Qazaq tili – elimizdi tutastandyratyn qýatty qural

Jumysty 5 ınstıtýsıonaldy reforma jáne Ult josparyn júzege asyrý, Jańǵyrtý jónindegi ulttyq komıssııanyń jumysyn qaıta jandandyrý týraly máselelerdi júzege asyrýdan bastaıtynyn aıtqan Prezıdenttiń «Qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi» dep nyq basyp aıtýy til janashyrlaryn bir serpiltip tastaǵany ras.

Shyndyǵynda da qazaq tilin ultara­lyq qatynas tiline aınaldyrý – qazaq halqy­nyń memleket quraýshy ult retin­degi tuǵyryn nyǵaıtyp, eńsesin tikteýine áser etedi. Qashanda tatýlyq pen bir­likti bıik ustap, toleranttylyq tanyta­tyn Otanymyzda memlekettik tildiń ult­ara­lyq tilge aınalýy ortaq tarıhı sanany nyǵaıtýǵa, qazaqstandyq qundylyqtardy arttyrýǵa múmkindik beredi.

Elimizdiń saıasaty tynyshtyq pen úndestik, ózara senimdilik pen barlyq qazaq­standyqtarǵa degen qurmettiń ornyǵýyna baǵyttalyp, taǵdyr tálke­gimen Qazaqstan jerine eriksiz kóshi­rilgen túrli etnos ókilderiniń qutty qonysyna aınalǵanyna álem kýá. Búgin­de Qazaq eliniń bir tarmaǵyndaı tuta­syp, alyp báıterektiń jaıqalǵan japy­raǵyndaı ósip-ónip otyrǵan ózge etnos ókilderiniń qazaq tilin ultaralyq til retinde qabyldaýy adamgershilik qa­rym-qatynastyń ónegeli ólshemi ǵana emes, rýhanı tamyrdan nár alyp, jahan­danýdyń yzǵarly tustarynan aınalyp ótýge múmkindik beretin qajetti qural bolmaqshy.

Prezıdenttiń «Biraq mundaı dárejege jetý úshin bárimiz dańǵaza jasamaı, jumyla jumys júrgizýimiz kerek» degen tapsyrmasynyń da mańyzy zor. «Jumyla kótergen júk jeńil» demekshi, memle­kettik tildiń mártebesiniń kóterilýine ár qazaqstandyq atsalysqany jón.

Biz – «Til-Qazyna» ulttyq ǵylymı-praktıkalyq ortalyǵynyń qyzmetkerleri memlekettik tildiń mártebesin kóterý, ony ǵylym tiline aınaldyrý, jańa ulttyq álipbıdi halyqqa nasıhattaý baǵytynda qoǵamnyń ártúrli áleýmettik toptary arasynda, ǵylymı ortada, til mamandary, ádiskerler, memlekettik qyzmetkerler arasynda túsindirý jumystaryn júıeli túrde ótkizip júrgenimizdi aıta ketkim keledi.

Ár qazaqstandyq memlekettik til – qazaq tilin qurmetteýdi azamattyq boryshy sanap, ultaralyq tilge aınaldyrýdy perzenttik paryzyna balasa, tilimiz kórkeıetini aqıqat. Al azamattary qoldap, basshylary qorǵaı bilse, qýatty da baı til – qazaq tili san urpaqtyń rýhanı, áleýmettik qajettiligin ótep, ultaralyq mártebege jetedi.

Álibek ASQAR,
«Til-Qazyna» ulttyq
ortalyǵynyń bas dırektory