Eýrazııalyq ıntegrasııa ınstıtýty uıymdastyrǵan konferensııaǵa Germanııa, Reseı, Qyrǵyzstan, Belarýs jáne Qazaqstannyń sarapshylary, memlekettik organdardyń ókilderi, ǵylymı qyzmetkerler, doktoranttar men magıstranttar qatysty. Jıynda Qazaqstannyń ıntegrasııalyq úrdister júıesindegi orny, EAEO jáne álemdik ıntegrasııalyq úrdister men olardyń múmkindikteri sóz boldy.
Eýrazııalyq ıntegrasııa ınstıtýty dırektorynyń orynbasary, saıasattanýshy Darhanbek Jandıldınniń aıtýynsha, qazirgi kezde ıntegrasııalyq prosesterdiń aýqymy tereń sıpatqa ıe boldy. «Týyndaǵan qarama-qaıshylyqtar men qaterlerdi sheshý memleketter tarapynan úlken kúsh-jigerdi talap etedi. Bastysy – jan-jaqty taldaý, talqylaý jáne odan ári yqpaldasý boıynsha usynystardy ázirleý», dedi ol.
Sondaı-aq sharada L.N.Gýmılev atyndaǵy EUÝ Internasıonaldandyrý jáne ımıdj ortalyǵynyń dırektory Seııt Alı Avdjý, Konrad Adenaýer atyndaǵy qordyń Qazaqstandaǵy ókildiginiń dırektory Tomas Helm jáne ózge de sarapshylar ǵalamdyq saıası trendter men syn-tegeýrinder taqyrybyn ortaǵa saldy. Tomas Helm óz sózinde basty ǵalamdyq trendter retinde AQSh pen Qytaı arasyndaǵy bıoóristilik, kıber shabýyldar, resýrstyq qaýipsizdik, energetıka jáne klımat, sıfrlyq ınnovasııa jáne kommýnıkasııa, jasandy ıntellekt máselelerin atap ótti. Plenarlyq otyrystan keıin paneldik sessııalarda ıntegrasııa máselelerin otandyq jáne sheteldik sarapshylar birge talqylady.
