Qadaǵalaýdyń arqasynda ol bala kezinen qısyq jolǵa túsip ketpeı, eńbekqor bolyp ósti. Jigittik jasqa jetken Nıkolaı endi óziniń súıiktisin taýypty. Bul kóp jylǵy qamqorlyq pen tárbıeniń qaıtarymyndaı, polıseılerdiń de qýanyshyna aınaldy. Oblystyq polısııa departamentiniń basshylyǵy men oblystaǵy jastardyń resýrstyq ortalyǵynyń ujymy birlesip, eki jastyń shańyraq kóterýine oraı áleýmettik toı ótkizdi.
Saltanatty neke qııý sátinde jas jubaılardy oblystyq polısııa departamentiniń kadr saıasaty basqarmasynyń bastyǵy Baǵdat Itesov quttyqtady.
– Halqymyz balany eshqashan qaraýsyz qaldyrmaǵan. Bul táýelsiz elimizdegi qoǵamda da jalǵasyn taýyp otyr. Adamǵa adamnyń jylýy, qamqorlyǵy kerek. Mine, búgingi toı sonyń nátıjesi. Nıkolaı eńbekqor, eń bastysy, jaqsy kóre alatyn júregi bar jigit. Ol óziniń otbasynyń úlgili otaǵasy bolatynyna senemiz, – dep jas jubaılarǵa barlyq polıseıler men departament basshysy Beket Aımaǵambetovtiń atynan jaqsy tilek aıtqan Baǵdat Itesov olarǵa syılyq ta tapsyrdy.
Jastardyń resýrstyq ortalyǵynyń sektor jetekshisi Láıla Bekseıitova jastardyń ǵalamtor arqyly tanysqanyn aıtady.
– Nıkolaı óziniń ata-anasyn eshqashan kórmegen. Qalyńdyq Veranyń jesir anasynyń da toı jasaýǵa múmkindigi joq eken. Osy toıdy 2-3 aıǵa keshiktirdik, sebebi demeýshiler izdestirdik. Mine, toıdyń erte-keshi joq eken, – deıdi Láıla. Jastar toıy syılyqsyz qalmady. Olarǵa qundy syılyq tartý etken jandardyń arasynda oblys ákimi Arhımed Muhambetov te bar.
Polıseıler Nıkolaıdyń jas otbasyn aldaǵy ýaqytta da qoldap otyratyndyqtaryn jáne ony jumysqa ornalastyrý jaǵyn da qarastyratyndyǵyn aıtty.
QOSTANAI
