Almaty qalasy Áleýmettik ál-aýqat basqarmasy basshysynyń mindetin atqarýshy Danııar Álkebaıulynyń aıtýynsha, 10 myńnan astam otbasy ataýly áleýmettik kómek alatyndar tiziminde. Bul tólemder az qamtylǵan jáne kóp balaly otbasylarǵa mańyzdy kómek boldy. Memlekettik qoldaý arqyly zárý otbasylardyń jaǵdaıy birshama turaqtanǵan.
Ataýly áleýmettik kómek alatyndardyń eńbekke jaramdysy «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasyna oraı jumyspen qamtý sharalaryn paıdalanýǵa múmkindigi bar. Nátıjesinde turaqty jáne ýaqytsha jumys oryndaryna jumysqa ornalasýǵa, eńbek naryǵynda suranysqa ıe mamandyqtar boıynsha qysqa merzimdi kásibı kýrstardan ótip, bıznes jobalaryn iske asyrý múmkindikteri qarastyrylǵan. Osy baǵyttaǵy jobalar úshin 200 AEK – 505 myń teńge kóleminde grant beriledi.
Almatylyq jalǵyz basty ana Záýresh Júsipova memlekettik qoldaýǵa ıe bolǵandar qatarynda. «Sheber» ortalyǵynda tiginshi mamandyǵyn ıgergen Záýreshke de áleýmettik kómek taǵaıyndalǵan. Tiginshilikti qajetti kásip dep sanaıtyn Záýresh endigi kezekte bıznes josparyn jasap, jeke kásibin ashýdy josparlap otyr. Al úsh balanyń anasy Anar Qylysheva otbasynyń jalǵyz asyraýshysy. Baqylaýshy-kassır qysqa merzimdi kýrsynan ótken Anarǵa 77 186 teńge kóleminde áleýmettik kómek taǵaıyndalyp, qazirgi kezde otbasy mekteptiń qajettilikterin alyp, jaǵdaıyn birshama jeńildetti.
Memlekettik baǵdarlamany tıimdi paıdalanyp, týrızm agenttiginde tálim alǵan Albına Ámrenova da kásipkerlikpen aınalysýdy maqsat etedi. Onyń aıtýynsha, jumyspen qamtý ortalyǵynan berilgen naqty kómek jańa mamandyq alyp, zamanaýı aqparattardy ıgerip, ózin ózi damytýǵa zor múmkindik berip otyr.
Sonymen qatar 2 jas pen 17 jas aralyǵyndaǵy balasy bar kóp balaly ana Symbat Abatovaǵa da áleýmettik kómek taǵaıyndalypty. Otaǵasynyń jumys istegenine qaramastan, keletin tabys jetkilikti bolmaǵandyqtan otbasyna kómek retinde berilgen 67 604 teńgeniń paıdasy ájeptáýir. Al Symbat Jumys berý ortalyǵyna tirkelip, aspazshy mamandyǵy boıynsha qysqa merzimdi kýrstan ótken. Qazirgi kezde Almaty memlekettik bıznes kolledjinen sertıfıkat alyp, óz kásibin ashý úshin bıznes josparyn jasaýda. Sonymen qatar Jumys berý ortalyǵynda tirkelip, keıinnen «Agropromenergosnab-1» JShS jumysqa ornalasqan. Mektepke deıingi 1, mektep jasyndaǵy 3 balasy bar kóp balaly ana Vıktorııa Fıllıpovıch aǵymdaǵy jyldyń mamyr aıynan bastap áleýmettik kómek ala bastaǵan.
Al sońǵy kezderi memleketten beriletin áleýmettik kómekke zárý otbasylarmen qatar óz tabysyn jasyrǵan, jaǵdaıy bar azamattardyń alyp jatqandyǵy jaıyndaǵy derekter anyqtalýda. Mundaı kereǵar áreketter qoǵamdy alańdatýymen qatar, jalǵan derektermen qujat ótkizip kelgen azamattardyń otbasyndaǵy ahýalǵa da áser etedi dep sanaıdy áleýmettik sala mamandary. Sondyqtan da azamattardyń jalǵan aqparat berýge beıim pıǵyldary, joqty jeleý etip keleńsizdikterge sanaly túrde jol berýi búginde qoǵam bolyp kúresýdi qajet etetin kókeıkesti másele.
ALMATY
