Memlekettik qoldaýdy naqty ispen ushtastyrǵandar qatarynda «Jetisý» áleýmettik kásipkerlik korporasııasynyń qoldaýymen qurylǵan servıstik-daıyndaý ortalyqtary bar. Búginde bul ortalyqtar aýyl sharýashylyǵy óndirýshileriniń qolyn uzartyp otyr. Osyndaı qoldaý quraldarynyń tıimdiligin Qapshaǵaı qalasyndaǵy «Aqózek» servıstik-daıyndaý ortalyǵynyń basshysy Dýman Maılıhanov rızashylyqpen aıtady. Bul ortalyq 2017 jyly «Aqózek» aýyl sharýashylyǵy óndiristik kooperatıvi men «Maılıhanov D.» sharýa qojalyǵynyń kúsh biriktirýimen qurylypty.
Al Dýman Maılıhanovtyń ózi búkil óńirge tanymal kásipker. Ol Qapshaǵaı qalasyndaǵy iri sharýa qojalyqtarynyń basshysy, Fermerler odaǵynyń jergilikti fılıalyn basqarady jáne Kásipkerler keńesiniń quramyna kiredi. Aýyl sharýashylyǵymen bala kezinen tanys. Jastaıynan pııaz sebýge kómektesip, traktor júrgizgen. Kásipkerdiń bıznestegi úlken tájirıbesi men is júrgizýdegi ınnovasııalyq tásiliniń arqasynda Qapshaǵaı óńirinde tabysty ári iri servıstik-daıyndaý ortalyǵyn qurdy.
– Sharýashylyqta biz árdaıym pııaz, soıa, arpa jáne qarbyz ósirdik. Qant qyzylshasyn jańǵyrtý boıynsha memlekettik qoldaýdyń jemisin kórgennen keıin biz de osymen aınalysýdy sheshtik. Sosyn servıstik-daıyndaý ortalyǵyn qurdyq. 2017 jyly 60 gektarǵa qyzylsha egildi. Nátıje bizdiń kútkenimizden asyp tústi. Gektarynan 520 sentner ónim jınaldy, – deıdi dıqan.
Eger eki jyl buryn «Aqózekte» egistik kólemi 60 gektar bolsa, 2018 jyly tátti túbirdiń kólemi 200 gektarǵa deıin keńeıip, 4 myń tonnadan astam ónim jınaldy. Bıyl «Aqózek» alqaptarynda qant qyzylshasy 160 gektarǵa ósirilýde. Negizinen Qapshaǵaıdyń jazy ystyq jáne jeldi bolyp keledi. Qolaısyz aýa raıy jaǵdaılaryna qaramastan, «Jetisý» korporasııasy arqyly satyp alynǵan elıtalyq tuqymdar ónimdilikti arttyrýǵa kómektesedi. 2018-2019 jyldary jalpy somasy 33,3 mln teńgege Germanııa men Fransııadan 640 dana egis tuqymy satyp alyndy.
– Eýropalyq tuqymnyń ereksheligi, olardyń ártúrli agroklımattyq jaǵdaılarǵa beıimdelýi joǵary deńgeıde. Sonymen qatar tuqymdar bizdiń jer qyrtysyna tózimdi, – deıdi Dýman Maılıhanov.
Zamanaýı aýyl sharýashylyǵy tehnıkasy da kásipkerlerge qolǵabys bolyp keledi. Tehnıka jumys kúshin azaıtýǵa, egis alqabyn jedel daıyndap, egin jınaý merzimin qysqartýǵa kómektesedi. Qarjy lızıngi aıasynda «Jetisý» áleýmettik kásipkerlik korporasııasy arqyly «Aqózek» servıstik-daıyndaý ortalyǵy jalpy somasy 171,6 mln teńgege 14 túrli aýyl sharýashylyǵy tehnıkasyn satyp aldy. Olardyń qatarynda qopsytqysh, búrikkish, aınalmaly soqa, dán sepkish, traktor, tirkeme jáne basqalar bar.
Qojalyqta turǵan Agrotron 170 serııaly DEUTZ FAHR nemis traktory joǵary ónimdiligimen, beriktiligimen jáne manevrligimen erekshelenedi jáne tipti eń qıyn jaǵdaılarda da jumys isteı alady. Munyń bári traktorǵa kúni boıy daıyndyq jumystarynan bastap egis jumystaryna deıin, jyrtýdan bastap tasymaldaýǵa deıin kúrdeli operasııalardy júrgizýge múmkindik beredi. Al MONOSEM MECA V4 mehanıkalyq dán sepkishi qant qyzylshasyn egý úshin arnaıy ázirlengen. Sebetin apparat tereńdikti turaqty baqylap, tuqymdy jaqsy ornalastyrý men sapaly sebýdi qamtamasyz etedi.
Jalpy, qazirgi ýaqytta «Jetisý» áleýmettik kásipkerlik korporasııasynyń qoldaýymen Almaty oblysynda qyzylsha baǵyt boıynsha 29 servıstik-daıyndaý ortalyǵy qurylǵan. Olarǵa jalpy quny 6,5 mlrd teńge bolatyn 603 dana aýyl sharýashylyǵy tehnıkasy satyp alynypty.
Almaty oblysy
