Qoǵam • 20 Qyrkúıek, 2019

Qazaqstannyń Turǵyn úı qurylys jınaq banki júıesi arqyly 18 myń otbasy jańa páter kiltterin aldy

58 retkórsetildi

Úkimet úıiniń baspasóz ortalyǵynda ótken baspasóz konferensııasynda «Qazaqstannyń turǵyn úı qurylys jınaq banki» AQ basqarma tóraıymy Lázzat Ibragımova «Nurly jer» memlekettik baǵdarlamasy boıynsha turǵyn úı berý týraly aıtyp berdi. Bul týraly Premer-Mınıstrdiń baspasóz qyzmeti habarlady.

Tuńǵysh Prezıdent – Elbasy N. Nazarbaevtyń tapsyrmasy boıynsha bıyl «Qazaqstannyń turǵyn úı qurylys jınaq banki» AQ tabysy tómen otbasylar úshin «Baqytty otbasy» jeńildetilgen nesıe berý baǵdarlamasyn iske qosty. Bul baǵdarlamada alǵash ret áleýmettik ádilettilik qaǵıdasy qoldanyldy. Baǵdarlamaǵa sońǵy jarty jylda otbasynyń árbir múshesine shaqqandaǵy kirisi 42 500 teńgeden aspaıtyn otbasylar qatysa alady.

«Búgin bizge osyndaı otbasylardan 5 myń ótinish kelip tústi. Olardyń 2,5 myńy maquldandy. Olar qazir páter izdep, qujattaryn jınap jatyr. 455 otbasy jańa úılerine kóshti», — dedi L. Ibragımova.

L. Ibragımova sonymen qatar, eger «Baqytty otbasy» baǵdarlamasy boıynsha baspana alýǵa ruqsat alǵan adamdarda bastapqy jarna úshin tóleıtin qarajattary jetispese, olar ákimdikterdiń turǵyn úı sertıfıkattaryna senim arta alatynyn aıtty. Búgingi tańda Aqtóbe, Nur-Sultan qalalarynyń ákimdikteri 1 mıllıon teńgege deıin turǵyn úı sertıfıkattaryn bóldi.

«Kósh bastap turǵan úsh óńirdi atap ótkim keledi. Bizge Nur-Sultan qalasynyń turǵyndarynan 800-den astam, Almatydan – 650, Aqtóbe men Aqtóbe oblysynan 542 ótinim kelip tústi», — dedi L. Ibragımova.

QTQJB derekterine sáıkes, jyl sońyna deıin 5 myń qazaqstandyq otbasy óz páterleriniń kiltterin alady.

2020 jyly Memleket basshysynyń tapsyrmasymen «Nurly jer» baǵdarlamasy aıasynda josparlanǵan memlekettik kómek kólemi ulǵaıtylady. Endi 10 myń qazaqstandyq otbasy «Baqytty otbasy» baǵdarlamasy boıynsha baspana satyp alý úshin jyldyq 2%-ben jeńildetilgen nesıe alady. Alǵashqy jarna 10% quraıdy.

Jalpy, «Nurly jer» baǵdarlamasyn júzege asyrýdyń 2,5 jylynda Qazaqstannyń turǵyn úı qurylys jınaq banki júıesi arqyly 18 235 otbasy jańa páter kiltterine ıe boldy.

«Jyl sońyna deıin «Baqytty otbasy» men ákimdikterden beriletin páterlerdi eskere otyryp, 25 myń qazaqstandyq otbasy qonys toıyn toılaıdy dep oılaımyz. Otbasynyń ortasha koeffısıenti 3,8 bolǵan kezde 100 myńǵa jýyq qazaqstandyq 2,5 jylda jańadan qonystanýshylar boldy», — dedi Qazaqstannyń turǵyn úı qurylys jınaq bankiniń basqarma tóraıymy.

Qazirgi tańda Qazaqstannyń turǵyn úı qurylys jınaq banki júıesinde 1 416 000 salymshy tirkelgen. Aǵymdaǵy jyldyń 8 aıynda 210 myńnan astam jańa depozıt ashyldy.

Sońǵy jańalyqtar

Abaı jáne Marjanı dúnıetanymy

Rýhanııat • Keshe

Uqsas jańalyqtar