Rýhanııat • 26 Qyrkúıek, 2019

«Alash alqasy» jastar klýbynyń kezekti jıyny ótti

53 retkórsetildi

Nur-Sultan qalasy ákimdigi Tilderdi damytý jáne arhıv isi basqarmasy «Rýhanııat» kommýnaldyq memlekettik mekemesi jáne №48 mektep-lıseıimen birlese otyryp  «Alash alqasy» ǵylymı-tanymdyq ıntellektýaldy jastar klýbynyń kezekti jıynyn ótkizdi. Bul týraly mekemeniń baspasóz qyzmeti habarlady.

Jıynnyń №48 mektep-lıseıinde ótýi sebepsiz emes. Irgeli oqý ordasy ataýyn Alash qaıratkeriniń esimine aýystyrýdy talaıdan qozǵap keledi. Sonymen qatar ult ustazynyń shaǵyn murajaıy da osy mektepte oryn tepken.

«Biz jyl saıyn Ahmet Baıtursynulynyń týǵan kúnine arnalǵan sharalardy dástúrli túrde ótkizip kelemiz. Sonyń biri L.N. Gýmılev atyndaǵy EUÝ birlese ótkizip júrgen konferensııalar, aqyn shyǵarmashylyǵyna arnalǵan baıqaýlar jáne osyndaı kezdesýlerdi aıta alamyz. Mektebimizde Ahmetti tanýǵa umtylyp júrgen oqýshylar kóp. Olar jyl saıyn respýblıkalyq deńgeıdegi jarystan oryndar alyp júr. Endigi armanymyz mektebimizge ult ustazynyń esimi berilse deımiz. Bul arqyly biz balalardyń boıyna eljandylyq pen ulttyq rýhty sińirgimiz keledi», dedi №48 mektep-lıseı dırektorynyń orynbasary Altyn Momysqyzy.

Kezdesýde Erbol Tileshov, Bekjan Ábdýáli, Saǵymbaı Jumaǵul, Ulan Erkinbaı syndy alashtanýshy ǵalym-zertteýshiler men aqynnyń atalas urpaǵy Azamat Nurlanuly oqýshylardyń kókeıtesti suraqtaryna jaýap berip, ǵylymı zertteýlerimen bólisti. О́z kezeginde oqýshylar aqyn shyǵarmalaryn jatqa oqyp, Ahmet Baıtursynulynyń qanatty sózderi toptastyrylǵan estelik syılyqty mektep murajaıyna tartý etti. Al jas zertteýshi Bazarbaı Symbat qaıratker shyǵarshylyǵyn zertteýdi qolǵa alyp, aldaǵy jumystary úshin aǵa býyndarynan aqyl suraı kelipti. Balǵynnyń jas talabyna rıza bolǵan el aǵalary ǵylym jolyna endi kelgen Symbattyń qadamyna qut tilep, batalaryn berdi.

1

«Osymen 3-shi ret ótkizilip otyrǵan is-sharamyzdyń negizgi maqsaty - ult muraty, memleketti qalyptastyrý jolynda eren eńbek etip, qazaq rýhanııatynyń ádebıeti men mádenıetiniń damýyna úles qosqan Alash qaıratkerleriniń taǵylymdy jolyn óskeleń urpaqqa úlgi-ónege retinde jetkizý, dáripteý. Joba «Jastar jyly» aıasynda júrgiziledi. Sonymen qatar «Rýhanı jańǵyrý» arqyly el muraty haqynda, tutastyq pen birlik arqyly ulttyq rýhty jańǵyrtýǵa úles qosý. Buǵan deıingi ótken kezdesýlerimizdiń taqyrybyn Álıhan Bókeıhanulyna, Abaı Qunanbaıulyna arnadyq. Sonyń nátıjesinde Á. Bókeıhan atyndaǵy murajaı ashyldy, Abaı atamyzdyń mereıtoıy qarsańynda mektepke aty berildi. Bul - biz baǵyndyrǵan belestiń basy ǵana. Aldaǵy ýaqytta da osyndaı jıyndarymyzdy kóbeıtpekpiz», dedi «Rýhanııat» KMM basshysy Erjan Eńsebaı.  

Shara sońynda ǵalymdar bul jıynnyń aýqymyn keńeıtip, Ahmet turǵysyndaǵy zertteýlerdi kóbeıtý jóninde mámilelesti. Sonymen qatar jastardyń da talabyn ushtaıtyn sharalardy uıymdastyrýǵa bastama kóterdi.

 

 

Sońǵy jańalyqtar

Basylym basshylary - Erkin QYDYR (1962)

Basylym basshylary • Keshe

Almatyda sel júrý qaýpi joq

Aımaqtar • Keshe

Uqsas jańalyqtar