Mádenı sharanyń saltanatty ashylýynda Qaraǵandy oblysy ákiminiń orynbasary Abzal Núkenov aqyn, memleket qaıratkeri Sáken Seıfýllın mereıtoıynyń óńirimizde keńinen atalyp jatqanyn atap ótip, bul sharalardyń taǵlymdyq, tárbıelik mán-maǵynasyna nazar aýdardy.
– Bizdiń jastarymyz úlgi tutýǵa turarlyq ulttyq tulǵalardy bilýi tıis. Qıyn-qystaý kezeńde Sáken aǵa qazaq halqy úshin kóptegen ıgi isterdi atqardy. Bárimiz de Ilııas Jansúgirov, Beıimbet Maılın jáne Sáken Seıfýllın sııaqty úsh alyp báıteregimizdi bilemiz. Olar bir ýaqytta ómir súrdi, bir jolmen júrip, óz kózqarastary úshin ómirlerin qıdy. Alyptarymyz beker qurban bolǵan joq – olardan keıin elimiz ben halqymyz táýelsizdik aldy. Halqyna qaltqysyz qyzmet etken erlerdiń azamattyq erlikteri týraly estelik pen alǵys urpaqtan urpaqqa berilýi tıis, – dep atap ol.
Konsert estrada juldyzdary Baýyrjan Isaev pen Altynaı Jorabaevanyń oryndaýyndaǵy Sáken Seıfýllınniń «Taý ishinde» ánimen ashyldy. Odan keıin Qazaqstannyń eńbek sińirgen óner qaıratkeri Bolat Ábdilmanov Sákenniń «Aqqýdan aıyrylǵanda» poemasyn oqyǵan kezde bı ujymdary tamasha horeografııalyq qoıylymdy sahnaǵa shyǵardy.
Sondaı-aq bul keshte qala turǵyndary men qonaqtary aldynda ánshi Madına Sádýaqasova, «Asyl» aspaptyq trıosy, Táttimbet atyndaǵy Qazaq akademııalyq orkestri, folklorlyq ansamblder, jergilikti teatrlardyń tanymal ánshileri men akterleri óner kórsetti.
Aıta ketý kerek, konsert Qaraǵandy oblysynyń ákimdigi men Nur Otan partııasynyń qoldaýymen uıymdastyryldy.
