– Konsertimiz XVIII ǵasyrdaǵy mýzyka óneriniń kórnekti ókilderiniń biri Antonıo Vıvaldı shyǵarmashylyǵyna arnalady. Eki bólimnen turatyn keń aýqymdy da qyzyqty baǵdarlamaǵa «Baıazet» Irena jáne «Grızelda» operasynan Konstansanyń sırek oryndalatyn arııalary, áıgili «Jyl mezgilderi» toptamasy, eki skrıpka men orkestrge arnalǵan konsert, eki goboı men orkestrge arnalǵan konsert, fagot pen orkestrge arnalǵan konsert engen. Osy toptama aıasynda biz tyńdarman nazaryna barokko dáýirimen baılanysty G.Persell, I.S.Bah, G.F.Gendel, T.D.Albınonı syndy birqatar kompozıtordyń shyǵarmalaryn usynýdy josparlaýdamyz. Teatr ártisterimen birge sahna tórine Qazaqstan men shetelden shaqyrtylǵan mýzykanttar shyǵady. Konsertter birshama ózgeshe formatta ótetin bolady, kórermenderge ázirlegen tosynsyıymyz kóp, – dedi joba avtory, dırıjer Abzal Muhıtdınov.
«Máńgi óshpes iz qaldyrǵan» atty sımfonııalyq konsertterdiń jańa toptamasy kórermenderdi tyń janrlardyń negizin salyp, olardyń bolashaqta damýyn anyqtaǵan kórnekti kompozıtorlarmen, mýzykalyq baǵyt ókilderimen tanystyrýǵa baǵyttalǵan. Toptama Antonıo Vıvaldıdiń shyǵarmashylyǵymen ashylady, ol daryndy skrıpkashy jáne kompozıtor retinde bes kúnniń ishinde úsh bólimdi opera mýzykasyn jaza alatyn ári bir taqyrypta kóptegen varıasııany qurastyrýǵa qabiletti kompozıtor retinde keńinen tanymal bolǵan. Vıvaldıdiń aspaptyq konsertteri klassıkalyq sımfonııanyń qalyptasý jolyndaǵy kezeń bolyp tabylady.
Sondaı-aq konsertke teatrdyń jetekshi solısi, Bashqurtstannyń eńbek sińirgen ártisi Alfııa Karımova (soprano), Batyrjan Smaqov (kontrtenor), «Astana Opera» orkestriniń solısi jáne birinshi skrıpkashysy, Qazaqstannyń eńbek sińirgen qaıratkeri Baǵdat Ábilhanov, «Mádenıet qaıratkeri» Aısulý Baıkenova, Mádına Kapeý (skrıpkalar), Áset Neldibaev (fagot), Damılıa Mahpırova, Nurgúl Saparova (goboılar) qatysady.
«Egemen-aqparat»
