Qoǵam • 23 Qyrkúıek, 2019

Ádemi dánekerleýshimen áńgime

235 retkórsetildi

«Men eń aldymen istegen jumysymda sapaǵa basa mán beremin. Jasaǵan zatym tapsyrys bergen adamdarǵa ǵana emes, ózime de unasa, jumysymnan kádimgideı lázzat alamyn». Bul – Almaty oblysynyń Balqash aýdanyndaǵy Baqanas aýy­lynda turatyn dánekerleýshi kelinshektiń sózi. Jalpy Ádemini erekshe tanystyryp jatýdyń qajeti joq shyǵar. Kádimgi qazaqtyń qarakóz qyzy. Ony óz zamandastarynan bólip alyp qaraýǵa sebepker bolǵan jeke tańdaýy ǵana. Iá, eki balanyń anasy qazir temirdi terishe ılep, gúl ornyna elektrod ustap dánekerleýshi bolyp júr. Keıipkerimiz Ádemi ESENShORAEVAMEN áńgimemiz osydan bastaldy.

– Ádemi, áıel balasyna tańsyq kásippen aınalysýyńyzǵa ne túrtki boldy?

– Kúıeýim ekeýimiz bala-shaǵany asyraý úshin kez kelgen kásipten arlanbadyq. Sońǵy qolǵa alǵan kásibimiz jańa jyl aldynda shyrsha satý boldy. Taýarymyz jerde jatpasyn dep dánekerleýshige tapsyrys berip, uzyn qylyp temirden ústel jasattyq. Sol kezde sheberdiń jumysyn syrttan qyzyqtap turdym. Qolyndaǵy quralyna qystyrylǵan elektrodty temirge tıgizip qalǵanda, jan-jaqqa sha­shyraǵan myń-san ushqyn kádimgi túnde atylatyn otshashýdy kóz aldyma elestetti. Kúıeýimniń «Qarama, kóziń aýy­rady», degenine qaramastan, qolymmen kózimdi kólegeılep turyp álgi kórinisti tamashalaı berdim. Nege ekenin ózim de bilmeımin, aıaq astynan qyzyǵýshylyǵym oıandy. Sodan dánekerleýshiden qural­daryn surap aldym da, temirdiń eki kesindisin balqytyp otyryp jalǵap kórdim. Baıqap qarasam, qolymnyń ebi bar sııaqty. Dánekerleýshiniń betperdesin qaıta kıip alyp, ári qaraı iske kirise berdim. Mine, sodan beri osy kásiptiń qyr-syryn úırenýge táýekel ettim.

– Dánekerleýshi Ádeminiń otbasymen tanysa otyrsaq...

– Eki balanyń anasymyn. Kúıeýimiz ekeýmiz bir-birimizdi qas-qabaqtan túsi­nemiz. Sodan da bolar, qandaı isti bolsyn ekeýlep alyp ketip, áıteýir bir nátıje shyǵaryp jatamyz. Shyny kerek, myna ómirde janyńdaǵy jubaıyńnyń qoldaýy óte kerek jáne mańyzdy dúnıe. Al anam – aqylshym, syrlas qurbymdaı bolyp ketken eń jaqyn, eń asyl adamym.

Negizi, ózimniń mamandyǵym – býhgalter. Biraq keńsede qaǵaz mújip otyrý men úshin azappen teń. Odan da temirden oıyńdaǵyny jasap, dene eńbegimen aınalysqan myń ese artyq.

– Sizdiń bul kásibińizge týǵan-týys, kúıeýińiz qalaı qarady?

– Anam basynda «Elden uıat-taǵy», dep birazǵa deıin qarsy bolyp, namys­tanyp júrdi. Keıin istegen sharýamdy kórip, bul istiń de óz nesibesi barlyǵyna kóz jetkizgennen keıin baryp kóngen yńǵaı tanytty. Al kúıeýim bolsa, áýel­ bastan meni qoldap shyqty. Onyń «Qo­lyńnan kelse, isteı ber» degen jalǵyz aýyz sózi maǵan kádimgideı kúsh berip, ózime degen senimimdi arttyrdy.

Jalpy, meniń bala kezimnen jurttyń sypsyń sózin eleń qylmaı, ózime unaǵan kez kelgen sharýany isteı beretin ádetim bar. Minezim sondaı. Sózden góri isti unatamyn.

– Endi, bul kásiptiń ótimdi, qaı­tarymdy ekenin túsingennen keıingi is-áreketińiz qandaı boldy?

– Eń aldymen bıznes-jospar jasap, qujattarymdy ázirlep, «Bıznes bastaý» arnaıy jobasyna qatystym. Joldasym ekeýimiz jergilikti ákimdikten jalǵa jer alyp, shaǵyn sheberhana ashtyq. Bastaǵan isimiz qaıyrly boldy. Kúnnen kún­ge tapsyrys kóbeıip, bul istiń qyzy­ǵyna basybútin kirip kettim. Mine, eki jyldaı boldy, qaladaǵy saıa­baqtar men balalar alańdaryna qa­jetti sákilerdiń, átkenshekterdiń temir qursaýlaryn jasaımyz. Basqa da isteı­tin sharýalar kóp. Kóbine berilgen tapsyrystar boıynsha jumys isteımin. Al kúıeýim meniń qolymnan shyqqan daıyn ónimderdi tapsyrýshyǵa jetkizip berip otyrady.

– О́mir boıy dánekerleýshi bolyp júrmesińiz belgili. Degenmen, bolashaqta aınalysar kásibińizdiń osy iske qandaı da bir qatysy bolatyn shyǵar? Aldaǵy josparlaryńyz týraly aıtsańyz...

– Meniń oıymsha, adam balasy mahabbatpen istese, kez kelgen kásip óziniń jemisin beredi. Árıne aınalysqan sharýa­nyń ózindik qıyndyqtary da bola­dy. Máselen, uzaq jumys istegende kóz etterimniń tartyp aýyratynyn baıqaı­myn. Sonan soń qaýipsizdik sharalaryn da qa­tań saqtaýǵa týra keledi. Ásirese gaz­ben dánekerlegende asa saq bolý kerek. Ýltrakúlgin sáýlelerdiń de zııa­ny az emes. Joǵary temperatýrada ju­mys isteıtindikten, ot ushqyny mol bolatyn­dyqtan denede bir de bir jer ashyq bolmaýy kerek. Degenmen, jasaǵan ónimiń oıdaǵydaı shyqqanda, kózdiń aýyrǵanyn da, sharshaǵanyńdy, bári-bárin umytyp ketedi ekensiń. Jal­py, dánekerleýshiniń jumysy adamnan qol sheberligi óz aldyna, óte joǵary dál­dikti, tabandylyq pen tózimdilikti talap etedi. Bul naǵyz «jeti ret ólshep, bir ret kes» deıtin qaǵıdatqa baǵynatyn maman­dyq. Bolashaqta bul kásiptiń aıasyn keńitip, aýqymdy jobalarmen aınalyssam ba dep armandaımyn. Ol endi ýaqyttyń enshisindegi sharýa.

Áńgimelesken
Qalmahanbet MUQAMETQALI,
«Egemen Qazaqstan»

Almaty oblysy

Sońǵy jańalyqtar

Basylym basshylary - Erkin QYDYR (1962)

Basylym basshylary • Keshe

Almatyda sel júrý qaýpi joq

Aımaqtar • Keshe

Uqsas jańalyqtar