń ornyn qalaı toltyrasyz?

– Kez kelgen shyǵarmashylyq adamy mazalaǵan ishki oıyn iske asyryp, jumysyn kóńildegideı aıaqtap bolǵan soń jan saraıy ashylǵandaı rahat kúı keshedi. Sonymen birge jumsalǵan qýat­pen birge jan qazynasynyń da ortaıyp qalatyny bar.  Ol mindetti túrde oqýmen, izdenýmen tolady. Sýret salǵanda, gobelen toqýǵa otyrǵanda mindetti túrde Ermek Serkebaevtyń, Nur­­ja­mal Úsenbaevanyń, Maı­ra Muhamedqyzynyń, Talǵat Kúzenbaevtyń, Bolat Bókenovtiń, jas bolsa da álemdi tamsantqan Dımash Qudaıbergen men kish­kentaı Erjan Maksımniń ánderin tyńdaımyn, olardyń tula bo­ıyńdy shymyrlatatyn keń tynysty ánderi, áýezdi, syrly, sıqyrly úni meniń shabytymdy sharyqtata túskendeı bolady. Osy ýaqytqa deıin eki qolym aldyma syımaı bos sendelip júrgen kúnim bolmapty. Kúnuzaq sheberhanadamyn. Qudaıdyń maǵan densaýlyq, kúsh-qýat bergenine otyrsam da, tursam da myń shú­kir aıtamyn. Boıyńda qýatyń tasyǵan jastyqtyń qadirin bilip, ishimdegi ónerimdi, oıymdy júzege asyrýǵa múmkindik bergen Allama rızamyn. Jumysymdy aıaqtap bo­lyp, qyzyldy-jasyldy boıaý­ǵa malynǵan, kóz arbaıtyn týyndynyń maǵan qarap turǵan­daǵy rahatyn tilmen aıtyp jetkize almaımyn.

– Áńgimeńizge rahmet.

 

Áńgimelesken

Aıgúl AHANBAIQYZY

 

 

Banner
Sońǵy jańalyqtar

Elıtaly kezeńge joldama aldy

Sport • Búgin, 09:58

Eki qola medal enshiledi

Boks • Búgin, 09:57

«Barystyń» qarqyny qatty

Hokkeı • Búgin, 09:52

Kıprdi de jeńe almadyq...

Fýtbol • Búgin, 09:51

Galbadrah bolmasa qaıter edik?!

Sport • Búgin, 09:49

«Qara altyndy» qapysyz aǵyzǵan

Qazaqstan • Búgin, 09:44

Qyz áýlıe

Rýhanııat • Búgin, 09:34

Qaıtalanbas qymyz dámi

Qazaqstan • Búgin, 09:33

Rýhanı jańǵyrǵan aýyl

Rýhanııat • Búgin, 09:28

Ekijaqty kelisimge qol qoıyldy

Qazaqstan • Búgin, 09:26

Tálim men tájirıbe ushtasqan uıa

Qazaqstan • Búgin, 09:10

Jambyldyqtardyń jarqyn jobasy

Aımaqtar • Búgin, 08:36

Joshy ulysynyń joǵalǵan shaharlary

Rýhanııat • Búgin, 08:31

Úılestirý keńesiniń kezekti basqosýy

Qazaqstan • Búgin, 08:27

Túgel túrkini túgendegen

Álem • Búgin, 08:20

Katonqaraǵaıdy qalaı saqtap qalamyz?

Qazaqstan • Búgin, 08:12

«Dostastyq vızasyn» engizýdi usyndy

Prezıdent • Búgin, 08:03

Taldyqorǵanda 5 myń aǵash otyrǵyzyldy

Aımaqtar • 12 Qazan, 2019

Keı óńirlerde aýa-raıy ózgeredi

Aımaqtar • 12 Qazan, 2019

Eń qysqa áńgime. Iesiz zyndan. Dıdar AMANTAI

Rýhanııat • 12 Qazan, 2019

Eń qysqa áńgime. Islam Qabyluly

Rýhanııat • 12 Qazan, 2019

Senatorlar senbilikke shyqty

Qazaqstan • 12 Qazan, 2019

Uqsas jańalyqtar