Aımaqtar • 25 Qyrkúıek, 2019

Qaraǵandy oblysynda úshinshi kún elektr stansasy salyndy

73 ret kórsetildi

Shet aýdanyndaǵy Aqadyr kentinde qýaty 50 MVt bolatyn kún elektr stansasy paıdalanýǵa berildi. Aýmaǵy 125 gektar jerdi alyp jatqan nysanda qýatty qosalqy stansalar men 150 myń gelıopanel ornatylǵan. «Aqadyr» degen ataý alǵan kún elektr stansasy Qaraǵandy oblysy ákimdiginiń «Kazakh Invest» UK» AQ-men birlesken jumysynyń nátıjesinde nemistiń Solarnet Investment GmbH kompanııasynyń jeke ınvestısııalaryna salyndy.

Jobalyq quny 55 mln eýro bolatyn kún elektr stansasynyń ashylý saltanatynda sóz sóılegen oblys ákiminiń orynbasary Almas Aıdarov Elbasynyń Qazaqstandaǵy balamaly energııa kózderiniń úlesin 30%-ǵa jetkizý jónindegi tapsyrmasyn oryndaý isinde aýyz toltyryp aıtar nátıjelerdiń barlyǵyn atap ótti.

– Biz oblysta úshinshi iri kún elektr stansasyn iske qosqaly turmyz. Bul joba óńirimizdiń ónerkásibin damytý úshin óte mańyzdy. Kún energııasyn damyta otyryp, biz qýat tapshylyǵyn eńserip qana qoımaı, ekologııalyq máselelerdi de sheshýge múmkindik alamyz, – dedi ol.

Jańadan iske asyrylǵan jobanyń bas ınvestory Iohım Goldbek «Aqadyr» KES-tiń ónimdiligi saǵatyna 25 MVt energııany quraıtynyn, aldaǵy ýaqytta onyń qýattylyǵyn  76 MVt-qa deıin arttyrý jóninde kelisimge qol jetkizilgenin málim etti.

– Bul bizdiń Qaraǵandy oblysynda iske qosyp otyrǵan ekinshi kún elektr stansasy. Atalǵan jobalar nemis ınvestorlary men oblys ákimdiginiń jáne «Kazakh Invest» UK» AQ-nyń birlesken jumysynyń arqasynda múmkin boldy, – dedi bas ınvestor.

Bıylǵy jyldyń basynda Qaraǵandy oblysynyń ákimdigi eýropalyq ınvestorlarmen balamaly energetıkany damytý jóninde memorandýmǵa qol qoıǵan bolatyn. Búgingi kún turǵysynan qaraǵanda, bul kelisimder sózden iske aınalyp, belgili bir dárejede jemisti nátıje bere bastady. Munyń ózi aldaǵy ýaqytta kúnnen alynatyn energııanyń qýatyn 500 MVt-qa jetkizýge jáne  shetelden 500 mln eýro kóleminde ınvestısııa tartýǵa múmkindik beredi.

 Negizi, Qaraǵandy oblysyn jańartylǵan energııa kózderin engizý boıynsha elimizde kóshbasshy óńirge aınaldy dep senimmen aıtýǵa bolady. Buǵan deıin oblystyń Saran qalasy men Gúlshat kentinde eki kún elektr stansasy salynyp, qazirgi ýaqytta olar qalypty jumys istep tur. Endi bul ekeýine «Aqadyr» KES-ti qosqanda, óńir boıynsha óndiriletin «jasyl» energııanyń jalpy qýaty 200 MVt shamasynda  bolady degen boljam bar.

Sońǵy jańalyqtar

Uıysa bilsek, urlyq tyıylady

Aımaqtar • Keshe

Eýro taǵy qymbattady

Ekonomıka • Keshe

Báıterekte órt shyqty

Aımaqtar • Keshe

Uqsas jańalyqtar