Oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Nurlan Shaıahmetovtiń aıtýynsha, óńirde «Jasyl» energııa baǵdarlamasyn júzege asyrý aıasynda 2025 jylǵa deıin balamaly qýat kózin óndiretin 25 nysan salynyp, paıdalanýǵa beriledi eken. Bul – Jetisý ólkesindegi energetıkalyq suranysty óteýge ári tabıǵatty qorǵaýǵa baǵyttalǵan mańyzdy qadam.
− Balamaly qýat kózin óndirý boıynsha Qapshaǵaı mańyndaǵy kún elektr stansasynyń qurylysynan bólek, Alakól aýdanyndaǵy Jońǵar qaqpasy aýmaǵynda jel energııasyn ıgerý jumystary qarqyn aldy. Bul – naǵyz bolashaqtyń energııasy, jemisin de aldaǵy ýaqytta kóretin bolamyz. Qazir oblys boıynsha óndiriletin energııa kózi 2 mlrd kılovatt/saǵat bolsa, onyń qalpyna keletin resýrstardan alynatyny 38 paıyz shamasynda. Joba júzege asqannan keıin bul kórsetkish ósip, «jasyl» energııa óndirý de arta túsedi degen senim bar, − deıdi maman.
Jaqynda Qapshaǵaı qalasynda «Eneverse Kunkuat» JShS-nyń «Nurǵısa 100 MVt Solar Park Qapshaǵaı» kún elektr stansasynyń birinshi kezeńi iske qosylyp, 100 megavattyq qýat alyna bastady. Jumysty júzege asyrǵan kompanııa ókilderiniń aıtýynsha, quny 27,7 mlrd teńgelik jobany qarjylandyrýǵa «Qazaqstan damý bankiniń» qarajaty men «QDB-Lızıng» tobynyń qarjylyq lızıngi tartyldy. Al 10,4 mlrd teńgesi – menshikti kapıtal, ıaǵnı nysanǵa salynǵan ınvestısııa. О́z kezeginde kásiporynnyń iske qosylýyna jergilikti atqarýshy bılik qoldaý bildirip, «Bıznestiń jol kartasy – 2020» baǵdarlamasy arqyly joǵary voltty jelilerdiń qurylysyn oblystyq bıýdjetten 233 mln teńgege qarjylandyrǵan.
Elimizde ótken Ekspo-2017 kórmesi alternatıvti energetıka jobalarynyń qarqyndy júzege asyrylýyna serpin berdi.
Almaty oblysynda elektr energııasynyń tapshylyǵy bar. Sondyqtan búgin iske asyrylyp otyrǵan iri jobanyń mańyzy zor. Bul joba aınalasy bir jyldyń ishinde iske qosylǵanyn da aıta ketý kerek. Búgingi kúni respýblıkada jetpisten astam elektr óndiretin nysan bar. Sonyń jıyrmadan astamy Almaty oblysynda ornalasqan. Bul sala jaǵynan oblys kóshbasshy sanalady. Qazirgi kezde Qazaqstanda 800 MVt elektr qýaty jańartylǵan energııa kózderinen alynyp otyr. Sondaı taǵy 5 nysan ashý josparlanǵan. Otandyq bıznesmender kún elektr stansasyn iske qosýǵa bar kúsh-jigerin saldy. Úkimet tarapynan da qajetti qoldaý sharalary kórsetildi. Osyndaı jobalardyń nátıjesinde elimizde óndiriletin elektr energııasyndaǵy JEK úlesi 3 paıyzǵa, 2030 jylǵa qaraı 10 paıyzǵa jetedi.
Jalpy iske qosylǵan kún elektr stansasynyń «Nurǵısa 100 MVt Solar Park Qapshaǵaı» degen ataýy belgili kompozıtor Nurǵısa Tilendıevtiń qurmetine qoıylǵan. Joba jyl saıyn 160 mln kVt/saǵ elektr energııasyn óndiredi. Ol atmosferaǵa SO2 shyǵaryndylaryn jylyna 150 myń tonnaǵa azaıtady. Nysannyń aýmaǵy 400 gektardy alyp jatsa, jobanyń 1-shi kezeńi 274 gektarda ornalasqan. Stansada jalpy sany 303 myń panel ornatylady. Nysannyń 1-shi kezeginiń qýaty 100 MVt bolsa, tolyq qýatyna shyqqanda 150 MVt elektr qýatyn óndiretin bolady.
– Almaty oblysy ekonomıkanyń barlyq baǵytynda jaqsy damyp keledi, ındýstrıaldy aımaqtar qurylyp, jańa nysandar ashylýda. Jańadan iske qosylǵan iri kásiporyndardyń barlyǵy qoljetimdi elektr qýatyn qajet etedi. Ashylyp otyrǵan kún elektr stansasy oblysty elektr qýatymen qamtamasyz etýge úles qosatyn mańyzdy nysan bolmaq. Bul – Soltústik – Ońtústik elektr taratý jelisiniń boıynda turǵan iri nysan. Sonymen birge jobanyń júzege asyrylýy jańa jumys oryndarynyń ashylýyna, bıýdjetke salyq túsiminiń jáne óńirge tartylǵan ınvestısııa kóleminiń artýyna septigin tıgizedi. Onyń nátıjesi oblys ekonomıkasyna oń yqpal etip, ıgiligin halyq kóredi, – deıdi Almaty oblysynyń ákimi Amandyq Batalov.
Aıtpaqshy, kún elektr stansasyn salýǵa 11 otandyq merdiger kompanııa qatysqan. Olardyń arasynda «Amanat», «ASPMK-519», «Nazar Enerdjı», «Tengızstroı» jáne basqa da kompanııalar bar. Stansa qurylysyn júrgizýde jergilikti turǵyndardan 500-den astam adam jumys istedi. Nysan iske qosylǵanda 35 adamdy jumyspen qamtıdy.
Almaty oblysy
