Megapolısti azyq-túlik, kókónis ónimderimen qamtýda Almaty oblysynyń Eńbekshiqazaq aýdany mańyzdy qadam jasap otyr. Búginde bul aýdandaǵy alma baqtarynyń kólemi 6400 gektarǵa jetken. Onyń 1,5 myń gektary – ıntensıvti baý-baqsha. Isin ilgeriletip otyrǵan «Amal bio» seriktestigi baq ósirýde kóshbasshy orynda. Sharýashylyqqa qarasty alma baqtaryn aralap kórgen Premer-Mınıstr jer ıgerýdegi jańa tehnologııaǵa nazar aýdardy. Baǵbandar alma ósirýdiń tyń ádisi men álemdik tájirıbege arqa súıep, mol ónimdi az shyǵynmen jınaýǵa qol jetkizip otyr. Áýelgide óz isin 50 gektar alqapqa alma kóshetin otyrǵyzýdan bastaǵan sharýashylyq dırektory Asqar Sabırov qazir 500 myń túp alma aǵashynan jemis jınap alatynyn aıtady. Alma baqtyń kólemin 150 gektarǵa deıin ulǵaıtyp, almanyń 14 túrli surpyn kútip-baptaýda. Daıyn ónimdi Almaty qalasynyń tutynýshylaryna tasymaldaıdy. Alma baqtaǵy jumysty kózben kórgen Úkimet basshysy otandyq ónimniń dúnıejúzilik naryqqa shyǵýyna qajetti jaǵdaı jasalyp otyrǵanyn aıtty. «Amal bio» seriktestiginiń bul baǵyttaǵy qadamy nátıjeli. Sharýashylyqta syıymdylyǵy 6 myń tonnaǵa jetetin jemis jáne kókónis saqtaıtyn qoıma bar. Aýmaǵy 750 sharshy metr bolatyn kóterme-bólshek saýda pavılony da jumys istep tur. Qazir «Amal bio» saýda belgisimen aıshyqtalǵan daıyn ónim shetel naryǵyna eksportqa jóneltiledi.
A.Mamın Eńbekshiqazaq aýdanyndaǵy «Adal» agroónerkásip kesheninde de boldy. Aımaqtaǵy sút ónimderin shyǵarýda negizgi úleske ıe seriktestik shıkizatty ózderi daıyndaıdy. Saýyn sıyr sanyn 2,5 myń basqa deıin kóbeıtken agroónerkásip kesheni jylyna 20 myń tonna sút óndiredi. Malǵa qajetti jemshópti de ózderi egip, ósiredi. Sút zaýyttaryndaǵy jumys tolyqtaı sıfrly júıemen basqarylady. Tabıǵı sútti ıtalııalyq tásilmen óńdep, 56 túrli sút ónimin jasap shyǵarady. 262 adam turaqty jumyspen qamtylǵan.
Sondaı-aq Úkimet basshysy Jambyl aýdanynda «EmpireFood» JShS et kombınatyna, Qarasaı aýdanynda «Hamle» JShS kondıterlik ónimder zaýytyna bardy.
Almaty oblysyna jumys sapary barysynda A.Mamın «Lýkoıl» JAQ prezıdenti Vagıt Alekperovpen birge Ile aýdanynda boı kótergen «Lýkoıl Lýbrıkants Ortalyq Azııa» seriktestiginiń jańa zaýytynyń tusaýyn kesti. Reseımen birlesken kásiporyn maılaý materıaldaryn shyǵarady. Zaýytta jyl boıyna 100 myń tonnaǵa deıin ónim daıyndalady. Onyń ishinde motor maıynyń segiz júzden asa túrin óńdeıdi. О́ndiris Qazaqstan men Ortalyq Azııa elderiniń, sondaı-aq Qytaı, Aýǵanstan jáne Mońǵolııanyń ishki naryǵyn maılaý maılarymen qamtamasyz etpekshi.
– Búginge deıin elimizdiń kómirsýtek sektoryna 9,5 mlrd AQSh dollary shamasynda ınvestısııa salǵan «Lýkoıl» kompanııasynyń bul jańa zaýyty otandyq munaı-gaz sektory damýynyń qazirgi vektoryna, atap aıtqanda, shıkizat baǵytynan ótip, daıyn ónim shyǵarýǵa kóshkenin bildiredi. Kásiporynnyń qurylysyna jáne ony jaraqtandyrýǵa salynǵan jalpy ınvestısııalar kólemi 94 mln AQSh dollaryn qurady. Joba Qazaqstan Respýblıkasynyń zańnamasy men ónerkásiptik qaýipsizdik, eńbekti qorǵaý jáne qorshaǵan ortany qorǵaý salasyndaǵy halyqaralyq quqyq talaptaryna qatań sáıkestikte júzege asyryldy. Zaýytqa «Batys Eýropa – Batys Qytaı» kólik magıstraliniń jaqyn ornalasýy logıstıkalyq prosesterdi ońtaılandyrýǵa múmkindik beredi, – dedi Premer-Mınıstr zaýyttyń ashylýynda sóılegen sózinde.
Sondaı-aq osy shara aıasynda «QazMunaıGaz» UK» AQ men «Lýkoıl» JAQ arasynda «Qazaqstan Respýblıkasynyń aýmaǵyndaǵy ýchaskelerdi birlesip zertteý týraly» kelisimge qol qoıyldy.
2019 jyldyń qańtar-tamyz aılarynda Almaty oblysynyń negizgi kapıtalyna ınvestısııalar kólemi 305,3 mlrd teńgeni nemese ótken jyldyń sáıkes kezeńine shaqqanda 103,3%-dy qurady. О́sim Indýstrııalandyrý kartasy jobalaryn, «Nurly jol», «Nurly jer» baǵdarlamalaryn iske asyrý, gazdandyrý jumystaryn júrgizý, «Alacem» sement zaýytyn salý, «Sarybulaq 2» JES, «Lýkoıl» maılaý materıaldaryn shyǵarý zaýytyn salý arqyly qamtamasyz etildi. IIDMB jáne Indýstrııalandyrý kartasy aıasynda 2019 jyly 1214 jumys ornyn qurýmen, 61,9 mlrd teńgege 11 jobany iske asyrý josparlanǵan. Olardyń ishindegi iri jumys oryndary sanatyna «Jetisý Majıko Agrokesheni» JShS (maı ónimderi men qurama jemniń óndiristik keshenniń qurylysy) jáne «Meat Processing and Service» et óńdeý kesheni enedi.
Úkimet basshysy Almaty oblysyna jasaǵan jumys saparyn qorytyndylaı kele, óńirde Qazaqstannyń Tuńǵysh Prezıdenti – Elbasy Nursultan Nazarbaev bastamashy bolǵan «Nurly jol», «Nurly jer» jáne basqa da memlekettik baǵdarlamalar aıasyndaǵy ınvestısııalyq jobalardyń iske asý barysy men Memleket basshysy Qasym-Jomart Toqaevtyń óńir ekonomıkasyn damytý jónindegi tapsyrmalarynyń oryndalýyna oń baǵa berdi.
Almaty oblysy
